محمد خۆشکانی
تەماشامان دەکەن بەڵام ناخوێننەوە !
کاتێک ( ڕووخسار ) دەبێتە پردی پەڕینەوە و ( عەقڵ ) پشتگوێ دەخرێت
لەم سەردەمی خێرایی و سۆشیاڵ میدیایەدا بەهاکان تووشی جۆرێک لە سەرەوژێربوون بوونەتەوە کاتێک بابەتێکی گرنگ زانستی یان شیعرێکی قووڵ بڵاودەکەیتەوە و وێنەیەکی گشتی یان گوڵێکی لەگەڵ دادەنێیت تێپەڕینی خەڵک بەسەریدا وەک تێپەڕینی شەمەندەفەرە بە لای وێستگەیەکی چۆڵدا بەڵام هەر کاتێک هەمان بابەت لەگەڵ وێنەیەکی شەخسی خۆتدا بڵاودەکەیتەوە لایک و کۆمێنتەکان لافاو ئاسا دێن .
ئەمە چیمان پێ دەڵێت؟
مرۆڤی هاوچەرخ تەمەڵ بووە لە خوێندنەوە چاوەکان تەنها ڕادەهێنرێن لەسەر بینینی ڕووخسار و دیمەنە خێراکان بابەتێکی سوودبەخش پێویستی بە تێڕامان و کات هەیە کەچی زۆربەی بەکارهێنەران تەنها دەیانەوێت بە چرکەیەک لایک بکەن و بڕۆن .
خەڵک لە سۆشیاڵ میدیادا زیاتر بەدوای کەسەکاندا دەگەڕێن نەک بیرۆکەکان کاتێک وێنەی خۆت دادەنێیت لایەنی سۆزداریی لای بەرامبەر دەجووڵێت (جا لەبەر ناسیاوی بێت یان دۆستایەتی یان تەنانەت چاوپێکەوتنێکی سادە) ٠
بۆیە کاردانەوە نیشان دەدەن نەک لەبەر ئەوەی بابەتەکەیان خوێندبێتەوە ٠
ئەم دیاردەیە بەڵگەیەکی حاشاهەڵنەگرە لەسەر ئەوەی کە کۆمەڵگە بەرەو ڕووکەشگەرایی هەنگاو دەنێت گرنگی بە کێ وتی ؟ دەدرێت نەک چی وترا ؟
ئێمە لە سەردەمێکدا دەژین کە پۆشاک و ڕووخسار زیاتر لە مێشک و هۆشیاری کڕیاری هەیە خەڵکی زیاتر سەرسامن بەو پەنجەرەیەی لێیەوە دەڕوانن (کە وێنەکەیە) نەک ئەو دیمەنە بەپێزەی لەپشتی پەنجەرەکەوەیە (کە بابەتەکەیە) ٠
