رێگای كوردستان
ڕۆژنامەی (وۆڵ ستریت جۆرناڵ) بڵاویکردەوە، ژمارەیەک لە ڕاوێژکار و بەرپرسە باڵاکانی کۆشکی سپی بە شێوەیەکی تایبەت هۆشدارییان داوەتە سەرۆکی ئەمریکا (دۆناڵد ترەمپ) لەوەی کە ئەگەری هەیە ململانێ و شەڕ لەگەڵ ئێران تا کۆتایی خولی سەرۆکایەتییەکەی (واتە تا مانگی ١ی ساڵی ٢٠٢٩) بەردەوام بێت.
خاڵە سەرەکییەکانی ڕاپۆرتەکە:
• هۆشداریی بەرپرسان: جەی دی ڤانس (جێگری سەرۆکی ئەمریکا) و مارکۆ ڕوبیۆ (وەزیری دەرەوە) لە کۆبوونەوەکانی ئۆفیسی ئۆڤاڵ و ژووری بارودۆخدا جەختیان لەوە کردووەتەوە کە تاران سەرەڕای گەمارۆ و فشارە سەربازییەکان، توانای بەرەنگاربوونەوەی هەیە.
• ململانێی درێژخایەن: ڕاوێژکارەکان پێیان وایە بەرخۆدانی ئێران دەکرێت قەیرانەکە درێژ بکاتەوە بۆ ماوەیەک کە تێپەڕین بە دەستبەکاربوونی سەرۆکی داهاتووی ئەمریکاش بگرێتەوە.
• بەرپەرچدانەوەی کۆشکی سپی: کۆشکی سپی هیچ لێدوانێکی فەرمی لەسەر وردەکاریی ئەم ڕاپۆرتە نەداوە.
هەڵوێستی ترەمپ:
لە بەرامبەردا، دۆناڵد ترەمپ لە لێدوانێکدا بۆ ڕۆژنامەنووسان ڕایگەیاند کە پێیوایە شەڕی ئێران ڕاستەوخۆ دوای هەڵبژاردنی ناوەڕاستی خولی ئەمریکا لە مانگی تشرینی دووەم (نۆڤەمبەر) کۆتایی دێت. ترەمپ جەختیکردەوە کە ئێران ناتوانێت بەرگەی بگرێت و تۆمەتباری کرد بە هەوڵدان بۆ کاریگەریخستنەسەر هەڵبژاردنەکان، هەروەھا ئاماژەی بەوەش کرد کە تاران ئێستا بەدوای ڕێککەوتندا ناگەڕێت و ئامانجی گەورەتر لە ڕێککەوتنی ئەتۆمی هەیە.
