* ٣٥ ساڵە پرۆسەی بەدناوی ئەنفال بۆ لەناوبردنی گەلەکەمان تێپەڕیوەو هێشتا نازانین ژمارەی تەواوی ئەنفالکراوەکانمان چەندن وکێ و کەی ولەکوێ ژێر خاک کراون.
* ٣٥ساڵەو دایکان، جل و لەچکە ڕەشەکانیان نەگۆڕیوەو هەرگوێ قوڵاخی خەبەری جگەرگۆشەکانیان.
* ٣٥ ساڵە و باوکە بەگوڕو چالاکەکانی ئەو سەردەمە کە ئێستا پشتیان وەک گۆچانەکانیان چەماوەتەوە، لە حەسرەتی هەواڵێکی رۆڵەکانیانن.
* ٣٥ ساڵەو ئەو کوڕو کچە سەرو چاووبرۆ ڕەشانەی کە لە هەڕەتی لاویدابوون و لە دڵخوازەکانیان جیاکرانەوە ئێستا تاڵەموی ڕەش لەسەرو چاویان بەدی ناکەیت هەر چاوەرێی ژوانێکی تری سەر کانی ئاواییەکانیانن.
* ٣٥ ساڵەو تاقانەکانی ئەنفال، چاوەڕێن تا داپیرەو باپیرەی منداڵەکانیان، بگەڕێنەوەو بانگی (هیواو ئامانج وتۆڵەو ژیان )نەکانی نەوەیان بکەن ڕابکەنە باوەشی گەرمیان و چیرۆکەکانی حەجاج وسەگە رەشەکان وجەلادەکانی نوگرەسەلمان و عەرعەریان بۆ باس بکەن.
* ٣٥ ساڵە وتاوانبارانی ئەنفال لەسەرەک جاش ومەفرەزە خاسەکان نەک دادگایی نەکراون، بەڵکو پارێزراو ومافدارترن لە کەسوکاری ئەنفالکراوان.
* ٣٥ ساڵەو ماف و ژیانی کەسوکاری ئەنفالکراوان لەنێوان بڕین وپاشەکەوت ودواکەوتنی موچەو ئیمتیازەکانیاندا لە چاوەڕوانیدان.
*٣٥ ساڵەو گەرمیانییەکان چاوەڕێی هەڵگرتنی نازو داخوازییەکانیان لەو دەسەڵاتەی کە بەخوێنی کەسوکاریان هاتەبوون.
* ٣٥ ساڵەوئەو دەسەڵاتە کە دەگاتە ١٤ی٤ دەیان بەڵێن و وشەو ڕستەی ڕەنگاوڕەنگ ڕێکدەخات و یەکانیان جێبەجێ ناکات.
* ٣٥ ساڵەو ڕێگای گەیشتن بە زێدێ ئەنفالەکان رۆژانە قوربانی لە کەسوکاریان دەبەخشن و تائیستا رێگایەکی سەلامەتیان پێ ڕەوا نەبینراوە.
* ٣٥ ساڵە ئێمە وکەسوکاری قوربانیان گازندە دەکەن و دەسەڵاتدارانی هەرێم گوێمان لێناگرن.
* ٣٥ ساڵەو نە کەیسەکە بە جینۆساید ناسێنراوە، و نەقەرەبوی کەسوکاری ئەنفالکراوان کراوەتەوە.
* ٣٥ ساڵە و 35 ساڵە و سی و پێنج ساڵە.
