ڕێگای كوردستان
بنیامین نەتەنیاهۆ، سەرۆک وەزیرانی ئیسرائیل، لە پەیامێکی فەرمیدا هۆشداریی توند دەدات و ڕایگەیاند، پێکهێنانی هەر حکومەتێک بە بەشداری یان پشتبەستن بە پارتە عەرەبییەکان قەدەغە و ڕێگەپێنەدراوە. هاوکات داوای لە سەرجەم لایەنە ڕاستڕەوەکان کرد کە ڕێگری لە دەستڕاگەیشتنی نوێنەرانی عەرەب بە هاوپەیمانیی دەسەڵات بکەن.
لە پۆستێکدا لە تۆڕی کۆمەڵایەتیی ئێکس، نەتەنیاهۆ بە توندی هۆشداریی داوەتە پارتە ڕکابەرەکانی ئیسرائیل لە هەر هەوڵێک بۆ دروستکردن و پێکهێنانی هاوپەیمانی لەگەڵ فراکسیۆنە عەرەبییەکاندا، چونکە پێیوایە ئەو پارتانە دژ بە بەرژەوەندییە باڵاکانی دەوڵەت و ئاسایشی نەتەوەیی کار دەکەن.
لە لایەکی ترەوە، پارتی لیکۆد بە سەرۆکایەتیی نەتەنیاهۆ، پارتە عەرەبییەکانی تۆمەتبار کردووە بە ئەنجامدانی پێشێلکاری و سەرپێچی لە کاتی بەڕێوەچونی هەڵبژاردنە گشتییەکاندا، داواش دەکات لێکۆڵینەوەیەکی بەپەلەی یاسایی لە ئەنجامی دەنگدانی ئەو سندوقانە بکرێت کە لە شار و ناوچە عەرەبییەکاندا دانرابوون.
فشار خستنە سەر ئۆپۆزسیۆن شارەزایانی کاروباری ئیسرائیل ئاماژە بەوە دەکەن کە ئەم هەڵوێستە توندەی نەتەنیاهۆ ئامانج لێی دروستکردنی فشارە لەسەر لایەنە ڕکابەرەکانی ئۆپۆزسیۆن تاوەکو دەستبەرداری هاوکاریی کورسیی عەرەبەکان ببن، و بەمەش دەرفەتی گەیشتن بە زۆرینەی پەرلەمانی بۆ پێکهێنانی کابینەی نوێ لە تل ئەبیب ئاڵۆزتر بکات.
نەتەنیاهۆ لە وتەکانیدا جەختیکردەوە و ڕایگەیاند: "پێکهێنانی هەر کابینەیەکی حکومی بە هاوبەشیی پارتە عەرەبییەکان قەدەغەیە، ئێمە ڕێگە بە هیچ هاوپەیمانییەک نادەین کە چارەنووسی دەوڵەت بخاتە دەست ئەو لایەنانەی بەردەوام دژایەتیی ئاسایشی نیشتمانیمان دەکەن."
پاشخانی هەواڵ: پارتە عەرەبییەکان لە هەڵبژاردنەکانی کێنێسێتدا ژمارەیەکی بەرچاو لە کورسییەکانی پەرلەمانیان مسۆگەر کردووە؛ ئەمەش وایان لێدەکات وەک فاکتەرێکی یەکلاکەرەوە و سەرەکی دەربکەون لە کێبڕکێی نێوان بەرەی دەسەڵات و ئۆپۆزسیۆندا بۆ بەدەستهێنانی زۆرینەی پێویست لەپێناو پێکهێنانی کابینەی نوێی حکومەتدا.
