سەدیق سەعید ڕواندزی
سەندیكا و ڕێكخراوە پیشەیی و جەماوەرییەكان، ڕۆڵێكی گرنگ و بنەڕەتی و دامەزراوەیی و پیشەیی لە هوشیاركردنەوەی كۆمەڵگە، بەتایبەتیش لە فراوانكردنی پەراوێزەكانی ئازادی و سەربەخۆیی تاك و گێڕانەوەی ماف دەبینن. بەو شێوەیەش هەمیشە ڕۆڵی چاودێرێكی بوێر، بەسەر دامەزراوەی دەسەڵاتەكان و سیستەمی سیاسی وڵات دەبینن، كە زۆرجار كار و هەڵوێستەكانیان، دەبنە مایەی پەكخستنی ژیان و ڕاگرتنی هەموو جموجۆڵێك، لەپێناو بە ئامانجگەیاندنی داخوازی و مافەكانیان، وەك ئەوەی لە وڵاتە دیموكراسی و پێشكەوتووەكان دەبینرێت. لە هەرێمی كوردستاندا، هەزاران بەناو ڕێكخراوی كۆمەڵگەی مەدەنی، جەماوەری و پێشەیی و چالاكوانان بوونی هەیە، كەچی كەمترین جێدەست و ڕۆڵیان بەسەر ژیانی جەماوەری و كۆمەڵایەتی و سیاسی كۆمەڵگەوە هەیە، چونكە ئەو ڕێكخراوانە لە بنەڕەتدا نە سەربەخۆن، نە پەیوەندییەكی ئەوتۆشیان بە كۆمەڵگەی مەدەنییەوە هەیە، بەڵكو كار و ئامانجەكانیان لە هەندێك كاری سادە و ڕووكەش و میللی كورتدەكەنەوە، وەك ئەوەی بەشێكی زۆر لە ڕێكخراوەكانی تایبەت بە بواری ژنان، خولی دوورمانی، چێشتلێنان، چۆنیەتی دروستكردنی شیرینی بۆ ژنان دەكەنەوە و جارێكی دیكە ڕەوایەتی لەژێر شوناسێكی مەدەنییانە، بەو ئەقڵە میللی و خێڵەكی و جەماوەرییانە دەدەن، كە ژن و موبەق لەیەك جیاناكاتەوە و ژنی هەرە داهێنەر و دەستڕەنگین ئەو ژنەیە، كە چێشتەكانی خۆش بن ! هەر ئەمەشە خواستی سەرەكی پیاوان بەگشتی لە چواردیواری ماڵدا.
من بیست و هەشت ساڵە مامۆستام، بۆ ساڵانێكی زۆر ئەندامی یەكێتی مامۆستایان بووم (ئێستا بەشانازییەوە هەشت ساڵ دەبێت وازم لە ئەندامیەتی ئەو ڕێكخراوە هێناوە)، بەدرێژایی ئەو هەموو ساڵانە، لە بەرانبەر ئەو هەموو بێمافییەی مامۆستایان، دواكەوتنی مووچە، ڕاگرتنی پلەبەرزكردنەوە و بەداخەوە تێهەڵدان و لێدانی مامۆستایانیش لەنێو خۆپیشاندانەكاندا بەدەستی پیاوەكانی دەسەڵات، كەچی بۆ یەك جاریش نەمبیست ئەو ڕێكخراوە داوا لە مامۆستایان بكات، دژی حكومەت و دەسەڵات خۆپیشاندانێكی هێمنانە بكەن و داوای مافەكانیان بكەن، ئەوەشی كراوە لە ڕێگەی لیستی مامۆستایانی پیشەیی حزبی شیوعی، یان ئەنجوومەنی مامۆستایانی ناڕازی بووە، كەواتا هەبوونی یەكێتی مامۆستایان، جگە لە گرانی لەڕووی بودجە و بێبایەخكردنی كاری ڕێكخراوەیی هیچی ترە؟ لەو ڕوانگەیەوە سەندیكای ڕۆژنامەنووسان، یەكێكە لەو ڕێكخراوە پیشەییانەی نموونەی ناسەركەوتوویی، پەرتەوازەیی، نەبوونی ڕۆڵی سەندیكایانەیە لە هەرێمی كوردستان. ئەو سەندیكایە، نەقیبەكەی لە بەرەیەك بوو، جێگرەكەشی تا ئەو ساتەی (وازی لە یەكێتی نەهێنابوو) لە بەرەیەكی دیكەبوو، لقێكیان هەیە لە سلێمانی، بەرپرسەكەی بۆ خۆی حاكمی بەڕ و بەحرە و نە گوێ بە نەقیب، نە گوێ بە جێگرەكەی دەدات و چی ویست ئەوە دەكات، بگرە هەر بۆخۆیان سەندیكایەكی سەربەخۆن! هەریەكەیان جۆرە هەڵوێست و بەیاننامەیەك، لەهەنبەر پرس و ڕووداوەكان، بەبارگاویكردنیان بە ئایدیۆلۆژیای حزبی دەردەكەن، لە كاتێكدا دەبوو ئەم ڕێكخراوە، لەڕووی ڕێكخستنی كاری ڕۆژنامەوانی و پیشەییدا لە كاری (مایك بەدەستەكان) هەڵوێست و سەربەخۆبوون، داكۆكیكردن لە مافی ڕۆژنامەنووسانی زیندانیكراو، ماف پێشێلكراو، پێشەنگ بێت. دەبوو نەك هەر كاری حزبی و سیاسی ڕەتبكاتەوە و جیای بكاتەوە لە كاری پیشەیی، بەڵكو دەبوو پەراوێزەكانی ئازادی نووسین و ڕادەربرین، ڕووماڵكردنی هەواڵ و بەدواداچوونەكان هێندە فراوان بكات، حكومەت بوێری ئەوەی نەبێت سنوورێكیان بۆ دابنێت. ئەم سەندیكایە، یاسایەكی هەیە كە لە چەندین بڕگە و ماددە پێكهاتووە، بەڵام گەر بەوردی لەڕووی پەیِرەوییەوە، هەروەها شرۆڤەی چەمكی و یاساییەوە بڕوانینە پەیڕەوەكە، ئەوا چەندین كەموكورتی گەورە و چەمكی لاستیكی و ناڕوونكراوە دەبینین، بەجۆرێك كە مرۆڤ نازانێت مەبەست لەو بڕگانە چییە؟ چونكە وەك پێویست ڕوونكردنەوەی چەمكییان بۆ نەكراوە و سیفەتەكەیان لەڕووی پیشەیی و كار و بواری ڕۆژنامەنووسییەوە، ناڕوونە و بگرە بەجۆرێك لە جۆرەكان یاساكە، دەروازەیەكە بۆ ئەوەی بەلێشاو خەڵك خۆی بكاتە ڕۆژنامەنووس و كاری ڕۆژنامەنووسی بێبەها و بێئەرزش دەكات. سەرەتا گەر لەسەر پێناسەی ڕۆژنامەنووس بوەستین و لە پەراوێزی یاساكەوە كەسیەتی ڕۆژنامەنووس لەڕووی پیشەییەوە دەربخەین، ئەوا لە یاساكەدا لە ماددەی یەكەم و لە بڕگەی پێنجەمدا ڕۆژنامەنووس بەو شێوەیە دەناسێنێت كە: (ڕۆژنامەنووس هەركەسێكە كە لە بواری ڕۆژنامەگەریدا، لە هەر كەناڵێكی ڕاگەیاندن كار دەكات) (1) بێگومان ئەم پێناسەیە، ئەم دیاریكردنە بۆ كاری ڕۆژنامەنووسی، خۆی لەخۆیدا بێئەرزشكردن و بێبەهاكردنی كاری ڕۆژنامەنووسییە، چونكە دەربڕینی (هەر كەسێك) ڕەویەتیدانە بەشێوەیەكی جەماوەری و میللی، بۆ كاری ڕۆژنامەوانی كە بەداخەوە ئەو دەرهاوێشتە و گەڕەڵاوژێیەی لێكەوتۆتەوە، كە تەنانەت ڕۆژنامەنووسی وا هەیە دەڵێت (بەخۆشحاڵییەوە تەرمی ناوبراو دۆزرایەوە) لە كاتێكدا ڕۆژنامەنووس بەر لەوەی بەشێوەیەكی مەیدانی بكەوێتە نێو كاری مەیدانی ڕۆژنامەنووسییەوە دەبێ باكگراوەندێكی گەورە و چەندین سیفەتی فەرهەنگی و ڕۆشنبیری هەبێت وەك ئەوەی دەبێ زمانزان، خاوەن ڕۆشنبیرییەكی فراوان، بوێر و مەیدانی و چاو نەترس، هاوكات ئیتیكی ئەو كارە بەوردی بزانێت و شارەزا بێت، نەك ئەوەی هەر كەسێك كە هاتە دەزگایەكی ڕاگەیاندن، ئیدی ڕۆژنامەنووس بێت.
