حەمەسەعید حەسەن
کە خۆر پرشنگی دەنێرێ
بۆ گۆی زەوی
نە گوێ دەداتە نیشتمان
نە پلە و پایە، نە ڕەگەز
نە ڕەنگی پێست و نە زمان
*
هێشتا زمان
لەناو هێلکەی مێژوودابوو
ئایین سەری هەڵنەدابوو
خۆر هەر خۆرەتاوی دەنارد
شەماڵ، شنە
هەور، باران
زەریا ئاوی دەبەخشییە
هەموو جیهان
*
من نازانم
کەی بەستەڵەکی جیاوازی دەتوێتەوە
بەڵام هەموو شەوێ خەوێ
دەبینم بە ئەو ڕۆژەوەی
باڵی بەرینی یەکسانی
سەراپای ئەم سەرزەمینە
بگرێتەوە
*