ستار ئەحمەد
لە نێوان تان و پۆی پڕ لە جەنجاڵی ڕۆژگار و ئەو ڕاکەڕاکە بێبڕانەوەیەی ،کە گیانی مرۆڤی ئەم سەردەمەی شەکەت کردووە، گەڕان بەدوای دۆزینەوەی ساتێکی بێدەنگ ،وەک گەڕان بەدوای مروارییەکی دەگمەن لەناو قووڵایی زەریاکاندا وایە. ئێمە لە سەردەمێکدا دەژین کە ژاوەژاو و تەنیایی باڵی بەسەر هەموو کایەکانی ژینماندا کێشاوە، لە هەر لایەکەوە دەنگێک و ڕەنگێک و داواکارییەک بانگمان دەکات، وەک بڵێی ژیان پێشبڕکێیەکی بێکۆتایی بێت و کەسمان نەزانین خاڵی کۆتایی لە کوێدایە. لێرەدایە کە ڕۆحمان پتر لە هەر کاتێکی تر تینووی هەناسەیەکی قووڵە، هەناسەیەک کە بۆنی ئاسوودەیی و هێمنی لێ بێت، نەک بۆنی ماندوێتی و پەلەپەل. ئاسوودەیی مانای ئەوە نییە کە دەوروبەرمان چۆڵ بێت لە کێشە و گرفت، بەڵکو ئاسوودەیی ڕاستەقینە لە نێوان چوارچێوەی دڵ و دەروونی خودی مرۆڤ خۆیدا چەکەرە دەکات. کاتێک مرۆڤ دەگاتە ئەو ئاستە بەرزەی تێگەیشتن ،کە دەزانێت ژیان هەوراز و نشێوی زۆری تێدایە و ناتوانرێت هەموو ڕووداوەکان کۆنترۆڵ بکرێن، ئەوا بارێکی گەورە لەسەر شانی لادەچێت و ڕێگەی دەدات بە ئازادیی وەک باڵندەیەک لە ئاسمانی ئارامیدا بفڕێت.
ئەم هەناسە پڕ لە ئارامییە تەنها لەو کاتانەدا هەستی پێدەکرێت، کە مرۆڤ دەگەڕێتەوە بۆ ناوەوەی خۆی و لەگەڵ سروشت و جوانییەکانی دەوروبەریدا دەبێتە یەک. کاتێک سەیری ڕەنگینیی گوڵەکان و شینیی ئاسمان دەکەین بەبێ ئەوەی خەیاڵمان لەلای دواکەوتنی کارەکان یان خەمی داهاتوو بێت، ئەو کاتە هەست بە تیشکێکی ڕووناکی دەکەین، کە دڵمان گەرم دەکاتەوە. لێبوردەیی و پاککردنەوەی دڵ لەرق و کینە ، یەکێکی ترە لەو دەرگایانەی ، بەرەو هەناسەی ئاسوودەییمان دەبات. کاتێک مرۆڤ بارستایی کینە لە کۆڵی دادەنێت، هەست دەکات سووکتر و ئازادتر دەتوانێت هەناسە بدات. ئاسوودەیی لە ڕاستیدا جۆرێکە لە هونەری ژیان، هونەری ڕازیکردنی دەروون بەو شتانەی کە هەمانە و سوپاسگوزاری بۆ ئەو بەخششە بچووکانەی کە زۆرجار بەهۆی چاوبرسییەتیمانەوە نایانبینین. ئەوەی فێری ئەم هونەرە بێت، چیتر لە گەردەلوولەکانی ژیان ناترسێت، چونکە لە ناوەوەی خۆیدا کەنارێکی ئارامی شک دەبات، شەپۆلەکان ناتوانن بیهەژێنن.
