نووسینی/ زیرەک کەمال
نەتەوە و گەلانی زیندووی جیهان، ئەوانەی لەناو چەقی ژیان و مێژوودان، کە تووشی ڕووداو و کارەساتی مەزن دەبن، هەموویان لە یەک بەرە و یەک سەنگەر کۆدەبنەوە. مامۆستا، ئەندازیار، بزیشک، جوتیار، شاعیر ،پیاوی ئاینی، حکومەت، ئۆپۆزسیۆن.... هەموویان دەست دەکەنە ملی یەکتری و ڕووبەڕووی قەیڕان و کارەساتەکان دەبنەوە. بەداخەوە بە پێچەوانەی ئەوە، لای ئێمەی کورد هەر کارەسات و تراژیدیایەک ڕوو لە کورد دەکات، بەشێکی زۆری گەلەکەم دابەش دەبن بەسەر چەندان بەرە و یەکە و سەنگەری جیاواز.
سوپای (ئەحمەد شەرع)ی سەرۆکی سوریا، لەو چەند ڕۆژە هێرشی بۆ سەر کورد و ڕۆژئاڤای کوردستان دەست پێ کرد، لە جیاتی ئەوەی( بیدیه، بلسانه، بقلبه) یەک دەنگ و یەکڕەنگ پاڵپشتی خوشک و براکانمان بین لەڕۆژئاڤا، بەداخەوە لەوەش جیاواز دەرکەوتین. ئەگەرچی ڕاستە ئەو کارەساتانەی لەو شەڕە بەسەر کورد هاتووە بەشی هەرەزۆری گەلی کوردی خستە ناویەک سەنگەر، بەڵام ئەو کوردانەش کەمن نەبوون، کە پاڵپشتی خۆیان بۆ سوپای عەرەبی سوریا نیشاندا. نەک هەرئەوە تۆڕەکۆمەڵایەتییەکان پڕ بوون لەو پۆست و نووسینانەی، ئایا شەڕڤانانی کورد کە بەرگری لە خاک و نەتەوە دەکەن شەهیدن یان نا؟
دیارە ئەو کەسانەی لە فۆڕم و قەناعەتی ئایینیەوە شەڕڤان بە شەهید نازانن، پێویستە بگەڕێنەوە بۆ مێژوو، تا ئەو ڕاستیانە بزانن، کە شۆفینیزمی نەتەوەی سەردەست لە هەرچوار کەنار، نەک بڕوای بە مافەکانی منی کورد نییە، بەڵکوو بڕوای بە مزگەوت و موسڵمانبوونی منی کوردیش نیە. لای بەشی هەرە زۆری شۆفینیزمی عەرەب و فارس و تورک، پەنجەیەکی مولحید و بێباوەڕێکی خۆیان بە سەری هەزار مەلا و زانای ئایینی کورد ناگۆڕنەوە. تۆ سەیرکە، کە ڕژێمی بەعس هەڵەبجەی کیمیاباران کرد و پێنج هەزارکەسی شەهیدکرد، بەشی زۆری ئەو شەهیدانە تازە لە نوێژی جەماعەت گەڕابوونەوە و بەشیێکی زۆریشیان لەسەر بەڕماڵ بوون و خەریکی نوێژکردن بوون، ئایا ئەوان حیسابیان بۆ ئایین کرد؟ بەعس بە دروشم و بەرزکرنەوەی ناوی ئەنفال وەکوو ئایەتێکی قوڕئان، سەد و هەشتا و دووهەزار ڕۆڵەی کوردی ئەنفال کرد. لەناو ئەنفال کراوەکان هەزاران حاجی عەوڵاو، خاڵە حەمە، دادە ڕەعنا، باجی ئامین و پلکە ئایش هەبوون، کە تەسبێحی سەدویەک دنکیان لە گیرفان بوو، بۆ زکر و تەهلیلە و بێژمار زیکر و ختمیان بەو تەسبێحانە کردووە، ئایا ئایین بووە پرسوباس تا کەمێک بەزەییی بنوێنن؟ لە شازدەی ئوکتۆبەر لەشکری شیعەی عێڕاق پەلاماری کوردستانیدا، داعش کە بزاڤێکی سووننە مەزهەبە پاڵپشتی شیعەکانی کرد و لە گەرمەی شەڕەکە، چونکە دژی کورد بوو. هەمان کات چالاکیەکانی خۆی دژی لە شکری شیعە ڕاگرت. لە کاتێکدا دووژمنی باوەکوشتەی یەکتری بوون. هەر گروپی داعش تەکفیری مامۆستا (سەڵاحەددین)ی ئەمینداری یەکگرتوو و (مامۆستا عەلی باپیر)ی ئەمیری کۆمەڵی دادگەری و سەرجەم ئیسلامییەکانی کوردستانیان کرد، بەس لەبەرئەوەی کوردبوون. ئەوان تەنیا یەک کات ئایین دەهێنە ناوباسان، کە ئیشیان پێبێ و بمانخەڵەتێنن و سۆزی خەڵک بجووڵێنن تا نەتەوە و خاک ژێرپێ بخرێ و ئەوانیش بە سەردەستی بمێننەوە. ڕوو دەکەمە هەموو لایەک: کاکی نەتەوەیی، هاوڕێی چەپ، برای لیبراڵی و مەلا و مامۆستای ئایینی، برای حزبی، خاڵۆی بێلایەن، مامە و کاکەی ڕۆشنبیر دڵنیابە لە ڕوانگەی فاشیزمی نەتەوەی سەردەست، تۆ کوردی و بەس، ئێ لای ئەو، لە بیرکردنەوە و ڕوانینی ئەو کورد نە خاوەن مافە و نەموسڵمانە، بۆیە تا زووە کوردستان بکەنە سەنگەری برایەتی وبەرگریکردن لە ماهییەتی نیشتیمانی خۆتان و ئەو جیاوازیە فیکری و سیاسییانەشی کە هەتانە، بیخەنە چوارچێوەیەکی عەقڵانی و جیای بکەنەوە لە یەکڕیزی و پرسی کوردبوون، ئێمە دەبێت، کە باس دێتە سەر کوردبوون بەرامبەر تورک و عەرەب و فارس لە منداڵێکەوە تا مامەپیرەیەک پشتگیر و پشتوپەنای یەکدی بین.