خۆ كاری ڕۆژنامەنووسی، خولی دوورمان و زمان نییە، تا هەركێ مەبەستی بێت، بتوانێت تیایدا بەشداربێت و فێربیت! ڕۆژنامەنووسی، بوارێكی فەرهەنگی و كولتوورییە، پەیوەندی بە لایەنی زمانناسی، ڕۆشنبیری و هزری و فەرهەنگییەوە هەیە، جێگەی داخە ئەم جۆرە لە بەعەوامكردنەی كاری ڕۆژنامەنووسی لەلایەن سەندیكاوە، زەمینەیەكی هێناوەتە ئاراوە، كە ئێستا لە هەرێمی كوردستاندا خەڵكی بەخۆشی و توانجەوە بە ڕۆژنامەنووسان دەڵێن مایك بەدەست!! بەو مانایەی هەزاران كەس، دەستیان داوەتە ئەو بوارە كە سەرەتاییترین، كەمترین زانیاری و سیفەت و ئیتیكی كاری ڕۆژنامەوانییان تێدا نییە. ئەمە لەلایەك، لەلایەكی دیكەوە سەندیكا بەو پەیڕەوەی جیاوازی لەنێوان ڕۆژنامەنووسێك، لەگەڵ شوفێری نووسینەگەیەكی ڕۆژنامەنووسی، مۆنتێر و كامێرامانێك نەهێشتۆتەوە و هەمووان بە ڕۆژنامەنووس دەناسێنێت كە ئەمەش هەڵەیە، هەرچەندە پێوەرێكی نێودەوڵەتیشە، چونكە ڕۆژنامەنووسێك كە كاری مەیدانی بەنموونە لەنێو جەرگەی شەڕێكی گەورە و بێئامان دەكات و هەواڵی بەرەكانی شەڕ ڕووماڵ دەكات و چركە بەچركە لە چاوەڕوانی مەرگدایە، زۆر جیاوازە لەگەڵ كامێرامانێك، مۆنتێرێك كە لەنێو ژوورێك و دوور لە هەموو جۆرە مەترسییەك كاری هونەری دەكات! بۆیە دەبوو سەندیكا، ڕۆژنامەنووسی مەیدانی لە نامەیدانی جیابكاتەوە و پلەبەندییەك دابنێت لە پەراوێزی ئەرك و كار و ڕۆڵیان لە دنیای ڕۆژنامەنووسیدا. لە ماددەی چوارەم، بڕگەی یەكەمدا، سەندیكا مەرجەكانی بۆ كاری سەرنووسەرایەتی بڵاوكراوەیەك دیاریكردوون، بۆیە لەو بڕگەیەدا هاتووە: (دەبێ ڕۆژنامەنووس بێت، زمانی ڕۆژنامە بەنووسین و خوێندنەوە بزانێت ) (2). لە ڕاستیدا، مەرجێكی وەها سادە و ساكار، بۆ كارێكی گەورە و پڕ بەرپرسیاریەتی وەك سەرنووسەری ڕۆژنامە، زۆر سەیر و بچووك و بێهێزە. مانای چییە، بزانێت بخوێنێتەوە و بنووسێت؟ ئایا ئەوەندە بەسە؟ مەگەر سەندیكا نازانێت (سەرنووسەری) هەر بڵاوكراوەیەك، كارێكە هەڵگڕی چەندان بەرپرسیاریەتی نیشتمانی، كۆمەڵایەتی، فەرهەنگی، ئەمنی و نەتەوەییە؟ مەگەر سەندیكا دركی بەوە نەكردووە، كە سەرنووسەر دەبێ ئینسكلۆپیدیایەك بێت بۆ خۆی؟ دەبی زمانزان و باكگراوەندێكی گەورەی ڕۆشنبیری و فەرهەنگی هەبێت؟ سەرنووسەر، وەك فلتەری ڕۆژنامە وایە، هەر هەواڵێك، وشەیەك، هەڵەیەك بەسەر هەموواندا تێدەپەڕێت، لەلای ئەو دەمێنێتەوە و وەك بەربەستێكە لەبەردەم هەر هەڵەیەكی واتایی، زمان و ڕۆژنامەنووسی، بۆیە سەرنووسەر نەك هەر دەبێ چەندین خەسڵەتی گرنگی هەبن، بەڵكو دەبێ زۆر بەتوانا و پڕمەعریفە و ڕۆشنبیریش بێت لە هەموو بوارێكەوە، بۆ ئەوەی لە كوێ هەڵەیەك لە ڕۆژنامەكەدا بەسەر هەمووان تێپەڕی، ئەو بیبینێت و نەهێڵێت لە فلتەرەكەی دەرچن ! هەر لە یاسای سەندیكادا، ماددەی شەشەم بڕگەی یەكەم، لە بارەی بڵاوكردنەوەی زانیاری لەسەر كەسێك، ئەوا كەسەكە بۆی هەیە وەڵامی هەواڵ و زانیارییەكە بداتەوە بە مەرجێك: (وەڵامەكە لە هەمان جێ، بەهەمان پیت و هەمان ئەو قەبارەیەی كە هەواڵەكەی پێ بڵاوكراوەتەوە، بڵاوبكاتەوە)(3) پێدەچێ سەندیكا، وەڵام و بەدواداچوونی ڕۆژنامەوانی بەحونجەكردن زانیبێت ! هەر بۆیە مەرجی ئەوەی داناوە، كە وەڵامەكە بەهەمان قەبارە و پیت و لە هەمان شوێن بێت (وەك ئەوەی هەواڵ ماددە بێت بارستایی و قەبارەی هەبێت) بەهەمان پیت مانای چییە؟ مەگەر هەواڵێك بەكوردی لەسەر كەسێك بڵاوبكرێتەوە كەس بەژاپۆنی وەڵامی دەداتەوە؟ ئەگەر مەبەستیشیان فۆنتی هەواڵەكە بێت، ئەوا ئەوەشیان پێویست نییە، چونكە ناوەرۆك لە نووسیندا گرنگە نەك فۆڕم، ئەمە لەلایەك، لەلایەكی دیكەوە هەمان قەبارە مانای چییە؟ ئاخۆ هەر كەسێك ڕۆژنامەنووسیش نەبێت، ئەوە نازانێت كە هەرگیز وەڵام و بەدواداچوونی ڕۆژنامەنووسی و ڕاستكردنەوەی ناوەرۆكی هەواڵ و بابەتێكی بڵاوكراوە لەسەر كەس و دەزگایەك، بەهەمان پیت، فۆنت و قەبارە و لە هەمان شوێن نابێت؟! چونكە ئەمە پەیوەندی بەلایەنی زمان و داڕشتن، ڕەهەندی واتایی وەڵامەكەوە هەیە و كە زۆرجار چەندین وردەكاری، بەڵگە و ئەرگۆمێنت پێویستن، تا بۆ ڕای گشتی ڕوونبكرێنەوە! بۆیە من زۆر بەلامەوە سەیرە، سەندیكا یاسایەك دەربكات كە مەبەستی هەر دەركردنی یاسایەك بێت، نەك لەڕووی بڕگە و ماددە و لایەنی واتاییەوە شرۆڤەی بۆ بكات.
وەڵام و بەدواداچوونی ڕۆژنامەنووسی، ڕەهەندی واتایی، ئاماژە و دەلالەتی گەیاندن لەخۆدەگرێت، بۆیە ئەم وردەكارییانە لەڕووی زمانەوە ئەوە دەسەپێنن كە هەرگیز نەتوانرێت، هەواڵێك، بەدواداچوون و وەڵامێكی ڕۆژنامەوانی، لەڕووی پیت و داڕشتنەوە لە بۆتە بدەیت، كە لە ڕاستیدا مەبەست لێی بەرتەسككردنەوەی سنوورەكانی ئازادی ڕادەربڕینە. لە بەشی پێنجەم، ماددەی هەشتەم خاڵی چوارەمدا هاتووە: (نووسین و بڵاوكردنەوە لەسەر كارەكانی فەرمانبەرێك كە ڕاسپێردراوە بۆ خزمەتی گشتی تاوان نییە ئەگەر لەچوارچێوەی ئەركی