رێگای كوردستان
دوای ئەوەی هەفتەی ڕابردوو لە یەکەمین چرکەساتەکانی دەستپێکردنی جەنگی ئەمریکا و ئیسرائیل بۆ سەر ئێران، عەلی خامنەیی ڕابەری باڵای ئێران کوژرا، دۆخێکی ئاڵۆزی سیاسی و سەربازی باڵی بەسەر ناوچەکەدا کێشا.
سەرەڕای ئەوەی دۆناڵد ترەمپ بەردەوام جەختی لەوە دەکردەوە کە خۆی ڕابەری نوێی ئێران دیاری دەکات، یان لانیکەم بەبێ ڕەزامەندی ئەو هیچ کەسێک بۆ ئەو پۆستە هەڵنابژێردرێت، بەڵام دوێنێ ئێرانییەکان گوێیان بەم هەڕەشانە نەدا. لە بڕیارێکی چاوەڕواننەکراودا، موجتەبای کوڕی عەلی خامنەیی وەک ڕابەری نوێی وڵاتەکە دیاری کرا.
ئەم پێشهاتەش وای لە ترەمپ کرد لە کاردانەوەدا تەنها بە یەک ڕستە وەڵام بداتەوە، (بزانن چی ڕوودەدات)؟.
لەم بارەیەوە، چاودێرانی سیاسی پێیان وایە ئەم بڕیارەی تاران پەیامێکی ڕوونی بەرەنگاربوونەوە و تەسلیمنەبوونە بە واشنتۆن.
شرۆڤەکاران دەڵێن هەڵبژاردنی موجتەبا خامنەیی، کە کەسایەتییەکی خاوەن هەژموونە لەناو سوپای پاسداران و دەزگا ئەمنییەکاندا، بە واتای بەردەوامبوونی هەمان ئاراستە و سیاسەتی توندی باوکی دێت.
ئەم هەنگاوە هەوڵێکی خێرایە بۆ پڕکردنەوەی بۆشایی دەسەڵات و پاراستنی یەکڕیزی ناوخۆیی لەم قەیرانەدا.
لە بەرامبەریشدا، کاردانەوە کورتەکەی ترەمپ لەلایەن چاودێرانەوە وەک ئاماژەیەک بۆ قۆناغێکی نوێی جەنگ و هێرشی وێرانکەرتر لێکدەدرێتەوە.
سەبارەت بەوەی دۆخەکە بەرەو کوێ دەڕوات، شارەزایانی ستراتیژی پێشبینی دەکەن لە چەند ڕۆژی داهاتوودا ئاستی پێکدادانەکان پێ بنێتە قۆناغێکی زۆر مەترسیدارترەوە.
چاوەڕوان دەکرێت ئەمریکا و ئیسرائیل کاردانەوەی سەربازیی قورسیان هەبێت و ڕاستەوخۆ سەرکردایەتییە نوێیەکە و دامەزراوە هەستیارەکان بکەنە ئامانج.
لە بەرامبەریشدا، ئەگەر زۆرە ئێران تەواوی هێزە وەکالەتییەکانی لە ناوچەکەدا بجوڵێنێت و ناوچەکە بەتەواوی لە لێواری جەنگێکی هەمەلایەنەدایە کە ڕەنگە نەخشەی سیاسیی ڕۆژهەڵاتی ناوەڕاست بەتەواوی دابڕێژێتەوە.
