هەردوو سیناتۆری ناسراوی ئەمریکی، لیندزی گراهام (کۆماری) و ریچارد بلومێنتاڵ (دیموکرات)، پڕۆژەیاسایەکی هاوبەشیان لەژێر ناوی "Save the Kurds Act" (یاسای پاراستنی کوردان) پێشکەشی ئەنجومەنی پیران کرد.
ئەم هەنگاوە لە کاتێکدایە کە گۆڕانکارییە سیاسی و سەربازییەکانی سووریا نیگەرانیی لای بەشێک لە بەرپرسانی واشنتۆن دروست کردووە سەبارەت بە چارەنووسی هاوپەیمانەکانیان.
ئامانجی بنەڕەتیی ئەم پڕۆژەیاسایە، دەستەبەرکردنی ئاسایش و مانەوەی هێزەکانی سووریای دیموکرات (هەسەدە) یە وەک هاوبەشێکی سەرەکیی ئەمریکا لە شەڕی دژی داعشدا.
پڕۆژەیاساکە داوا دەکات کە ئیدارەی ئەمریکا پابەند بێت بە پاراستنی ناوچەکانی ژێر دەسەڵاتی هەسەدە لە هەر هێرشێکی دەرەکی یان هەڕەشەیەک کە لەلایەن حکومەتی نوێی سووریاوە بێتە ئاراوە.
بەشێکی گرنگی یاساکە تایبەتە بە سەپاندنی سزای دارایی و سیاسیی توند. ئەم سزایانە تەنها سەرۆکی سووریا و وەزیرەکان ناگرێتەوە، بەڵکو دەست دەخاتە سەر هەر لایەنێکی بیانی یان وڵاتێک کە هاوکاریی سەربازی، تەکنیکی یان دارایی پێشکەشی حکومەتی سووریا بکات.
بلۆککردنی سەرمایە و دارایی ئەو کەسایەتییانەی دەستیان لە توندوتیژی دژی کوردان و کەمینەکاندا هەبێت.
ئەم پڕۆژەیاسایە وەک وەڵامێکی پێشوەختە بۆ هەر ئەگەرێکی کشانەوەی هێزەکانی ئەمریکا یان تێکچوونی هاوسەنگیی هێز لە سووریا دەبینرێت.
یاساکە داوای ڕاپۆرتی دەوری لە وەزارەتی دەرەوەی ئەمریکا دەکات سەبارەت بە دۆخی مافی مرۆڤ لە ناوچە کوردییەکان.
جەخت لەسەر ئەوە دەکاتەوە کە نابێت هیچ پەیوەندییەکی دیپلۆماسی یان هاوکارییەکی ئاوەدانکردنەوە لەگەڵ سووریا هەبێت، هەتا ئەو کاتەی گەرەنتی پاراستنی پێکهاتەکان نەدرێت.
