هۆشیاری عەبدولعەزیز
2 لە 3
ئەگەر سیاسەت بۆخۆی جۆرێك بێت لە زانست و هونەری بەڕێوەبردن ئەوە دەبێ باش لەوە تێبگەین كە پێویستە بابەتیانە و بەدەر لە سۆزی كۆمەڵایەتی ئەو زانستە لەگەڵ شرۆڤەو هەڵسەنگاندنێكی ورددا پراكتیزە بكرێ لە كایەی گشتی كۆمەڵگادا ، چونكە وەك هەر چەكێكی ترسناك ئەگەر بە نەشارەزایی لە سیاسەتدا مامەڵەكرا ، ئەوا نەك هەر زیانی بۆ كۆمەڵگا دەبێ ، بەڵكو دەبێتە مەترسی بۆسەر كۆی پرۆسەی ژیان و كاریگەری دەكاتە سەر تەواوی جوڵەی سیاسی و ئابوری و دواجار بەشكستی گشتی كۆتای دێ ، زۆرجار هەڵەی سیاسی و بەهەڵە تێنەگەیشتن میكانیزمی جێبەجێ كردنی خودی سیاسەت دەكاتە بابەتێكی قێزەوەن و هیچ نرخ و بەهایەكی نامێنێ لە كایەی كۆمەڵایەتیدا و پێچەوانەش دەبێتە مایەی بەرهەمهێنانی بەرژەوەندیە تایبەتیەكان و هەر جۆرە ساختەچێتیەك كە كارەكتەرە دەسەڵاتدارەكان مەبەستیانە ولەم ئاستەشدا (درۆ و فرت وفێڵ ، ماستاوچێتی و چەواشەكاری ) شۆێنی حەقیقەت دەگرێتەوەو چارەسەری قورس دەكەوێ و دەبێتە هۆكاری پەیڕەوكردنی سیاسەتێكی نەفامانە ، لە كاتێكدا دەبێ سیاسەت ژیانێكی باش و خۆش بۆ هەموان فەراهەم بكات بە شێوەیەك كەس زیانی پێنەگات و نەبێتە كۆیلەی دەسەڵات و لە سەرحسابی لەناوبردن و چەوساندنەوەی چینەكۆمەڵایەتیەكان بەرژەوەندیە تایبەتیەكانیان نەپارێزن وەك ئەوەی ئەمڕۆ لە كوردستاندا دەبینرێ و قێزەوەنترین مرۆڤی سیاسیان بەرهەمهێناوە ، بنەماكانی بەرهەمهێنانی ئەم جۆرە سیاسیەش حزبە خێڵەكیە دەسەڵاتدارەكانە كە هەر لە بنەڕەتەوە لەناو كایەی سیاسیی و كۆمەڵایەتی كۆمەڵگای كوردیدا ، وەك مشەخۆرەكانی نەخۆشی شێرپەنجە خانەكانی جەستەی كۆمەڵگا دەخۆن و هەڵگری پرۆژەیەكی سیاسیی و كۆمەڵایەتیی كاولكارن وبەردەوام لەهەوڵی دروستكردن و پەروەردەكردنی توێژێكی سیاسی چاوچنۆكدان كە جگە لە بەرژەوەندیە تایبەتیەكانی خۆیان و حزبەكانیان هیچ پڕۆژەیەكی گرنگی نیشتمانی یان پێشكەش نەكردوە لە پێناوپاراستنی بەرژەوەندی گشتی
جادووی بەكارهێنانی دیموكراسیەت و هەڵبژاردن و ئاڵوگۆری دەسەڵاتیش كۆمەڵگای كوردی گەوجاندووە و زۆرینە پێیوایە ئەوە حەقیقەتی حوكمڕانی و سیاسەتە و دەبێ دەستی پێوەبگیرێ ، لە كاتێكدا دەبێ ئەو ڕاستیەمان بیرنەچێ كە گیرفانبڕینی هاوڵاتی و پاشقولدانی كۆمەڵگا و چەتەی و قاچاخچێتی بە داهات و سەرمایەی ئەم وڵاتە ، بەشێك نیە لە لە پرۆسەی دیموكراسیەت و پاراستنی كایەكانی كۆمەڵگای كوردی و بەشێكیش نیە لە بازاڕی ئازاد و فراوانكردنی پانتاییەكانی وەبەرهێنان و خزمەت بە كۆمەڵگا ، چونكە بەهێزكردنی كەرتی تایبەت و هەڵوەشاندنەوەی كەرتی گشتی و فرۆشتنی تەواوی سێكتەرە خزمەتگوزاریەكان بەدەر لەوەی تاوانێكی نیشتمانی گەورەیە ، خۆی لە خۆیدا تاڵانیە و هاوڵاتی پێدەڕووتێننەوە و ناچێتە خانەی پرۆسەی ئاوەدانی و سەقامگیری ئاسایشی ئابوری و نابێتە هۆكاری بووژاندنەوەی كۆمەڵگا و پاشاگەردانیەكە لە ئەزموونی حوكمڕانێتی حزبەكانی دەسەڵاتەوە سەرچاوەدەگرێت
