ئومێد بابان
بڕیارەکەی دادگای باڵای فیدڕاڵیی عێراق سەبارەت بە لەکارلادانی محەمەد حەلبووسی لە پۆستی سەرۆکی ئەنجوومەنی نوێنەرانی عێراق، شیکاری زۆر هەڵدەگرێت و کاردانەوەی زۆریشی بە دوادا دێن.
لێرەدا تەنیا قسە لەسەر لەکارلادانی حەلبووسی نییە وەک سەرۆکی حیزب و نوێنەری زۆرینەی سوننەکانی عێراق، بەڵکوو ئاماژەدانە بە لێکەوتەی بڕیارە مەترسیدارەکانی ئەو بە ناو دادگایە، کە پتر وەک خێوەتگەی خێڵێک یان زیاتر، دەردەکەوێت و هەموو بڕیار و ڕاسپاردە و ئاماژەکان لە سەرۆکی خێڵ و سەرۆکی عەشیرەت و دەمڕاستی دیوەخانەکان وەردەگرێت.
ئەو دادگایە، کە هەرگیز پشت بە پرەنسیپە سەرەتاییەکانی یاسا و دەستوورە باوەکان نابەستێت، بە ئارەزووی خۆی دەست دەخاتە نێو کاروباری تێکڕای دەزگا و دامەزراوە میرییەکانی وڵات و ئۆکەی بۆ هەر بڕیارێک دەکات کە پەرتەوازەیی و دووبەرەکی، لێکترازان و دژبەری لێ بکەوێتەوە.
هەمان ئەو بەناو دادگایە، بڕیارێکی زۆر خەتەرناکی بەرامبەر گەلی کوردستان دا و هەناردەکردنی نەوتی هەرێمی کوردستانی ڕاگرت، دەرەنجامەکەشی برسیکردنی هاووڵاتیان و بڕینی قوت و بژێویی کوردستانیان بوو.
لە ئێستادا، کە دۆخێکی نەخوازراو چاوەڕێی عێراق دەکات و کورد و سوننەکانیش پەراوێز خراون، کۆدەنگی، یەکگرتوویی و یەکهەڵوێستی کورد و سوننەش گرینگن.
بۆ؟ چونکە ئەو سیناریۆیانە بەپێی کات بەردەوام دەبن و ڕەنگە (شیعیزم) تاکلایەنە کۆنتڕۆڵی بارودۆخەکە بکات و هەموو عێراقییەکان، بە کوردستانیانی باشووریشەوە، ڕادەستی ئێران بکات.
دواجار دەشێ دەسەڵاتە ڕەهاکانی ئەو دادگایە سنووردار بکرێن، دەکرێ کورد و سوننە و سەدرییەکان، بە یەکبڕیاری چۆک بەو دەسەڵاتە بەناحەق شەرعێندراوەدا بدەن.
