بۆ ئەوەی چارەسەری هەر نەخۆشییەک بکرێت، بێگومان پێویسته سەرەتا دەستنیشان بکرێت، ئەم حاڵەتە نەک تەنها بۆ نەخۆشی دەرونی و جەستەیی مرۆڤ، بگرە بۆ چارەسەری هەر کێشەیەکی بونیادی حوکمرانیش پێویستە.
سەرەڕای ئەوەی دەسەڵاتی هەرێم خۆی باش دەزانێت لە چ قەیرانێکی قوڵدایەو نەخۆشیەکەی ئەوەندە کوشندەیە خەریکە توشی لاڕەشەی دەکات و بەرە لێواری مەرگی دەبات، بەڵام دەسەڵاتداران ئەوەندە خۆ بەزلزانن، فۆبیایان بە بیستنی ناوی نەخۆشیەکەیان و چارەسەری هەیە!
حکومەتە پێشکەوتووەکانی دنیا بە پێچەوانەی دەسەڵاتی هەرێم، خۆپیشاندان و ناڕەزایی و داخوازیەکانی خەڵک ( وەکو ئاوێنەیەک تەماشا دەکەن بۆ بینینی سەر و شکڵی خۆیان تیایدا) بۆ ئەوەی ئەگەر لە شوێنێک ئاڵۆزی و قەیران هەبێت چارەسەری بکەن و ڕێکیبخەنەوە، بەم میکانیزمەش سەرکەوتوو بوون، کەچی دەسەڵاتی هەرێم لە جیاتی سوود وەرگرتن لەو نموونە حوکمرانیەی ئاماژەمان پێدا، بەداخەوە چەندین ساڵە هەوڵی شکاندنی ئاوێنەکە دەدەن!
یەکێک لە نموونەکان، خۆپیشاندانی مەدەنی و ئاشتیانەی ٥ /۲ی مەڵبەندی هەولێری حزبی شیوعی کوردستان بوو ، کە بڕیار بوو هاوڕێیانمان بە مەبەستی پێشکەشکردنی یاداشتنامەیەک لە داخوازیەکانی خەڵک، لە بەردەم مەڵبەندی هەولێری حزبمانەوە، بەرەو ئەنجومەنی وەزیران بەڕێکەون.
بەڵام وەک بینیمان، چواردەوریان بە ئاسایش و پۆلیس گەمارۆ درا..!
سەرەڕای ئەوەی حزبە دەسەڵاتدارەکان خۆیان باش دەزانن، مێژووی چەندین ساڵەی حزبی شیوعی تژیە لە خەمخۆری و قوربانیدان بۆ گەل و نیشتمان و داستانی قارەمانانە، ئەو حزبە تێکۆشەرە بە درێژایی مێژوو لە ریزی پێشەوەی داکۆکیکردن لە مافی خەڵک و خاک بووە، لەو پێناوەش سەدان و هەزاران شەهیدیان داوە و شانازی ئەوەیان بەرکەوتوە بە حزبی تێکۆشەران و شەهیدان بناسرێن.
هاوکات کاریگەرییان هەبووە لە پاراستنی ئاشتی و ئازادی لە کوردستان و عێراق و ناوچەکانی تریشدا، تا ئێستاش حزبی شیوعی پێی وایە باشترین ڕێگا بۆ گەیشتن بە دادپەروەری کۆمەڵایەتی تێکۆشانی مەدەنی و ڕێگای ئاشتیانەیە.
ئەو ترسەی دەسەڵات لە جوڵانەوەی شیوعیەکان و ئازادیخوازان بۆ؟
بێگومان لە مێژووی دەسەڵاتە دیکتاتۆرەکان ترس لە فراوان بوونی خۆپیشاندانی ئاشتیانە و رێگاچارەی دیموکراسیانە هەبووە.
ئاشکرایە دەسەڵاتی خۆسەپێنەری هەرێم بە میکانیزمی چەوت و سیاسەتی پاوانخوازیی، دژی پرنسیپی دیموکراتی و پەروەردەی هۆشیاری وەستاوەتەوە.
بە مێتودی ترس و تۆقاندن و کوشتن و گرتن و نان بڕین و ڕاوەدونان و نەهێشتنەوەی هیچ زەمینەیەک بۆ خۆشگوزەرانی، هەوڵیانداوە ئازادی و ئازادی ڕادەربڕین بەرتەسک بکەنەوە!
بەڵام لە گەڵ ئەوشدا ، نەیانتوانیوە و ناتوانن دەنگی ئازادیخواز و عەدالەتخوازان کپ بکەنەوە.
نمونەش پوچەڵ کردنەوەی هەوڵ و فشاری ترسنۆکانەی دەسەڵات بوو، لە لایەن هاوڕێیانمان بە ئەنجامدانی گردبونەوەکە و گەیاندنی یاداشتنامەکەمان لە ڕێگای مایک و زوومی کامێراکانەوە بۆ ڕای گشتی.
ئەو مێتودەی دەسەڵات زەنگێکی مەترسیدارە و ئاماژەیە بۆ ئەوەی دەسەڵاتی ئێستاش بە هەمان عەقڵیەتی ڕژێمە دیکتاتۆرییەکانی پێشووی عێراق و دەسەڵاتە دواکەوتووەکانی ئێستای ناوچەکە بیر دەکاتەوەو هەنگاو دەنێت.
ئەوەی ماوەتەوە بیڵێم
ئایا دەسەڵاتێک کە بە هەموو هێزی ڕێگە لە ئازادیەکان بگرێت، چاوەڕێی چی لێ دەکرێت؟
ئایا هێز و لایەنە کوردستانیەکان لە سەر چ بنەمایەک بتوانن لە بەرەیەکدا لە گەڵیاندا کۆببنەوەو یەک ڕیز بن؟
ئایا تروسکاییەک ماوە بۆ چارەسەری نەهامەتیەکان و چارەنوسی نادیاری خەڵک، لە ڕێگەی بیرۆکەی هاوپەیمانی و لیستێکی هاوبەش لە گەڵ ئەو دەسەڵاتەی لە پێناو بەرژەوەندی تەسکی حزبایەتی و بەرژەوەندی تاکلایەنەی خۆیان، هەموو بەرژەوەندی گشتیان وەلانا و بە ئاشکرا هاوپەیمانی نەیارانی گەلی کوردستانن و پشتیان لە بەرەی دڵسۆزانی ناوخۆیی کردووە؟