بۆ تێگەیشتن لەم ئەزموونە ناشرین و فاشیلە كە شكستی بە هەموو فەزای نیشتمانی و مێژووی تێكۆشانی نەتەوەی هێناوە، پێویستیمان بە شرۆڤەكردن و خوێندنەوەی ئەزموونەكە وەك خۆی هەیە و ناكرێ بەشێوەیەكی سەرپێی بەسەریدا تێپەڕین ، چونكە ئەزموونی چەتەی شاخ و نا هۆشیاری كۆمەڵایەتی كۆمەڵگای كوردی كە سەرەتاكەی دەگەڕێتەوە بۆ یەكەم پرۆسەی خۆ ئەزموون كردن وەك دەوڵەتداری، لەم دۆخەی كوردستاندا مەترسیەكی گەورەیە و بەشێكە لەو هەڵپە مەترسیدارە هەرێمایەتیانەی كە ئەمانەیان كردۆتە خاوەنی حوكمڕانیەكی خێڵەكی و دواجار گرێدراویشە بەو هاوكێشە ئاڵۆز و مەترسیدارە ناوچەیەوە كە وڵاتانی زلهێز لە پێناو پاراستنی بەرژەوەندیەكانی خۆیاندا ئەم جۆرە خێل حزبانە گەورە دەكەن و وەك یاری شەترەنج لە گەمە ئابوریەكانی خۆیاندا بەكاریان دێنن ، شكاندنی شكۆ و كەرامەتی خەڵك كە دەسەڵات و بنەماكانی حزب خێڵ بەرپرسیارە لە جێ گرتنەوەی وایكرد كۆمەڵگای كوردی توشی جۆرێك لە سستی و سربونێكی زۆر گەورە بكات. تا ئەو ئاستەی كە یەكانیگیربوونی قەیرانە دارای و سیاسی و كەلتوری و كۆمەڵایەتیەكان تەواوی ژیانی لەم وڵاتە وون كردوەو توشی ئیفلیجی و وەستانێكی ترسناك كردوە. رۆژانە خەڵكی لە چاوەروانی بەرجەستەبوونی گۆڕانكاریەك، كە ئاسۆیەك بۆ دەربازبوون لەم قەیرانە فرە رەهەندەی تێخزێنراوە ژیانێكی پڕ لە كولەمەرگی و ئاستەنگ بە رێدەخات. بێكاری و هەژاری و نادادپەروەری و گەندەڵی، بونەتە شوناسی ئەم قۆناغە و خەریكە بەیەكجاری كۆمەڵگای كوردی دەپوكێنێتەوە
بۆیە ئەم ئەزموونی حوكمڕانێتیە ، ئەزموونێكی داچۆڕاوی بەرژەوەندیە ئابوریەكانە و ناچێتە خانەی ئەزموونی نیشتمانی و پاراستنی قەوارەی هەرێمەوە و بریتیە لە ئەزموونی داتاشینی بتەكانی دەسەڵات و ئەو نۆكەرانەی كە بەرژەوەندی نەیارانی كورد و ئەزموونە ئیفلیجەكەی دەپارێزن ، لێرە دەستبردن بۆ خیانەتی نیشتمانی و فرۆشتنی خاك و خەڵكی ئەم وڵاتە بابەتێكی زۆر نۆرماڵ و ئاسایە و كە هەر ڕەوت و بزوتنەوەیەك توانی بە پاڵپشتی نەیارانی كورد و تاڵانكردنی كۆمەڵگا ببێتە ژمارە ئەوە دەتوانێ بەدڵی خۆی دەست بۆ خیانەتكاری و خۆفرۆشی ببات و سڵ نەكاتەوە لە مێژوو بێدوودڵی پۆزی پێوە لێبدات و بیكاتە شانازی بۆ حزب و بنەماڵەكەی، چونكە لەم پرۆسەی تێكدانە سیاسی و ئابوری و كۆمەڵایەتیەدا كە ئەحزابی حوكمڕان بەرهەمیان هێناوە ، حزب دەسەڵاتدارە و هیچ پرۆژەو بڕیارێكی حكومەت بەبێ تێپەڕین بە فلتەری حزبدا تێناپەڕێت و ناچێتە بواری جێبەجێكردنەوە ، واتا لە بری پڕۆژە و پلانی ستراتیژی حكومەت بۆ بەڕێوەبردن و ئیدارەدانی دەوڵەت ، حزب حكومەت ئاراستەدەكات و ئەو خاوەنی سەرەتا و كۆتای پرۆسەكەیە
