نووسەر و توێژەر، ڕابەر تەڵعەت، لە وتارێکی شیکاریدا تیشک دەخاتە سەر دۆخی سیاسیی هەرێمی کوردستان دوای کاراکردنەوەی پەرلەمان لەلایەن پارتی دیموکراتی کوردستانەوە بە لۆژیکی زۆرینە، هاوکات سێ کارتی سەرەکیی یەکێتیی نیشتمانیی کوردستان و مەترسییەکانی بەردەم قەوارەی هەرێم دەستنیشان دەکات.
ڕابەر تەڵعەت ئاماژە بەوە دەکات کە دوای هەنگاوەکەی پارتی، یەکێتی کەوتووەتە بەردەم وێستگەیەکی چارەنووسساز و چاوەڕوان دەکرێت مەکتەبی سیاسیی ئەو حزبە کۆببێتەوە. بە بڕوای ئەو توێژەرە، لەم هاوکێشەیەدا یەکێتی خاوەنی سێ بژاردە و کارتی سەرەکییە بۆ مامەڵەکردن لەگەڵ دۆخەکە:
1. پەنابردن بۆ دادگای فیدراڵیی عێراق: بە مەبەستی هەڵوەشاندنەوەی دانیشتنەکەی پەرلەمان، بە پاساوی پێشێلکردنی بنەمای تەوافوق.
2. مامەڵەی ڕاستەوخۆ لەگەڵ بەغدا: هەوڵدان بۆ جیاکردنەوەی دارایی و کارگێڕیی سلێمانی لە ڕێگەی ڕێککەوتنی ڕاستەوخۆ لەگەڵ حکومەتی فیدراڵ بۆ پرسی مووچە، بودجە و هێزە ئەمنییەکان.
3. کارتی وزە و جوگرافیا: بەکارهێنانی پێگەی جوگرافی و وزە، بەتایبەت کێڵگەی غازی کۆرمۆر، وەک ئامرازێکی گوشار لە دانوستانەکاندا.
لە بەرامبەردا، ئەو نووسەر و توێژەرە باسی لە خاڵە بەهێزەکانی پارتی کردووە و دەڵێت: "پارتی خاوەنی شەرعییەتی زۆرینەی پەرلەمانی، کۆنترۆڵکردنی پایتەخت، دەروازە بازرگانییەکان و پشتیوانیی نێودەوڵەتییە بۆ مانەوەی هەرێم بە یەکگرتوویی؛ دەیەوێت لەم ڕێگەیەوە یارییەکە بکاتە ئەمری واقیع و یەکێتی ناچار بکات بە مەرجی نوێوە بگەڕێتەوە بۆ حکومەت."
لە کۆتایی شیکارییەکەیدا، ڕابەر تەڵعەت هۆشداری لە دەرئەنجامە مەترسیدارەکانی ئەم ململانێیە دەدات و ڕایدەگەیەنێت، ئەم یارییە مەترسیی لەسەر قەوارەی هەرێم دروست کردووە؛ چونکە ئەگەر پارتی بەتەنیا حکومەت پێکبهێنێت، شەرعییەتی سەرتاسەری لەدەست دەدات و دەسەڵاتەکەی لە هەولێر و دهۆک کورت دەبێتەوە، یەکێتیش ئەگەر سلێمانی بخاتە باوەشی بەغداوە، سەربەخۆیی حزبی و دارایی خۆی لەدەست دەدات.
ئەو توێژەرە جەخت دەکاتەوە کە لەم هاوکێشەیەدا نە هەولێر و نە سلێمانی براوە نین، بەڵکو براوەی سەرەکی حکومەتی بەغدایە، کە ئێستا دەرفەتی ئەوەی بۆ ڕەخساوە بە بەرگێکی یاساییەوە خەونی کۆتاییهێنان بە قەوارەی فیدراڵیی هەرێمی کوردستان بهێنێتە دی.
