م. هێمن عەلی گۆران
ساڵانی رابردوو واتە تا دەستپێکی خوێندنی ئەمساڵی (٢٠٢٤-٢٠٢٥) مێژووی دامەزراندنی کۆماری مەهاباد و کۆمەڵێک لە رێکخراو و #حزبەسیاسیەکان دەخوێندرا بەڵام لە #چاپی_نوێی مێژووی پۆلی (٩)ی بنەڕەتی
سەرجەم بابەتەکانی تایبەت بە دامەزراندنی کۆماری مەهاباد و پەیوەندیدار لە وانەی (پۆلی نۆی بنەڕەتی) لە هەرێمی کوردستان لادران بەڵام وانەکانی دامەزراندنی دەوڵەتی عوسمانی و سەفەوی و بە دەیان بابەتی تر بە هەمان شێوەی رابردوو ماونەتەوە !
روون و ئاشکرایە دەسەڵاتدارانی هەرێم #نەتەوەیی نین هەر بۆیەش حکومەتی هەرێم هیچ بەرنامەیەکی دروست و درێژخایەن بۆ #پەروەردە و زانستی نەتەوایی نەبووە.
هەموان دەزانین دووحزبی دەسەڵاتداری هەرێم ئەمە بۆ کام دەوڵەتە و لە پای چیدا دەیکەن
بەڵام سەیرەکە لەوە دایە هیچ مامۆستا و مێژوونوس و نوسەرێک لەسەری وەدەنگ نەهاتوە! دەشکرێ ئاگاداری ئەم گۆڕانکاریە نەبوبن کە زۆر ژیرانە و لەناو خۆڵقاندنی دەیان قەیران دا ئەنجام دراوە!
بە ئاشکرا دەبینین چەند بە بەرنامە و بە قۆناغ لە رێگەی راگەیاندن و خوێندن لە سەرووی هەموانەوە یاریکردن و دەست بەسەرداگرتنی قوتی خەڵک هاتوون گەنج و پیری نشتیمان لە خوێندن و زانیاری نەتەوایی دەتەکێندرێنەوە و بێزار دەکرێن لە خاک و نشتیمان !
لابردنی ئەم بابەتە لە وانەکاندا نیشان دەدات کە دەستێکی بەرز لە وەزارەتی پەروەردەی هەرێمدا هەیە و کار بۆ شکاندنی بەها بەرزە نەتەوایەتیەکان دەکا و دەیەوێت وانەکان بە شێوەیەکی تر بگۆڕێت کە نەوەیەکی وەک خۆیان نانشتیمانی و نائاگا بەرهەم بهێنێت.
ئەم بابەتە نەک هەر کاریگەری لەسەر هەستی سەربەخۆییمان و داهاتوی نەوەکانمانەوە هەیە، بەڵکو کەلتور و بەها کۆمەڵایەتیەکان لاواز دەکات ئەویش لەکاتێکدا کە کورد هەلێکی باشتر لە رابردووی لە ئاستی جیهان بۆ رەخساوەو پێویستی بەوەیە مێژووی خۆی و ئەوەی بەسەری هاتوە و بەتایبەت مێژووی کۆماری مەهاباد و راپەڕین و بەوردی و ڕاستگۆیانە لە بەرنامە پەروەردەیی و راگەیاندنەکان بخاتەروو.
تەنیا ئەو کاتە دەتوانین ناسنامەی نەتەوەیی خۆمان بە زیندووی بهێڵینەوە.
بۆیە پێویستە لە قۆناغەکانی خوێندن و میدیا و فێستیڤاڵە کولتووری و توێژینەوەکان گرنگییەکی تایبەت بەم بابەتە بدرێت و دڵنیابن لەوەی نەوەکانی داهاتوو بە دروستی لە مێژوو و ناسنامەی نەتەوەییان دەزانن و دەناسن…
(ئومێد دەکەم شارەزایانی ئەو بوارە لە ئاست ئەم کارە بێدەنگی نەنوێنن)
