هیوا عومەر
بەشی یەكەم
بە بەراود بە سەدەكانی پێشوو، كۆمەڵگەی مرۆڤایەتی و هەرێمی كوردستانیش لەبەردەم گۆڕانكارییەكی پێكهاتەیی تەواو جیاوازدان. ئەم گۆڕانە پێكهاتەییە لە ژێرخانی ئابووریەوە بۆ سەرخان لە تەكنەلۆژیای تازە و زیرەكیی دەستكردەوە تاوەكو فۆڕم و نۆڕمە تازەكانی ژیان بەو ئاراستەیە خزمەتی پڕۆژەی ئەمڕۆی نیولیبرالیزم بكات .
لەمڕۆدا بە پلەی یەكەم مرۆڤ و عەقڵی مرۆڤ لەبەردەم هەڕەشەیەكی گەورەدایە، هیچ مانایەك بۆ بەها و ژیانی ڕاستەقینە نەماوەتەوە. وەك فەیلەسووف ئالان دونۆ لە كتێبی "سیستەمی هیچوپووچی"دا ئاماژەی پێداوە و مەبەستی ئەو قۆناغی ئەمڕۆی سەرمایەدارییە لە فۆڕمی نیولیبرالیزم، كە جۆرێكی نوێی كۆیلایەتییە بەشێوەی مۆدێرنانە، لەناو سیستەمی مۆدێرنیتەی سەرمایەداریدا.
پێشتریش ماركس ئاشنامانیكردووە بە لێكەوتەكانی سیستەمی سەرمایەداری لەسەر گۆڕینی بەها ڕوحی و ئایینی و كۆمەڵایەتییەكان، بۆ بەهای ماددی ڕووت لە چوارچێوەی پڕۆسەی بەكاڵابووندا. سەردەمی ئەمڕۆ لەگەڵ هەڵكشانی ناوەندی پەراوێزخراوەكان، دۆخێكی شڵەژاوی دروستكردووە بەهۆی زۆریی زانیاری ساختە و گواستنەوەی خێرای لە ڕێگەی سۆشیال میدیاوە. هەروەها، نقومبوونمان لە چێژی كاتی تێپەڕ، هیچ بوارێك بۆ بیركردنەوە و مانەوەی پرەنسیپ و بیروباوەڕێك نەهێشتووەتەوە، كە مرۆڤ بتوانێت تەنانەت خەونیش بە بوون و بوونیادنانی ژیانێكی باشتر ببینێت.
ئەوەی بە پلەی یەكەم ئامانجە لەم ژیانە ناهاوسەنگەدا، هێرشكردنە سەر بیری دادپەروەری و یەكسانیخوازییە، بۆ ئەوەش فكری چەپ و پێشكەوتنخوازی و كۆمۆنیستی بەئامانجگیراوە، ئەوەش تاكە ڕێگایە بۆ سەرخستنی پڕۆژەی نیولیبرالیزم و بەكاڵاكردنی هەموو شتێك لەسەر حیسابی مافە ئابووری و كۆمەڵایەتی و سیاسییەكان.
ئەگەر ئەوە بەشێكی تابلۆ گشتییەكەی دۆخی دونیا بێت، لە ناوەوەی كوردستان تابلۆ سیاسی و ئابووری و كۆمەڵایەتی و كلتوورییەكە پێویستی بە تەماشاكردنێكە، كە لە دەرەوەی گۆشەیەكی تابلۆكەدا بێت. بۆ ئەوەی بتوانین واقعی ژیان و تایبەتمەندیی دۆخی خۆمان و سروشتی دەسەڵاتی سیاسی و ئابووری و ئەو هێزانەشی كە هێزی ئۆلیگارشی تازەن لەگەڵ ئەوەشدا بزانین هێزی تازەی گۆڕانكاری سیاسی و ئابووری و كۆمەڵایەتیش هەن بۆ ئەمانە، بە تێگەیشتنی كۆن ناتوانین بیانبینین لە كاتێكدا ڕۆژانە لەبەردەم دەرگاكانماندان.
لەم دۆخی قەیران و بێ ئەرزشكردنی فكر و كاری ڕێكخراوەیی و حزبی و پێكەوەییەدا، بۆ ئەوەی كۆمەڵگە لە دۆخی بێهیوایی و بەشداریی سیاسی ڕاستەقینە بمێنێتەوە، ئەركی ئێمە زۆر قورس و گرانە. ئێمە پێشتر بەئاسانی لە ڕێگەی دووربینێكەوە دەمانتوانی سەنگەری شەڕ بەڕوونی ببینین، لەو بارەیەشەوە ئەزموونی زۆرمان كۆكردەوە، بەڵام كاتێك هاتینە ناو شار و ژیانی نوێ، سەنگەرەكان جیاواز بوون، بەڵام ئێمە هەر دووربینە كۆنەكەمان لەدەستبوو، ئەوەش وایكردووە لە خوێندنەوەی واقیعی تازەدا، زۆرجار ڕووبەڕووی جۆرێك لە لێڵی ببین.
پرسە تازەكان چین، ئەركە هەنووكەیی و دوورمەودامان چین؟ ستراتیژیەتی كار و پلانی كاركردنمان دەبێت چی بێت بۆ ئەوەی بە متمانەیەكی بەهێزتر بگەڕێینەوە؟ ئەمانە دەبنە چوارچێوەی بەشەكانی تری ئەم زنجیرە وتارە.
