هەمی ساڵێ، ٨ێ ئیلونێ ب ڕۆژا جیهانیا نەهێلانا نەخوێندەواریێ دهێتە هژمارتن. ئەڤ ڕۆژە ل ساڵا ١٩٦٦ێ ل لایێ ڕێکخراوا یونسکۆ هاتە دانان. ل ڤێ ڕۆژێدا چەندین چالاکی و بەرنامەیێن جۆراوجۆر ل لایێ ڕێکخراوا یونسکۆ و دەزگەهێن پەروەردەیی دهێنە ئەنجامدان.
ئامانجا ڤێ ڕۆژێ ئەوە کو هۆشیاری دەربارەی نەخوێندەواریێ و مەترسیێن وێ زێدەتر بهێنە بەڵاڤکرن و هەوڵێن زێدەتر بهێنە دان، داکو نەخوێندەواری ل تەڤایا جیهانێ کێم ببیت و بەرەف نەمانێ بچیت.
نەخوێندەواری کێشەیەکا مەزنە، چونکی ژیانا مرۆڤان تاری دکەت، شارستانیەتێ پاش دئێخیت و دبیتە ڕێگر ل پێشکەفتنا جڤاکی. تاکێ نەخوێندەوار ئەو کەسە یێ کو نەشێت ڤەخوینیت و بنڤیسیت.
زێدەباری ڤێ چەندێ، جڤاک ب خوێندن و زانینێ پێش دکەڤیت. خوێندەواری ژیانا مرۆڤان ڕوون دکەت و ژیانێ ب ساناهی دکەت. کەسێ خوێندەوار زانیاری و شیانێن پێدڤی بۆ ژیانێ هەنە و دشێت بساناهیتر ئاستەنگێن ژیانێ دەرباز بکەت.
لبەرهندێ، لسەر مە هەمییان پێدڤیە ڕێگریێ ل نەخوێندەواریێ بکەین و هەوڵێن زێدەتر بدەین، داکو ڕێژا نەخوێندەواریێ کێم ببیت و بەرەف نەمانێ بچیت.
ل دوماهیێ، نەهێلانا نەخوێندەواریێ بەرپرسیارەتییا هەمی جڤاکییە، چونکی خوێندەواری کلیلا پێشکەفتن و سەرکەفتنێیە، ژیانێ ڕوون دکەت و داهاتوویەکێ گەش بۆ جڤاکی پەیدا دکەت.
وەلید محەمەد سلێمان
سەرپەرشتیارێ پەروەردەیی
