هیوای كفری
یەكێك لە ئەركە گرنگەكانی حیزبی سیاسی ئەنجامدانی جووڵەی سیاسی و دروستكردنی ڕای گشتییە، بە پێ پرنسیپ و بڕواداری و ئایدولۆژیای ڕەوت و حیزبە سیاسیەكانیش جۆری جووڵەكان دیاری دەكرێت، واتا ئەو حیزبانەی جووڵە لە پێناو متكردنی توانای جەماوەر دەكەن جیاوازن لەو حیزبانەی جووڵە لە پێناو ئاراستەكردنی خەڵك دەكەن بۆ گۆڕانكاری، لە ئاستی ڕەوشتی سیاسیش جووڵەكانیش پێویستی بە دیدوبۆچوونی ڕوون و دیار هەیە، بۆ ئەوەی دید و بۆچوونەكەیش بگاتە ئامانجی ڕاستەقینەی خۆی، ئەو كات دەبێت ئامراز و شوێنی دیاریكراوی هەبێت بۆ جێبەجێكردنی، نەخشەڕێگای حیزبی شیوعیی كوردستان بەمەبەستی ئاراستەكردنی خەڵك بۆ گۆڕانكاری ئەنجامدراوە، چونكە هەرێمی كوردستان ماوەی چەندین ساڵە قەیران لەدوای قەیران تێدا سەرهەڵدەدات، لە لایەك قەیرانەكان دروستكراون و سوودی سیاسی بۆ چەند حیزب و لایەنی سیاسی هەیە، لە هەمان كاتدا دەرئەنجامی حكومڕانی چەندین ساڵەی حیزبە حكومڕانەكانی هەرێمی كوردستانن، كاریگەری لە سەر خەڵكی حیزبی دەسەڵاتدار و پارەدار نییە، بەڵكو گرفت و قەیرانی گەورەی بۆ هاووڵاتییان بە گشتی دروستكردووە، لە ناو هاووڵاتییانیشدا قەیرانەكان زیاتر كاریگەریان لە سەر چینی كرێكار، زەحمەتكێشان، هەژاران، بێكار، ئافرەتان ولاوانی دانەمەزراو و پەراوێزخراوەكانی كۆمەڵگا هەیە، حیزبی شیوعیی كوردستان لە یادی 33ی ساڵەی ڕاگەیاندنیدا، بە پشت بەستن بە بەرنامە و بەڵگەنامە پەسەندكراوەكانی كۆنگرەی (8)یەمینی خۆی و گەڕانەوە بۆ ڕای بەشێكی خەڵكی كوردستان، بە شێوەی ئەنجامدانی كۆڕ و كۆبوونەوەی فراوان، نەخشەڕێگای چارەسەركردنی قەیرانەكانی هەرێمی كوردستانی ڕاگەیاندن، ئەم جۆرە لە نەخشەڕێگایە لە لایەك گەڕانەوە بۆ ڕای خەڵك و لە لایەكی دیكەیش جێبەجێكردنی پرنسیبەكانی كاری رێكخراوەیی حیزبیە لە پەیڕەودا چەسپێندراوە، یەكێكە لە هەنگاوە گرنگەكانی گەڕانەوەی متمانەی خەڵك بە حیزبی سیاسی لە هەرێمی كوردستان لەبەر ئەوەی سیاسیەت كردن بۆ خزمەتی خەڵكە، دەبێت خەڵك چەقی ئەو پرۆسیە بێت، هەروەها حیزبی سیاسیش دەبێت متمانەی ئەو خەڵكەی متمانەی پێدەدەن نە بیفرۆشێت بە پلە و پۆست و نە یببەخشێت بە نەیارەكانی كاتی بانگەشەی هەڵبژاردنەكان، واتا وەكو خۆی بەرنامەی پێشكەشكراوی حیزبەكە جێبەجێ بكات.
