بە ناوی هەولێر پرۆپاگەندە بۆ هەڵبژاردن مەکەن .. هەولێر لە هەردوو لاتان بێزارە، بڕۆن سەیری کەلاوەکانی تەعجیل و خانەقاو گەڕەکی عارەبان بکەن ، بڕۆن سەیری خانووەڕووخاوو کەلاوەکانی ئەودیو ڕێگا داخراوەکانی قەڵا بکەن، بڕۆن 100 پاڵاوگە نایاساییەکەی دەوروبەری هەولێر دابخەن کە بە دووکەڵیان خەریکە هەموومان تووشی شێرپەنجە دەکەن.. خۆ کەس دەستی نەگرتبوون 33 ساڵە پڕۆژەی ئیفراز چوارتان جێبەجێ بکردایە تاکو بە بیر لێدان ئاوی ژێر زەوی هەولێرتان لەناو نەبردایەو گرفتی ئاوتان لە پایتەخت چارەسەربکردایە. ئێستا لەپێناو پڕۆپاگەندەی هەڵبژاردن دەچن بەردی بناغەی بۆ دادەنێن؟!! سووتەمەنیتان بۆ وێستگەی کارەبای ئەحمەد ئیسماعیل دابین بکردایە تاکو کارەبای نیشتمانیمان بە تەواوی هەبوایە نەک 1000 موەلیدەی گەڕەکەکان هەولێر پڕ کەن لە دووکەڵی ڕەشی ژەهراوی.. مووچە، کە مافێکی ڕەوایە لێتان زەوت نەکردباین و ئەو دەردەتان پێنەکردباین.. سیاسەتی بە کۆیلەکردنتان پەیڕەو نەکردایە .. چیتان بۆ هەولێر کردووە ؟ ئێستا لە ڕێگای پڕۆپاگەندەی سەقەت،لە ڕێگای ململانێی ناشیرین،ڕەفتاری دوور لە ڕەفتاری هەولێرییە ڕەسەنەکان دەتانەوێ یاری بە هەست و سۆزی کاڵ فام و هەرزەکارە بە کۆیلەکراوەکان بکەن و بۆ مەستی نا پەسند بەکاریان بێنن،شەڕە دەبەیان پێدەکەن، سووکایەتی چرووک بە یەکتر دەکەن ؟!! لە کاتێکدا هەردوولاتان دوو ڕووی یەک دراون. 33 ساڵە بە یەکەوە حوکم دەکەن سەروەت و سامانی ئەم هەرێمە بە تاڵان دەبەن و برابەش لەبەینی خۆتان دابەشی دەکەن.. باش بزانن زۆرینەی هەولێرییە گران و سەنگینەکان تا سەرئێسقان لێتان بێزارن و بوونەتە بەڵا بۆیان و باوەرناکەم هیچ ئومێدێکی باشیان پێتان مابێت یان باوەڕ بە بەڵێنەکانی ئێستاتان بکەن.. بەڵام بەداخەوە لایەنە ئۆپۆزسیۆنەکانیش لە ئاستی پێویستدا نین تاکو بتوانن گۆڕانکاری ڕیشەیی ئەنجام بدەن و ئەم میللەتە داماوە لە دەسەڵاتی نا تەندروستی ئەم دوو دەسەڵاتە شکستخواردووە ڕزگار بکەن . ڕەوشتی هەولێرو هەولێرییەکان زۆر لەوە جوانترو گەورەترە کە ڕەفتاری ناشرین ئەنجام بدەن لەو جۆرە ڕەفتارانەی لەم ڕۆژانەی دوایی لە چوارچیوەی هەڵمەتی هەڵبژاردن ڕوودەدەن و بەم ڕەفتارانە پڕۆسەی هەڵبژاردنیش لەبەر چاوی خەڵک سووک دەکەن لەوانەیە ئەم مەبەستەشتان هەبێت تاکو خەڵکێکی زۆری ناڕازی موقاتەعەی هەڵبژاردن بکەن. ئەو موقاتەعەیەش بە قازانجی لایەنی دەسەڵاتدار تەواودەبێت!!!
مەغدید حاجی ــ هەولێر
3-10-2024
