مەڵبەندێ دهۆک یێ حزبا شیوعی یا کوردستانێ، د داخویانییەکێ دا ب هەلکەفتا ٣٨ ساڵیا ئەنفالا بهدینان، ڕێز و نەمری بۆ شەهیدێن ڤێ تاوانا مەزن نیشان دا و جەخت ل سەر مافێن قوربانییان کر.
د راگەهاندنێ دا هاتە دیارکرن، کو د ڤێ تاوانا درندانە یا رژێما بەعس دا، ب هەزاران هاوڵاتییێن سڤیل هاتنە شەهیدکرن و دەربەدەرکرن، هەروەسا سەدان گوند هاتنە وێرانکرن. حزبا شیوعی داخواز ژ حکومەتا هەرێما کوردستانێ کر فشارێ ل حکومەتا فیدرال بکەت دا ب ئەرکێ خۆ یێ یاسایی و رەوشتی رابیت د قەرەبووکرنا مادی و مەعنەوی یا کەسوکارێن شەهیدان دا، و ئاڤاکرنا دەڤەرێ.
هەروەسا داخوازا دادگەهکرنا تاوانباران و ناساندنا ئەنفالێ وەک جێنۆساید ل سەر ئاستێ نێڤدەولەتی هاتە کرن. ل دووماهییێ، مەڵبەندی پەسنا خۆڕاگرییا خەلکێ بهدینان کر و دوپاتکر کو ئیرادەیا وان ستوونا سەرەکی یا تێکۆشینێ یە.
داخویانیا مەڵبەندێ دهۆک یێ حزبا شیوعی یا كوردستانی ب هەڵکەفتا ساڵڤەگەڕا ئەنفالا بهدینان
ل بیرەوەرییا ساڵڤەگەڕا (38)ێ يا ئەنفالا بهدینان دا، ئەم ب ڕێز و حورمەت بیرهاتنا شەهیدێن ڤێ تاوانا قڕکرنێ (جێنۆساید) دکەین ، کو تێ دا ب هەزاران هاوەلاتیێن سڤیل ب چەکێن جۆراوجۆر و بشێوێن درندانە هاتنە شەهیدکرن و دەربەدەرکرن و ب سەدان گوند هاتنە وێرانکرن و سۆتن ب دەستێ رژێما سەدامێ گوڕبگوڕ .
حزبا شیوعی یا كوردستانی جارەکا دی دوپاتیێ ل سەر بەرپرسیارەتی یا حکومەتا هەرێما کوردستانێ ژ بۆ نەچارکرنا حکومەتا فیدرال یا عێراقێ ، دا ب ئەرکێ خۆیێ یاسایی و رەوشتی رابیت ب قەرەبووکرنا مادی و مەعنەوی یا کەسوکارێن شەهیدان و زیانڤێکەفتییان و ئاڤاکرنا دەڤەرا وان دکەت ، هەروەسا دادگەهکرنا بڕیاردەر و پشکدارێن ڤێ تاوانێ و ناسکرنا وێ وەکو جێنۆساید ل سەر ئاستێ نێڤدەولەتی دکەت .
و ئەم ڕادگەهینین کو بەردەوامیا خۆڕاگری ، و ئیرادە و بەرخۆدانا کلتوری و جڤاکی یا خەلکێ بهدینان ستوونا سەرەکی يا تێکۆشینا مە یە بۆ بدەستڤەئینانا مافێن نەتەوەیی و نیشتمانی و مسۆگەرکرنا وەلاتەکێ ئازاد و گەلەکێ بەختەوەر .
نەمری بۆ شەهیدێن ئەنفالا بهدینان و هەمی شەهیدێن کوردستانێ .
مەڵبەندێ دهۆک – حزبا شیوعی یا كوردستانی