نەخشەڕێگای حیزبی شیوعیی كوردستان تەنها وەک نووسینێك لە سەر لاپەڕەیەك، سوودی نابێت ئەگەر ئامرازەكانی گەیاندنی داواكارییەكان كاری لە سەر نەكرێت، ئامرازەكانیش بە تەنها بە حیزبی شیوعی و ئەندام و دۆستەكانی ناكرێت، بەڵكو دەبێت بانتاییەكی فراوانتری خەڵك لەوە تێبگات كە نەخشەڕێگاكە بۆچی پێشكەشكراوە، ئێستا نەخشەڕێگاكە ئامادەكراوە، خەڵك دەتوانێت خاوەندارێتی لێبكات و كاری لە سەر بكات، بۆ نموونەی ئەوەی باسكردنە لە كەمكردنەوەی نرخی پارەی كارەبا و ئاو، پێویستە سەرجەم خاوەن كارەكان و ئەوانەی زۆربەی زۆری ماندووبوونی ڕۆژانەیان، لە سەر كارەكانیان دەدەن بە حكومەت بۆ پارەی ئاو و كارەبا، لە رێگەی خۆپیشاندان و ناڕەزایی دەربڕینی ڕاستەقینە هەوڵی كەمكردنەوەی نرخ بدەن، ناڕەزایی ڕاستەقینە ئەوەیە خۆڕێكخستنی تێدا بێت لە رێكخراوی تایبەت و پەیوەست بوون و ئەندام بوون لە سەندیكاكان، نزیكبوونەوەیان لە هاوڕێیانێك كە ڕاستگۆن لە گەڵیاندا بۆ داكۆكیكردن لە مافەكانیان، هەروەها هەڵنەخەڵەتان بە قسەی بریق و باقی حیزبەكانی حكومڕان و زۆنێك زۆنێكی دیكە تاوانبار دەكات، چونكە هەردوو زۆن لە سەری ڕێككەوتوون كە بەمجۆرە بێت، نموونە فەرمانی گرتنی كەسێك لە زۆنێك ئەگەر زۆنەكە ڕای لە سەری نەبێت ناگیرێت، بۆ زۆنەكەی دیكەیش هەروەهایە، بەهێزكردنی كەرتی تەندروستی و كەمكردنەوەی تەواوی نەخۆشخانە ئەهلییەكان، پێویستی بە تێكۆشانی بەردەوام هەیە لە لایەن خەڵكەوە، خۆپیشاندانی بەردەوام و بێ بچڕاندنی لە بەردەم نەخۆشخانەكاندا، بە بەرنامەڕێژی و خاوەندارێتی و دروست كردنی دەیان لێژنەی سەرپەرشتیكردن، بە شەو و رۆژ بۆ ئەوەی حكومەت ناچار بێت بایەخ بدات بە كەرتی تەندروست، ونەخۆشخانەی حكومی بتوانرێت نەخۆش چارەسەر بكات، قەیرانی دیموكراسی و بڕوا نەبوون بە هەڵبژاردن و دواخستنی پێكهێنان سەرۆكایەتی پەرلەمان و دواتر حكومەتی هەرێمی كوردستان هەموو ئەمانە كاریگەری خراپی لە سەر ژیانی سەرجەم چین و توێژەكانی كۆمەڵگا كردووە، دەبێت بە هەموو توانایەك كاری بۆ بكرێت، مامۆستایان و فەرمانبەرانی هەرێمی كوردستان لە ئەوپەڕی خراپی مامەڵەی ئیداریدان، دواكەوتنی سەرەمووچە و بەرزە مووچە، پێویستی بە جووڵە هەیە بە هەموو شێوەیەك مافەكانیان فەوتاوە، نەخشەڕێگای حیزبی شیوعیی كوردستان بۆ خەڵكی كوردستان ئامرازێكی گونجاوە، بۆ ئەوەی تواناكان یەكبخرێت و لە خۆپیشاندان و ناڕەزایی دەربڕین و كۆڕ و كۆبوونەوەكاندا بەشداری بكەن، گەڕاندنەوەی خەڵك بۆ باشتركردنی ژیانی پێویستی بە هەنگاوی كردەیی و ڕەفتاری هۆشمەندانە و كرداری ژیرانە هەیە، خەڵك وەكو بەشێكی كارای هەڵسەنگاندن دەبێت، ئایا حیزبی شیوعیی كوردستان لە ئێستادا لە كار بۆ چی دەكات، كەی هەبووە لە بەرنامە و پلانی خۆی پشتی لە خەڵك كردبێت، نزیكبوونەوەی خەڵك لە نەخشەڕێگای حیزبی شیوعیی كوردستان كات و ساتی خۆیەتی بۆ ڕزگاربوون لە قەیرانەكان.
