رێگای كوردستان
رۆژی دووشەممە، پەرلەمانی تورکیا لە کۆبوونەوەیەکی درێژخایەن و فەرمیدا کە ١٢ کاتژمێری خایاند، بە زۆرینەی دەنگی پەرلەمانتاران پڕۆژەیاسای تایبەت بە پڕۆسەی چارەسەری پەسندکرد.
پەسەندکردنی ئەم پرۆژەیاسایە، کە ناوی فەرمییەکەی "پێشنیازەیاسای بەهێزکردنی پاڵپشتیی نیشتمانی و یەکگرتوویی کۆمەڵایەتی"ـیە و لە ١٢ ماددە پێکهاتووە، دوای گفتوگۆیەکی چڕوپڕ هات. لە کۆی ٥٦٢ پەرلەمانتاری ئامادەبوو لە دانیشتنەکەدا:
- ٤٦٨ پەرلەمانتار دەنگی "بەڵێ"ـیان دا.
- ٨٨ پەرلەمانتار دەنگی "نەخێر"ـیان دا.
- ٦ دەنگی بێلایەن (بەتاڵ) تۆمار کران.
قۆناغەکانی ئامادەکردن و پێشینەی یاساکە
پەسندکردنی ئەم یاسایە دوای ساڵێک لە کاری بەردەوامی کۆمیسیۆنی پڕۆسەی چارەسەری دێت؛ لەو ماوەیەدا کۆمیسیۆنەکە گوێی لە نزیکەی ١٤٠ کەسایەتی گرتووە و چەندین کۆبوونەوەی تایبەتی ئەنجام داوە.
سەبارەت بە هەڵوێستی لایەنە سیاسییەکان و قۆناغەکانی پێشکەشکردنی، ڕەشنووسی پڕۆژەیاساکە سەرەتا لە ٥ـی ئابدا بە واژۆی ٣٦٠ پەرلەمانتار پێشکەشی سەرۆکایەتیی پەرلەمان کرابوو. دواتریش، لە ٨ـی ئابدا لە کۆبوونەوەیەکی ١٨ کاتژمێری کۆمیسیۆنی داددا، توانی رەزامەندیی لایەنە سەرەکییەکان، لەوانە ئاکپارتی، مەهەپە و دەم پارتی بەدەستبهێنێت.
