هۆشیاری عەبدولعەزیز
2- 2
لە سیستمی حوكمڕانی شپرز و پەشۆکاودا حزب وەک خاوەندارێتی تایبەت مامەڵە لەگەڵ پرۆسەی دیموكراسی وهەڵبژاردندا دەکات و پێیوایە دەبێ هەموو لایەکی دەوڵەت و سیستەمی حوکمڕانی کۆنترۆڵ کراوبێت تا رای گشتیی و دامەزراوەكانی دەوڵەت لەبازنەیەکی داخراوی دیاریکراودا جێگیربن و گورزەیەکی بێ کێشەبن لە بندەستی حزبی حوکمڕانداو نەبنە هۆکاری زامنکردنی دیموکراسیەکی ڕاستەقینە لەسەر بنەمایەکی عەقڵانی وا کە مەترسیبێت لەسەر داهاتووی دەسەڵاتدارێتی ئەوان ، لە بەرجەستەکردنی ئەم حاڵەتەشدا حزبی حوکمڕان لە چوارچێوەی فۆبیایەکی مەترسیداری ناهاوسەنگدا دەکەوێتە وێزەی کۆمەڵگاو هەوڵدەدات بەهەر نرخێک بێت پایەکانی سێستەمی حوکمڕانی خۆی بپارێزێ و نەکەوێ بۆیە دەبینین لەكوردستانیش نەك تەنها حكومەت و حوكمڕانیی، بەڵکوو تەواوی چەمک و دەستەواژەکانی پەیوەست بە دیموکراسەت و هەڵبژاردن و ئازادی ڕادەربڕین و مافی هاوڵاتیبوون لە دەستی حزبدا مۆنۆپۆڵە و وای لێهاتوە زەحمەتە بتوانرێ حزب و حكومەت لەیەكتر جیابكەیتەوە. ئەم تێکەڵ و پێکەڵکردنەش گەیشتۆتە ئاستێک حكومەت وەك ئۆرگانێكی حزب مامەڵەی لەگەڵدا دەكرێت و خاوەندارێتیەکەشی دەگەڕێتەوە بۆ حزب ، بەمەش تەواوی سەرچاوەكانی دارایی و موقەدەراتی خەڵك کەوتۆتە ژێر ركێفی حزب و حزبیش بەکەیفی خۆی یاری بەئیرادە و کەرامەتی خەڵک دەکات و بێسڵمینەوە بەرژەوەندیەکانی خۆی دەپارێزێ لەم قۆناغ و هەڵومەرجەشدا حزب وەك سەرچاوەی بزنس و خاوەن سەرمایەی كەڵكە بووی دەسەڵاتدار مامەڵە دەكات و دەیانەوێ لە ڕێگەی بڵاوكردنەوەی ترس و فشاری جیاجیاوە لە گەمەكەدا سەركەوتن مسۆگەربكەن و براوەی زۆنەكانی خۆیان بن ، لەكاتێكدا دەروازەكانی هیچ گریمانە و گومانێك ئەوەناشارێتەوە كە كۆمەڵگای كوردی بەچی دۆخێكی دژوار و پڕ لە قەیران و نەهامەتیدا گوزەر دەكات و ئەمانە چی دۆخێكی ناتەندروست و نالەباریان خوڵقاندوە كە زۆر خراپتر و دژوارترە لەو بارودۆخەی كە هەستی پێدەكەین و بوەتە هۆکارێکی مەترسیداری وا کە زۆرینەی رەهای ئەم كۆمەڵگایە لەخراپترین بارودۆخی سیاسی و ئابوری و نەهامەتیدا دەژێت ، لە بەرامبەریشدا پیاوانی دەسەڵات و خێزانەكانیان و نەوەكانیان لە كەشكەلانی فەلەكدا و لە سەر حیسابی ئەم میللەتە رۆژانە های لایڤ دەژین و بونەتە بەڵا و نەگبەتیەكی گەورە و مەترسیدار بە سەر كۆمەڵگاوە ئەم گوتارە نوێیە كە خۆی لە دژایەتی یەكتر و بازدان بەسەر هەڵە و خوار و خێچی و گەندەڵیەكانی خۆیاندا و جەخت كردنەوە لە خزمەتكردنی هاوڵاتیان و پاراستنی دەسكەوتەكانی راپەریندا دەبینێتەوە و بۆخۆی جۆرێكە لە چەواشەكاری و خۆدزینەوە لەبەرپرسیارێتی و