بێگۆمان خەڵك كاریگەری هەیە بۆ سەرخستنی نەخسەڕێگای حیزبی شیوعیی كوردستان، لە پاڵ ئەمەشدا پێویستی بە هاوپەیمانی فراوانی حیزبە سیاسیەكانی هەرێمی كوردستان هەیە، بە جۆرێك هەوڵی دروستكردنی هێڵی سێیەم بدرێت لە دەرەوەی ئەو هێزانەی دابەشبوون بە سەر ڕەش و سپی هێزی خۆڵەمێشی هەبێت و پشتگیری لە بۆچوون و داواكاری ڕەوای خەڵكی كوردستان بكات، لە ئێستادا حیزبی شیوعیی كوردستان وەكو ئەركی سیاسی خۆی نەخشەڕێگای خستووەتەڕوو، ئەوەی ماوەتەوە حیزبەكانی دیكەی هەرێمی كوردستان دەستپێشخەری بكەن و فراوانی بكەن، چی بە دروستكردنی بەرە یاخود بە پێشنیاری زیاتر بۆ خزمەتی دۆخی كوردستان، هەموو ئەو كاریگەرییە نێودەوڵەتی و بەرنامەی تایبەتی حیزبی و تەنانەت بۆچوونی جیاوازی هزریش وازلێبێنن بۆ ئەوەی خزمەت پێشكەش بكەن، دەبێت لە پێوانەی هەڵبژاردن دووربكەونەوە و كەس بە كورسی هەڵبژاردن مامەڵە نەكات،چونكە دەزانرێت چۆن هاتووە و چۆن دابەشكراوە، ئەوە خراپترین ڕووداوە سیاسیەكانی هەرێمی كوردستانە.
لە ئاستی رێكخراوەكانی مافی مرۆڤ و رێكخراوەكان داكۆكیكاری لە مافی خەڵكیش پێویستە جووڵەبكرێت بە ئاراستەی هاندانی شەقام بۆ چارەسەركردنی قەیرانەكان و نەخشەڕێگای حزبی شیوعی كوردستان بنەمای كاركردنیان بێت، چونكە مەبەستی كۆمەڵگایی لە پشتە و هیچ پەیوەندی بە مەبەستی هزری و سیاسی دیاریكراو نییە، دیدگایەكی لۆژیكی ڕوون و ئاشكرایە بۆ دەربازبوون لە قەیرانەكان كە بەرۆكی هەرێمی كوردستانی گرتووە، گرنگیدان ئەركی هەمووانە و پێویستی بە هەنگاوی كرداری هەیە.
گۆڕانكارییەكانی ژیانی تاك و كۆمەڵگایش بە هەنگاوەكانی نووسینی پرۆژە و دیاریكردنی ئامرازەكان و ڕوونكردنەوەی نەخشەڕێگا و پرۆژەكە و جیبَەجێكردنی بەرهەم دێت، كۆمەڵگای كوردستانی بە بۆچوونی من لە ئێستادا پێویستی بە دیدی هاوبەش و دەستباری گشتی كۆمەڵگا هەیە، ئەگەر نا ئەو قەیرانانە هۆكاری لە دەستدانی زۆرێك لە بەدەستهاتووەكانی ڕابردوو دەبێت، هەموومانیش زیانمان بەردەكەوێت.
