هیوا عومەر
كردنەوەی پێشانگای نێودەوڵەتی كتێب لەم رۆژانەدا، دەكرێت وەك دەرفەتێك بێت بۆ ئەوەی بیر لە بیركردنەوەكانی خۆمان بكەینەوە، بیر لە ڕابردوو و داهاتووش، لەمڕۆمان بكەینەوە .
كردنەوەی پێشانگای كتێب گرنگە نەك لەبەر ئەوەی كێشەی دەستكەوتنی كتێبمان هەیە، گرنگە بەو مانایەی بیر لە كردە و پرۆسەی خوێندنەوە بكەینەوە.
لە ساتەوەختی ئەمڕۆماندا هیچ كاتێك و زەمەنێك مرۆڤ بەئاسانی نەیتوانیوە دەستی بگات بە كتێب و سەرچاوەكانی نووسین، هیچ كاتێكیش ژمارەی خوێندكار و مامۆستا و دكتۆر و نووسەرمان بەقەد ئەمڕۆكە نەبووە، بەڵام هیچ كات و زەمەنێكیش لەدوای بچڕانە مێژووییەكانی سەدەكانی ناوەڕاستدا، كتێب و عەقڵ لەبەردەم هەڕەشە و فەوتاندا، نەبووە.
ڕەنگە جۆرێك سەرسورمان لای خوێنەر دروست ببێت چۆن دەكرێت لە كاتێكا وا بەئاسانی كتێب لەبەردەستماندایە لەبەردەم هەڕەشەشدابێت!؟
چۆن دەكرێت دەیان هەزار قوتابی و دكتۆر و مامۆستای زانكۆ و نووسەر و رۆژنامەوانمان هەبێت، بەڵام نەخوێندەواریش بن ؟
مرۆڤی ئەمڕۆ جیاوازە لە مرۆڤی دوێنی وەك خود و سوبیكتڤ ... لەگەڵ گەشەكردنی فۆڕمەكانی ژیانی سەرمایەداری و نیولیبرالیزم و سەكۆكانی تۆڕەكۆمەڵایەتییەكان، بونیادی بیركردنەوەمان لە كتێب و كردەی خوێندنەوە گۆڕاوە، بەجۆرێك چیتر خوێندنەوە بۆ گەشەی عەقڵ و بڕینی سنوورەكان نییە لەبەردەم خەیاڵی مرۆڤ، بەڵكو كردەی خوێندنەوە بۆتە بەشێك لە كردەی ژیانی ئیستهلاكی دونیای مرۆڤی چێژگەرا و ژیانی زوو تێپەڕی و ڕووكەشگەرایی هەروەك باسەكانی
(ژیانی شل)ی كۆمەڵناس، زیگمۆن باومان (1925 – 2017) .
كاتێك سەردانی پێشانگای كتێب دەكەیت، ئەو كتێبخانانەی زۆرترین كتێبی بازاڕی چۆن دەبیت بە بزنسمان، یان ئەو پەرتووكانەی دەچنەوە سەر دونیای مۆدەگەرایی و فیگەرەكانی سۆشیالمیدیا و نمایشی فۆڕمەكانی ئایینی ئیسلامی سیاسی و وەهابییەت، سعودی و كلتووری ئامۆژگارین، دەبینیت زۆرترین سەردانیكەر و باشترین بازاڕیان هەیە، لەبەرامبەر ئەوەدا ئەو كتێبانەی پرسیاری جەوهەری لەسەر كلتووری كۆنەپەرستی و فۆڕمەكانی چەوساندنەوەی مرۆڤ و بیركردنەوە چەقبەستووەكانمان دروست دەكەن، كەمترین سەردانیكەر و بازاڕیان هەیە .
پرۆسەی خوێندنەوە، ئەگەر نەیكردین بە مرۆڤێكی بیركەرەوە لە جێگای مرۆڤێكی چەقبەستوو، نەیكردین بەو كەسەی بتوانین بەدیدێكی رەخنەگرانە بیر لە بیركردنەوەكانی خۆمان بكەینەوە، بیر لە چۆنیەتی پاراستنی شكۆی مرۆڤ و ژیانی گیانەوەر و سروشت بكەینەوە، نەیخستینە سەر رێگای گومان و شك لەو قاڵبەژیانەی بۆمان داتاشراوە، نەیكردین بەو كەسەی بیر لە گۆڕینی خووە خراپەكانمان بكەینەوە، ئەوە بزانە ئێمە لەبری خوێندنەوە خەریكی خۆبەرهەمهێنانەوەین، لەبری گەڕانەوە بۆ عەقڵ و گەشەپێدانی بنەماكانی بیركردنەوە، خەریكی پیاسەكردنین لەناو نغرۆبوون لە زەلكاوی دونیای رووكەشگەرا و چێژی ساختە و تێپەڕ و كاتی، لەبری بنیادنانی سبەینێكی دیكە .