دەیانەوێ لەو ڕێگایەوە كێشە زۆرو كەڵەكە بوەكانی هەرێم و قەیران و تەنگەژە ئابوری و سیاسیەكان بشارنەوە و دێزەبەدەرخۆنەی بكەن ، ئەمە لەكاتێكدایە كە خۆشیان و خەڵكیش دەزانێ و دركی پێدەكات كە كۆمەڵگای كوردی لەدۆخی باڵادەستیی ئەم مۆدێلە لەحوكمڕانی و ئەقڵیەتی پاوانخوازیی ئەمانە بەچی تونێلێكی مەترسیدار و دژواردا تێپەڕ دەبێت لەئێستاشدا بێدەنگی كردن لەم گوتارە چەواشەكاریە كە لە قوڵای فۆبیای ئەحزابی حوكمڕانەوە سەرچاوە دەگرێ مەترسیەكی زۆر لەوە ترسناكترە كە هەردوو حزبی حوكمڕان لە مۆدێلی سیاسەتی بەشبەشێنە و دوو زۆنیدا پراكتیزەی دەكەن ، چونكە هەرجۆرە بێدەنگیەك لەم هەڵومەرجەدا رێك بە قازانجی پارتیی و یەكێتیی و ئەو سەڵتەنەتە سیاسییەی ئەوان دەشكێتەوە و دەبێتە مایەی زیاتر زەلیلكردن و و بێچارەی خەڵك و ئەو ئاراستەیەی كە نازانێ چۆن و بەچی میكانیزمێك كۆتای بەو دەسەڵاتە گەندەڵە بێنێ كە كۆمەڵگای كوردی كردۆتە مۆڵگەی دزی و فزی و ڕاوڕووت و كەڵەكە كردنی سەرمایە و بازاڕێكی باش بۆ ساغكردنەوەی دەسكەوتە مادی و مەعنەویەكانیان دروستبوونی ئەم بارودۆخەش بەتەنها لەسیاسەتی چەوتی دەسەڵاتەوە سەرچاوە ناگرێت، بەڵكو بەشێكی زۆری دەگەڕێتەوە بۆ دەرەنجامی سیاسەتی عەوامگەرایی‌و نائەقڵانی ئەو هێزە ئۆپۆزسیۆنە نمایشكارە بەرژەوەند خوازانەی كە هڵگری ڕوئیا و تێڕوانینێكی واقیع بینانەی بابەتیانە نین و تەنها بەدوای بەدەستهێنانی خواستەكانی خۆیان و سواربونی شەپۆلی ناڕەزایی خەڵكەوەن و هیچ چارەسەرێكی ڕیشەیان پێ نیە بۆ تێپەڕاندنی ئەو دۆخە و بەشێكیشیان بوونەتە پاشكۆ و پینەچی ئەحزابی حوكمڕان و فەشەلی سیاسەتەكانیان بەكورتی پێموایە لەبەرانبەر ئەمەش پێویستە رەوتی ئۆپۆزیسیۆنی ڕاستەقینەی چەپ لەم قۆناغەدا تەجاوزی ئەو گوتارە فۆبیایەی ئەحزابی حوكمڕان بكات و بەڕوون و ڕاشكاو پەنجە لەسەر كەم و كورتی و زەلیلی خەڵك دابنێت و بوێرانە شكست و فەشەلی سیاسی و دەسەڵاتدارێتی ئەمانە وئەو مۆدێلە حوكمڕانیە بخاتە ڕوو ، چونكە بەبێ گۆڕانكاری ریشەیی لەسیستەمی سیاسی‌و ئابوری هەرێم‌و كشانەوەی دەستی حیزب‌و كۆمپانیاكانی لەبازاڕ ، قەیران و تەنگەژە سیاسی و ئابوریەكان بنبڕنابن ، دەستبردن بۆ ئەمەش پێویستی بە دیدێكی رۆشن و شەفاف و جەرییئانە و گوتارێكی سیاسیی جیاوازتر لە گوتاری زاڵی ئەمانە هەیە كە بەئێستاشەوە لە ناو چەقی فۆبیای سیاسی و حوكمڕانیدان و یاری بە ئیرادە و خواستی خەڵك دەكەن و بەئاشكرا خەریكی سەوداو مامەڵەی تیجاڕین و باكیان بەو دۆخە مەترسیدارەی ژیانی خەڵك نیە و بوونەتە گەورەترین هەڕەشە بۆ سەر كۆمەڵگای كوردی و دەسكەوتەكانی كە هەزاران قوربانی لە پێناودا بەخشراوە