فەرمانبەری و خزمەتی گشتی دەرنەچێت) (4) سەندیكا لێرەدا، بە سیاسەتێكی دوالیزمی لە شێوەی ئەو پەندە كوردییەی كە دەڵێ لە ناڵ و لە بزماریش بدە، مامەڵە دەكات و ناڕاستەوخۆ سانسۆری كاری ئازادی ڕۆژنامەوانی، دەرخستنی گەندەڵی دەكات و بەربەست لەبەردەم سەربەخۆبوونی كاری ڕۆژنامەنووسی و بوێرییانەی ڕۆژنامەنووسان دادەنێت! بێگومان دەبێ بزانین، فەرمانبەری، سیفەتێكی كارگێڕی گشتییە، فەرمانبەر لەچوارچێوەی كاری وەزیفی خۆیدا، وەك فەرمانبەر مامەڵەی لەگەڵ دەكرێت و پەیوەندی و كارەكانی بە سیفەتی خزمەتی گشتی دەبینرێت، بۆیە كاتێ ڕۆژنامەنووسێك سەرپێچی و لادانێك، گەندەڵیی فەرمانبەرێك وەك هەواڵ ڕووماڵ دەكات و ئەرگۆمێنتی پێویست لەو بارەوە دەخاتەڕوو، ئەوا لێرەدا ڕۆژنامەنووس كارێك دەكات دەچێتە دەرەوەی خزمەتی گشتیی فەرمانبەرەوە كە خراپ سوودی لە پۆست و پایەكەی وەرگرتووە. ئیدی نازانم ڕۆژنامەنووس چۆن دەتوانی بەخۆپارێزییەوە كار لەسەر لادانی كارگێڕی، گەندەڵی و خەوشەكانی كاری فەرمانبەرایەتی بكات، ئەگەر هەر لەو سنوورە مایەوە، كە سەندیكا پێیوایە خزمەتی گشتییە و نابێ ڕۆژنامەنووس زانیاریی لەبارەوە بڵاوبكاتەوە؟! ئەمە وەك ئەوە وایە ڕۆژنامەنووسێك بە فەرمانبەرێك، یاخود بەرپرسێكی گەندەڵ بڵێت ( گەرچی دەزانم گەندەڵێكی گەورەی بەڵام هەواڵەكە ڕووماڵ ناكەم !) چۆن ڕۆژنامەنووس دەتوانێت لەنێو كاری گشتی و فەرمانبەریدا كاربكات و بێلایەنی و سەربەخۆیی و پیشەییبوونی خۆشی ون بكات؟ یاخود ئازادی ئەوەی نەبێت هەموو زانیارییەك بخاتەڕوو بەپاساوی خزمەتی گشتی و بەرژەوەندی گشتی، كە دوو لەو چەمكە داسەپاو و لاستیكییانەن كە لە ڕاستیدا بەرهەمی دەسەڵات و بەرژەوەندی گشتی حزبییانەن، نەك گشتی و نیشتمانییانە! خزمەتی گشتی و بەرژەوەندی نیشتمانی، دوو لەو چەمك و دروشمە فریودەرانەن، كە دەسەڵاتی كوردی لەدوای ڕاپەڕینەوە وەك پاساوی ئامادە بۆ سنوورداركردنی ئازادی ڕادەربڕین، سەربەخۆیی كاری ڕۆژنامەنووسی و كاری جەماوەرییانەش، بەكاریاندێنێت و سوودی لێدەبینێت لەپێناو سنوورداركردن و خەفەكردنی هەموو كارێكی ئازاد و دژە دەسەڵات، كەچی سەندیكاش دێت بێئاگایانە لەبری ئەوەی ئەو دوو چەمكە دابڕێژێتەوە، دێت لە پەراوێزی بەناو یاسایەكدا، ڕەوایەتی زیاتریان پێدەدات و ڕۆژنامەنووسان دیل و سندم دەكات و ناهێڵێت ئازادانە كاربكەن، كە ئەمە بەڕوونی لە بڕگە و ماددەكانی نێو ئەم یاسایەدا دیارە.
