چەند میدیایەكی فارسی نزیك لە سوپای ئێران بڵاویان كردەوە كە دوێنێ شەو لەنێو جەرگەی تاران رووبەرووبوونەوەی چەكداری روویداوەو لە چەند بازگەیەكدا بەسەر هێزە ئەمنیەكانی تارانیانداداوە و كوژراوێكی زۆر لە هێزە ئەمنیەكان هەیە.
ئاژانسی هەواڵدەریی فارس بڵاویکردەوە "لە هەندێک ناوچەی تاران پێکدادانی چەکداری روویداوە و بە درۆنیش هێرشکراوەتە سەر چەند بازگەیەکی هێزە ئەمنییەکانی وڵاتەکە".
بەپێی هەواڵی ئاژانسەکە، "لە هەردوو هێرشە درۆنی و رووبەڕووبوونەوە چەکدارییەکەدا، چەندین هێزی ئەمنی کوژراون، بەڵام تاوەکو ئێستا بە دیاریکراوی ژمارەیان نازانرێت".
شەممە، ٢٨ شوبات ٢٠٢٦ ئەمریکا و ئیسرائیل بە هاوبەشی هێرشیان کردە سەر ئێران، لە ئەنجامی هێرشەکە عەلی خامنەیی، رێبەری کۆماری ئیسلامیی ئێران و ژمارەیەک فەرماندە و بەرپرسی باڵای ئێران کوژران و هێرشەکانیش بەردەوامن لە بەشێکی زۆری ناوچە و شارەکانی ڕۆژهەڵاتی کوردستان و ئێران بۆ سەر بنکە و ناوەندە ئەمنییەکان، ئێرانیش بەردەوامە لە وەڵامدانەوەی هێرشەکان.
