لە سنووری ناوچەی مەریوانی ڕۆژهەڵاتی کوردستان، سوپای پاسدارانی کۆماری ئیسلامی ئێران دەستیکردووەتەوە بە بۆردومان و توندکردنەوەی دۆخی ئەمنی ناوچەکە.
بەپێی ڕاپۆرتی ڕێکخراوی مافی مرۆڤی هانا، بەیانی ئەمڕۆ پێنجشەممە، سوپای پاسداران ناوچە شاخاوی و دارستانەکانی سنووری مەریوانی کردووەتە ئامانجی هێرشەکانی.
وردەکاریی هێرشەکان:
• کات و شوێن: هێرشەکان دەوروبەری کاتژمێر ٧:٣٠ی بەیانی لە دەوروبەری گوندەکانی گاگل، هانەشێخان و قامیشڵە دەستیانپێکردووە.
• شێوازی هێرش: چەندین درۆنی خۆکوژ بۆ سەر بەرزایییەکانی ئەو ناوچانە نێردراون.
• زیانەکان: بەهۆی بۆردومانەکانەوە زیان بە باخ، زەوی و زاری هاوڵاتییان و ڕووپۆشی ڕووەکی ناوچەکە گەیشتووە، بەڵام تا ئێستا ئامارێکی فەرمی لەبارەی قوربانییە گیانییەکان بڵاونەکراوەتەوە.
ڕێکخراوی هانا ئەوەشی خستووەەڕوو کە هێزەکانی سوپای پاسداران هێشتا لە ناوچەکەدا جێگیرن و دۆخێکی ئەمنی توندیان پەیڕەو کردووە.
شایەنی باسە، هێرشە بەردەوامەکانی ساڵانی ڕابردووی سوپای پاسداران بۆ سەر ناوچە سنوورییەکانی کوردستان، جیا لە زیانە مەترسیدارە ژینگەییەکان، لە زۆرینەی حاڵەتەکاندا بوونەتە هۆی کەوتنەوەی ئاگر لە دارستانەکان و وێرانبوونی زەوییە کشتوکاڵییەکانی خەڵکی ناوچەکە.