خەوشێكی دیكەی نێو ئەم یاسایە، لە ماددەی نۆیەمدایە، كاتێ مەرجەكانی سزادان و غەرامەكردنی سەرنووسەر و ڕۆژنامە و بڵاوكراوەكان بەبڕێك پارە دیاریدەكات لە ئەگەری بڵاوكردنەوەی ئەو هەواڵانەی كە زیان بە ئاسایشی گشتی دەگەیەنن، یان ئاشتەوایی كۆمەڵایەتی تێكدەدەن، یان سووكایەتی بە ئایین و ئاینزایەك دەكەن، یان بابەتێك زیان بە ڕێرەوی لێكۆڵینەوەی دادگا بگەیەنێت. لەو حاڵەتانەدا، سەرنووسەری بڵاوكراوەكە غەڕامە دەكرێت بەبڕێك پارە لەنێوان (یەك ملیۆن تا پێنچ ملیۆن دینار) دەبێت، بەڵام ئەو بڵاوكراوەیەی سەرپێچی لەو خاڵانە كردووە، كە لە بڕگەی یەكەمی ماددەی نۆیەم كە لە ڕێساكانی بڵاوكردنەوەدا هاتوون، ئەوا ڕۆژنامەكە بەبڕی (پێنچ ملیۆن تا بیست ملیۆن دینار) سزا دەدرێت ! بێگومان دیاریكردنی ئەو سزا قورسە لەڕووی ماددییەوە بۆ ڕۆژنامە، خۆی لەخۆیدا بەرتەسككردنەوەی بواری ئازادی چاپ و بڵاوكردنەوە و كاری ڕۆژنامەوانی ئازادە، چونكە هەموومان دەزانین، لە هەرێمی كوردستاندا، تەنها ڕۆژنامە ئازاد و سەربەخۆكان، هەواڵی ئازاد و تایبەت بە گەندەڵی و لادانی سیاسی و كۆمەڵایەتی و خەوشەكانی دەسەڵاتی كوردی بڵاودەكەنەوە! ئەمەش بۆ ئەوەیە، كە ڕۆژنامەنووسی ئازاد بواری ئەوەی نەبێت ئازادانە كاربكات، بۆیە سەندیكا، ئەو سزا قورسەی بۆ ڕۆژنامەكان دیاریكردووە.
گریمان ڕۆژنامەی ئازاد گەر سپۆنسەرێكیشی هەبێت، بەڵام بیست ملیۆن دینار لە كوێ بێنێت، تاكو وەك سزا بیبژێرێت كاتێ گریمان هەواڵ و بابەتێكی بەدەر لەو خاڵانەی بڵاوكردەوە، كە لە بڕگەی یەكەمی ماددەی نۆیەمی یاساكەدا هاتوون؟! هەموومان دەزانین، ڕۆژنامە ئازاد و سەربەخۆكان، ئۆرگانی حزبی نین، تا پارەی هەڵڕێژراویان هەبێت، ئیدی دیاریكردنی ئەو هەموو سزاو ڕێسایانە بۆیان مانای چییە، جگە لە سنوورداركردنی كاری ئازادانەی ڕۆژنامەوانی و فراوانكردنی ڕۆژنامەنووسی حزبییانە نەبێت، كە پێدەچێت سەندیكاش هەر ئەوەی بوێت؟! سەبارەت بە دەركردنی ڕۆژنامەش، ئەوا لە ماددەی سێیەم و لە بڕگەی دووەمدا هاتووە: (دەشێ هەر خاوەن بەرژەوەندییەك لە دەركردنی ڕۆژنامە ناڕازی بێت) ئەمەشیان لەڕووی واتاییەوە ناڕوونییەكی زۆری تێدایە. خاوەن بەرژەوەندی كێیە؟ بەرژەوەندییەكە گشتییە یان تایبەتی؟ بۆچی دەبێ هەر كەسێك هەستیكرد دەركردنی ڕۆژنامە زیان بە بەرژەوەندییە تایبەتییەكانی دەگەیەنێت، ئەوا ناڕازی بێت و لە دادگا، بەیاسا ڕێگە لە دەركردنی ڕۆژنامە بگرێت؟ مەگەر ئازادی و پەراوێزەكانی ئازادی لە كۆمەڵگە بەهادارتر و گرنگترن، یان بەرژەوەندی خاوەن كار و ئیشێك كە تەنێ دەسكەوتە تایبەتییەكانی خۆی بەلاوە مەبەستە؟ لە ڕاستیدا ئەمەش ڕێگرییەكی دیكەیە لە كاری ڕۆژنامەوانی.
دواجار دەڵێم ئەم یاسایە، پێویستی بە هەمواركردنەوەیە كە بەجۆرێك بێت لەخزمەت كاری ڕۆژنامەنووسی، بەتایبەتیش ئازاد دابێت، نەك كۆت و بەندی بكات و لە قالبی بدات !
پەراوێزەكان:
1- یاسای ڕۆژنامەگەری لە كوردستان، ژمارە 35 ، ساڵی 2007، ل 5.
2- ه - س - پ ، ل 8.
3- ه - س - پ / ل 9.
3- ه - س - پ.
4- ه - س - پ
