تۆڕە کۆمەڵایەتییەکان لەم سەردەمەدا بوونەتە بەشێکی دانەبڕاو لە ژیانی ڕۆژانەی هەر تاکێکمان و جیهانێکی گەورەیان لەناو شاشەیەکی بچووکدا بۆ کۆکردووینەتەوە، کە دەکرێت ببێتە سەرچاوەی زانست و پێشکەوتن، بەڵام لە هەمان کاتدا بۆ ئەو کەسانەی کە هۆشیاری تەواویان نییە و نازانن چۆن بە شێوەیەکی دروست مامەڵەی لەگەڵدا بکەن ڕێک وەک چەکێکی مەترسیدارە بەدەست کەسێکی نابیناوە، کە نازانێت ئاراستەکەی بەرەو کوێ دەگرێت و کێ بریندار دەکات، چونکە کەسی نابینا ناتوانێت مەترسییەکان ببینێت و بەبێ مەبەست زیان بە خۆی و دەوروبەری دەگەیەنێت. بەکارهێنەری ناهۆشیاریش لە تۆڕە کۆمەڵایەتییەکاندا بەبێ بیرکردنەوە و هەڵسەنگاندن هەموو زانیارییەک بڵاودەکاتەوە و دەکەوێتە ناو داوی هەواڵی ناڕاست و پروپاگەندەوە، کە دەبێتە هۆی تێکدانی شیرازەی خێزان و کۆمەڵگا هەروەها بەفیڕۆدانی کاتێکی زۆری بێ سوود لە سەیرکردنی بابەتی بێ مانا وا دەکات مرۆڤ لە ئامانجە سەرەکییەکانی ژیانی دووربکەوێتەوە و تووشی گۆشەگیری و خەمۆکی ببێت زۆر جار دەبینین بەهۆی بەکارهێنانی هەڵەی ئەم تۆڕانەوە ناوبانگی کەسانێک دەزڕێندرێت و نهێنییە تایبەتییەکانی ژیان دەبنە جێگەی باسی گشتی کە ئەمەش برینێکی قووڵ لە دەروونی تاکەکاندا جێدەهێڵێت، بۆیە زۆر گرنگە بەر لەوەی بچینە ناو ئەم جیهانە گریمانەییەوە چەکی زانست و هۆشیاری بەدەست بهێنین و فێری ئەوە ببین کە تۆڕە کۆمەڵایەتییەکان تەنها ئامرازێکن بۆ خزمەتکردنی مرۆڤ نەک ئەوەی مرۆڤ ببێتە کۆیلەی ئەوان و بە دەستی خۆی ژیانی خۆی و ئەوانی دیکەش وێران بکات، چونکە هۆشیاری تاکە گەرەنتییە بۆ پاراستنی خۆمان لە مەترسییەکانی ئەم جیهانە دیجیتاڵییە پڕ لە ئاڵنگارییە.
