دەزگای ئاسایشی نیشتمانیی عێراق سەرجەم ئەو دەنگۆیانە ڕەت دەکاتەوە کە باس لە بوونی ڕێککەوتن لە نێوان بەغدا و تاران دەکەن بۆ دەرکردن یان ڕادەستکردنی ئەندامانی هێز و حزبەکانی ئۆپۆزسیۆنی ڕۆژهەڵاتی کوردستان بە کۆماری ئیسلامیی ئێران، و ئەوان بە "ناڕاست" وەسف دەکات.
ئەم ڕونکردنەوەیەی ئاسایشی نیشتمانی لە وەڵامی لێدوانێکی فەرمیدا هات کە لە لایەن (محەمەد کازم ئالسادق)، باڵیۆزی ئێران لە بەغدا، بڵاوکرابووەوە. ناوبراو لە پەیامێکدا لە پلاتفۆرمی "X" ڕایگەیاندبو کە تاران و بەغدا لە کۆبوونەوەکانیاندا ڕێککەوتوون لەسەر دەرکردنی ئۆپۆزسیۆنی کوردی ئێران لە هەرێمی کوردستان یان ڕادەستکردنەوەیان.
• هەڵوێستی فەرمیی دەزگای ئاسایشی نیشتمانیی عێراق: ڕۆژنامەی "العربی الجدید" لە زاری سەرچاوەیەکی بەرپرس لە دەزگای ئاسایشی نیشتمانیی عێراقەوە بڵاوی کردەوە کە هیچ ڕێککەوتن یان بڕیارێک لە عێراق بۆ دەرکردنی ئەو گروپە سیاسییە ئۆپۆزسیۆنانە بونی نییە. هەروەها جەخت کرایەوە کە:
o ئامادەبوونیان لەسەر خاکی عێراق بەپێی یاسا نێودەوڵەتییەکانە و خۆیشیان پابەندن بە یاساکانی عێراقەوە.
o ڕاگەیەندراوی فەرمیی دەزگاکە لەسەر کۆبوونەوەی بەرپرسانی ئەمنیی هەردوولا، هیچ ئاماژەیەکی بە بوونی ڕێککەوتنێکی لەو جۆرە نەکردبو.
• پاشخانی ڕێککەوتنە ئەمنییەکەی نێوان هەردوولا: بەغدا و تاران لە مانگی ئازاری 2023 ڕێککەوتننامەیەکی ئەمنییان واژۆ کرد بە مەبەستی چەککردنی حزبەکانی ئۆپۆزسیۆنی ئێرانی و دورخستنەوەیان لە ناوچە سنورییەکانی هەرێمی کوردستان. سەرەڕای جێبەجێکردن و پێشخستنی بەشێک لە بڕگەکانی ئەو ڕێککەوتنە و گواستنەوەی هێزەکان بۆ کەمپی تایبەت، بەڵام دەسەڵاتدارانی تاران بەردەوام داوای دەستگیرکردن و ڕادەستکردنەوەی سەرکردە و ئەندامانی ئەو پارتانە لە حکومەتی عێراق دەکەن.
