لیژنەی دارایی پەرلەمانی عێراق هۆشداری دەدات لە قووڵبوونەوەی قەیرانی مووچە و ڕایدەگەیەنێت کە حکوومەت مانگانە پێویستی بە نزیکەی حەوت تریلیۆن و هەشت سەد ملیار دینار هەیە بۆ دابینکردنی مووچە، لە کاتێکدا داهاتی نەوت بەهۆی سنوورداربوونی هەناردەی نەوتەوە زۆر کەم بووەتەوە.
لە بەرانبەردا، پەرلەمانتار جەمال کۆچەر پێشنیار دەکات کە چاپکردنی پارە خێراترین ڕێکارە بۆ دابینکردنی نەختینەی پێویست و دابینکردنی مووچە.
جەخت لەوەش دەکاتەوە کە پێشنیارەکەی وەزیری دارایی سەبارەت بە فرۆشتنی موڵک و ماڵی دەوڵەت بۆ چارەسەرکردنی قەیرانەکە بەس نییە و مەترسیی لەسەر فرۆشتنی ئەو سامانە بە نرخێکی کەمتر لە بەهای ڕاستەقینەی خۆیان هەیە. هەروەها داوا دەکات هەوڵەکان بۆ بەدواداچوونی گەندەڵکاران و گەڕانەوەی داهاتە دزراوەکان زیاتر بکرێن.