حزبی شیوعی کوردستان گردبوونەوەی ناڕەزایەتی سەرتاسەری دژی دۆخی نەخوازراو و دروستکراوی هەرێم ڕێکدەخات
ژووری هەواڵ
لە ژێر دروشمی (لە زاخۆ تا خانقین... بێدەنگ نابین)، لە سنووری مەڵبەندەکانی حزبی شیوعی کوردستان لە هەولێر، سلێمانی، کەرکوک، گەرمیان، سۆران، ڕاپەڕین، هەڵەبجە، دەشتی نەینەوا و عەنکاوە، زنجیرەیەک گردبوونەوەی ناڕەزایەتییان لەبەردەم بارەگاکانیان ئەنجامدا.
گردبوونەوەکان بە بەشداری هاوڕێ ئەبو کاروان سکرتێری کۆمیتەی ناوەندی و سەرجەم ئەندامانی مەکتەبی سیاسی و کۆمیتەی ناوەندی و سەدان لە ئەندامان، دۆستان، کەسوکاری شەهیدان، پێشمەرگەی دێرین، زیندانیانی سیاسی و ژمارەیەکی بەرچاو لە کەسایەتییە سیاسی، کۆمەڵایەتی، ئاینی، ڕۆشنبیری و چالاکوانانی مەدەنی بەڕێوەچوون.
حزبی شیوعی، لە بەیاننامەیەکدا، کە لە گردبونەوەکاندا بۆ ڕای گشتی خستیەڕوو، ئاماژەی بەوە کرد، کە ململانێی نێوان هەردوو حزبی باڵادەست ، پارتی و یەکێتی، بووەتە هۆی قووڵبوونەوەی سیاسەتی زۆنگەرایی، لاوازبوونی پێگەی هەرێم، خراپتربوونی بژێوی، کەمبوونەوەی خزمەتگوزارییەکان و زیادبوونی هەژاری و بێکاری.
لە کۆتایی ڕاگەیەندراوەکەدا، داوای لە هاووڵاتیان کرد، بە شێوازی مەدەنیانە فشار دروست بکەن بۆ یەکخستنەوەی دامەزراوەکانی حکومەت، پەرلەمان، پێشمەرگە، ئاسایش و دارایی. هاوکات داوای لە لایەنە باڵادەستەکان کرد، کێشەکان لەسەر مێزی گفتوگۆ چارەسەر بکەن و خزمەتگوزارییەکان بۆ خەڵک دابین بکەن.
ئەم ناڕەزایەتیەی ئەمڕۆ هەنگاوی یەکەمە و حیزبی شیوعیی کوردستان، لە بەرنامەیدایە لە داهاتوودا بازنەی چالاکی و ناڕەزایەتیەکانی خۆی فراوانتر دەکات و لە ڕێگەی جوڵاندنی شەقامەوە فشارەکان، بۆ چارەسەر کردنی قەیرانەکان چڕتر دەکاتەوە.