بۆ ئەوەی بگەینە ئەو ترۆپکەی ئارامییە، پێویستە فێری بێدەنگی بین. بێدەنگی تەنها بە واتای قسەنەکردن نایەت، بەڵکو بە واتای بێدەنگ کردنی ئەو هەموو دەنگە ناهەموارانەیە کە لە ناو سەرماندا دەزرینگێنەوە. پێویستە ساتێک بۆ تەنهایی خۆمان تەرخان بکەین، دوور لە هەموو ئەو ئامێرە جەنجاڵانەی، کە تەنها نیگەرانی و دڵەڕاوکێمان بۆ زیاد دەکەن. لەو ساتانەی تەنهاییدا، مرۆڤ دەتوانێت گوێ لە لێدانی دڵی خۆی بگرێت و تێبگات ، ژیان تەنها ئەم چرکەساتەیە کە تێیدایە. ڕابردوو گوزەرا و داهاتووش نادیارە، کەواتە تەنها کارێک کە پێمان بکرێت ئەوەیە کە ئەم ساتە بە باشترین شێوە بژین و ڕێگە نەدەین هیچ خەمێکی بێهودە ئەو هەناسە پاک و بێگەردەمان لێ تێک بدات. ئەو ئاسوودەییەی کە باسی دەکەین، تەنها کشانەوە نییە لە جەنجاڵی، بەڵکو جۆرێکە لە سەرلەنوێ ناسینەوەی واتای بوون. مرۆڤ کاتێک دەتوانێت ئەو هەناسە قووڵە هەڵبکێشێت، کە چیتر ڕێگە نەدات بارودۆخە دەرەکییەکان ببنە فەرمانڕەوای ناوەوەی. زۆرجار ئێمە وادەزانین ئارامی لە شوێنێکی دووردایە، بەڵام ڕاستییەکی حاشاهەڵنەگر هەیە کە دەڵێت ئاسوودەیی لەوێدایە کە بیرکردنەوەکانمان لێی دەوەستن.
لە لایەکی ترەوە، پەیوەندییە مرۆییەکان ڕۆڵێکی بەرچاو دەگێڕن لە دروستکردنی ئەم کەشە پڕ لە ئارامییەدا. دانیشتنێکی سادە لەگەڵ کەسێکی دڵسۆز، یان پیاسەیەک لەژێر سێبەری دارەکاندا بەبێ ئەوەی کات بمانبەستێتەوە، دەبنە هەوێنی ئەو هەناسە بێگەردە. مرۆڤی ئاسوودە ئەو کەسەیە کە توانیویەتی هاوسەنگییەک لە نێوان پێداویستییەکانی جەستە و تینوێتیی ڕۆحیدا دروست بکات. کاتێک ئێمە لە بری کێبڕکێ و چاوچنۆکی، ڕوو دەکەینە بەخشین و میهرەبانی، نەک تەنها بۆ دەوروبەرمان، بەڵکو بۆ خودی خۆشمان، ئەو کاتە هەست بە بار سووکیی دەکەین ، ئاسوودەیی ڕاستەقینە لەوەدایە کە بتوانیت لە ناو هەموو ناخۆشییەکاندا، هێشتا جوانییەک بدۆزیتەوە و سوپاسگوزار بیت بۆ ئەو چرکەساتەی کە تێیدا هەناسە دەدەیت. ئەمە ئەو وێستگەیەیە کە تێیدا ماندوێتیی ساڵان و خەمی ڕۆژگارە سەختەکان وەک هەڵمێک لەبەر تیشکی خۆردا ون دەبن و جێگەی خۆیان بۆ ئومێدێکی نوێ چۆڵ دەکەن.
پێویستە ئەوەش بزانین کە ئاسوودەیی پەیوەست نییە، بە تەمەن یان پێگەی کۆمەڵایەتیەوە، بەڵکو بڕیارێکی ناوەکییە. هەر یەکێک لە ئێمە دەتوانێت لە هەر تەمەنێکدا بێت، ئەو هەناسە نوێیە بۆ ژیانی بگەڕێنێتەوە. بەسەیرکردنی چاوی منداڵێک، یان خوێندنەوەی دێرە شیعرێکی پڕ لە واتا، یان تەنانەت تێڕامان لە ئاوابوونی خۆر، دەتوانین ئەو هەستە لای خۆمان زیندوو بکەینەوە. ژیان پڕە لەو دەرفەتە بچووکانەی کە دەمانبەن بەرەو لوتکەی هێمنی، بەڵام زۆرجار بەهۆی چاوبرسییەتیمان بۆ شتە گەورە و بێبایەخەکان، لێیان بێبەش دەبین. با فێر بین جاروبار بوەستین، سەیری دەوروبەرمان بکەین، و تەنها بۆ یەک ساتیش بێت، ڕێگە بدەین ئەو هەناسە پڕ لە ئاسوودەییە هەموو کون و کەلەبەرەکانی ڕۆحمان پڕ بکاتەوە و بمانکاتەوە بەو مرۆڤە سادە و دڵخۆشەی کە لە بنەڕەتدا هەین. لە کۆتاییدا، هەر یەکێک لە ئێمە پێویستی بەو وێستگەیە هەیە تا تێیدا پشوو بدات و وزەی نوێ وەربگرێت بۆ بەردەوامی، چونکە بێ ئەو هەناسە پڕ لە ئاسوودەییە، ژیان تەنها دەبێتە دووبارەبوونەوەیەکی بێزارکەری خولگەیەکی بێمانا، کە تێیدا مرۆڤ تەنها وەک ئامێرێک کار دەکات بێئەوەی هەست بە شیرینیی بوونی خۆی بکات.
