سوبحی مەهدی
سکاڵاو گازندە لەسەر هەڵبژاردنەکەو ئەنجامەکانی هەرچییەک بن.
١/ حزب ولیستەکانی پێکهاتەی شیعە، کە بە چەندین قەوارەی جیا جیا بەشداریان کردو هەریەکەیان پێشبڕکێی بەدەستهێنانی کورسی زیاتری دەکرد ،لەنێو پێکهاتەکەیاندا، دواجار ئەو لیستانەی سەرکەوتنیان بەدەستهێناوە لە یەک کورسییەوە بۆ چل و حەوت کورسی لە دەوری مێزێکی خڕ کۆبونەوەو زۆرینەی پەرلەمانیان پێکهێناو ( چوارچێوەی هەماهەنگی)یان نوێ کردەوە و لیژنەی دانوستان و لیژنەی ناولێنانی کەسی ڕاسپێرراویان دیاریکرد بۆ سەرەکوەزیرانی کابینەی داهاتوو، و مەرجەکانیشیان دیاریکرد بۆ هەر کەسێک ئامادەیی پیشاندەدات کە ببێتە سەرەکوەزیران، ولیژنەکانیش کەوتنە جموجۆڵ و سەردان بۆ لای هەردوو پێکهاتەی سوننە و کورد، بۆ مەبەستی ڕێککەوتن ودابەشکردنی کێکەکە،کە لەتە گەورەکە هەر بۆ ئەوان دەبێت.
٢/ بەهەمان شێوە، پێکهاتەی سوننەش کەلەژێرناوی چەندین قەوارەو لیستی جیادا کەوتنە نێو ململانێی هەڵبژاردن و جارجاریش قسەی زبرو یەکتر شکاندنیان بەرانبەر یەک بەکار دەهێنا، دواجار لیستە سەرکەوتووەکان ،پێکەوە لەنێو ماڵێکی سوننە کۆبونەوەو و هاوپەیمانێتییەکیان بە کۆی ٧٥ کورسی پێک هێنا، بەناوی(ئەنجومەنی سیاسی نیشتمانی) و دەکەونە گەڕ بۆ لێک تێگەیشتن و پچڕاندنی پۆست و دەسکەوتی زیاتر و دیاریکردنی کاندیدایەک بۆ پۆستێکی باڵا،کە جاران سەرۆکی ئەنجومەنی نوێنەران،لەپشکی ئەوان بوو، ئێستا دەیانەوێت ململانێی بەدەستهێنانی پۆستی سەرکۆمار بکەن کە بەعورفێکی پێشتر لەسەر ڕێککەوتوو لە پشکی کورد دانراوە.
٣/ پێکهاتەی کورد یان کوردستانی، سەرەڕای هاواری دڵسۆزان و نیشتمانپەروەرانی گەل بۆ یەک لیستی ، یان لانیکەم پێکهێنانی هاوپەیمانییەک لە ناوچە کوردستانییەکانی دەرەوەی هەرێم ، ڕێککەوتن نەکراو بەچەندین لیستی جیا هاتنە مەیدانی ململانێیەکەوە و (هەزاران دەنگ و چەندین کورسی کەمتر) لە پشکی کوردستانی بەدەست هاتن، بەڵام تا ئێستا نەک پێک نەهاتوون بۆ یەک هاوپەیمانی یان زیندووکردنەوەی هاوپەیمانی کوردستانی، بەڵکو تائێستاش هەروەک ڕۆژانی بانگەشە لەسەرململانێ ولە یەک خوێندن بەردەوامن و ئاسۆی پێکهاتن ڕوون نیە و لەبەردەوامی ناکۆکییەکاندا، ئەگەری دابەشبوونی کورسیە بەدەستهاتووەکانیان هەیە بۆسەر لیست و قەوارەی پێکهاتەکانی تردا، چاوەڕوانکراوە.
بابەتی سەرەکی لەنێو گفتوگۆی قەوارەکاندا بۆکورد،پۆستی سەرکۆمارە کەلەڕابردوودا لەبەرکەوتەی کورد بووەو مەترسی لەسەرە،لەحاڵەتی دواکەوتنی کورد لەڕێککەوتن بۆ کاندیدایەکی پەسەندکراوی قەوارەکان، کە( گونجاوترە) کەسایەتییەکی نیشتمانی لێهاتوو بێت و جێگەی ڕەزامەندی هەموان بێت و لەبری ئەرکە دەستورییە تەشریفاتییەکان، ببێتە هۆکارێک بۆ بەرزکردنەوەی ڕۆڵی کورد لە نێوخۆی عێراق وناوەندە نێودەوڵەتییەکاندا.
جگە لەوەش پێویستییەکی ژیارییە کە قەوارە سەرکەوتووەکان ،ڕۆژانی بانگەشەو ململانێکان تێپەڕێنن ولە بیری بەرژەوەندییە باڵاکانی گەل بن و لەنوێنەرایەتی حزبەکانیانەوە ببنە نوێنەری هەموو خەڵکی کوردستان و لە گفتوگۆکردن لەگەڵ پێکهاتەکانی شیعە و سوننەدا، تەنها بابەتی دابەشکردنی کورسی و پۆست نەبێتە ئەولەویەتی کاریان، بەڵکو چەسپاندنی مافەکان و خۆبەستنەوە بەدەستوورو دیاریکردنی کات بۆ جێبەجێکردنی ئەو بەندانەی دەستوور کە لەنێو دۆسێیەکاندا تۆزیان لێ نیشتووە، ومافەکانی وەک بودجە و موچە و زەوییەکانی جوتیاران و کێشە هەڵواسراوەکان بەڕێککەوتنێکی زامنکراو بە واژووی لایەنە پێکهاتووەکان و چاودێرانی باوەڕپێکراو کۆتایی پێ بهێنرێت. نەک هەر لایەنەو لە خەمی پچڕاندنی پۆست و پاداشت و کورسییەکانی کابینەی نوێ بێت.
