ژووری هەواڵ
لە عێراقدا ملیۆنان کەس پشت بە مووچەی چاودێریی کۆمەڵایەتی دەبەستن و حکوومەت بودجەیەکی گەورەی بۆ ئەم چینە کەمدرامەتە تەرخانکردووە.
بەپێی ئامارە فەرمییەکان، ژمارەی ئەو کەسانەی لە سەرانسەری عێراقدا لەم هاوکارییە داراییە سوودمەند دەبن، لە نێوان پێنج ملیۆن و شەش سەد هەزار بۆ حەوت ملیۆن و شەش سەد هەزار کەس دەبێت کە خێزان و تاکەکان دەگرێتەوە. بۆ ئەم مەبەستە، مانگانە نزیکەی چوار سەد و حەفتا ملیار دینار خەرج دەکرێت، لە کاتێکدا کۆی بودجەی گشتیی ساڵانە بۆ ئەم کەرتە زیاتر لە شەش تریلیۆن دینار تێپەڕ دەکات.
وەزارەتی کار و کاروباری کۆمەڵایەتی جەخت لەوە دەکاتەوە کە پڕۆسەکە بۆ خێزانە هەژار و بێکارەکانە و لە ڕێگەی وردبینی و چاودێریی بەردەوامەوە هەوڵ دەدرێت مووچەکان بگەنە دەست ئەو کەس و خێزانانەی شایستە ڕاستەقینەی ئەم مووچەیەن و ڕێگری لە پێدانی نایاسایی بكرێت.
