ڕێبین فهتاح
هیچ بەڵگەیەک نییە ئاگرکەوتنەوەکان لە هەرێمی کوردستان بە دەستی ئەنقەست بن. پێشخستنی تیۆری موئامەرە لەو پرسەدا و بەوەی گوایە "دەستێکی تێکدەر" لە پشت ئەو ڕووداوانەوە هەیە، خزمەت دەکات بە پەردەپۆشکردنی هۆکاری ڕاستەقینەی ڕووداوەکان و شاردنەوەی بەرپرسیارێتیی لایەنە پەیوەندارەکان لە ڕووداوەکاندا.
ڕووداوەکانی ئاگرکەوتنەوە هەموو ساڵان بە ژمارەیەکی گەورەوە ئامادەن. بەرگری شارستانی هەولێر، تەنیا لە نۆ مانگی سەرەتای ساڵی ڕابردوو، هەزار و ٧١١ ڕووداوی ئاگرکەوتنەوەی تۆمارکردوون.
هۆکاری زۆرینەی ڕووداوەکانی ئاگرکەوتنەوە بۆ تیمەکانی بەدواداچوون لە بەرگری شارستانی بەزوویی ئاشکراکراون، لەناویاندا ٤٠٪ی ڕووداوەکان بۆ شۆرتی کارەبا دەگەڕێتەوە. هەروەها خراپی کوالێتی بەنزین و نەبوونی مەرجی توندوتۆڵی هۆکارن لە سووتانی ئۆتۆمبێل، فڕێدانی جگەرە یەکێک لە هۆکارەکانی ئاگرکەوتنەوە بووە لە دەغڵودان، پووش و پەڵاش و ناوچە دارستانییەکاندا، بەپێی بەرگری شارستانی هەولێر، زیاتر لە ٩٠ ئاگرکەوتنەوەی لەو جۆرە، بەهۆی فڕێدانی جگەرەوە بووە. نەبوونی مەرجەکانی سەلامەتی لە کۆگاکانی سووتەمەنی، پاڵاوگەکان، کارگە و پڕۆژەکانی دیکە، بەشێک لە هۆکارەکان پێکدەهێنن و ئاسایی بەشێکی دیکەی ڕووداوەکان بۆ بەرگری شارستانی ڕوون نەبوون و بە "هۆکاری نادیار" پێناسە کراون.
داتاکان
داتاکانی بەرگری شارستانی هەولێر بۆ نۆ مانگی سەرەتای ساڵی ڕابردوو بەو شێوەیە بوون؛
زۆرینەی ڕووداوەکانی ئاگرکەوتنەوە، سووتانی پووش و پەڵاش بوون ٥٧٣ حاڵەت، سووتانی ماڵ ٢٩٨ حالەت، سووتانی ئۆتۆمبێل ٢٦٦ حالەت، ئاگرکەوتنەوە لە ناوچە دارستانییەکان ١٤٣ حالەت و هەروەها، ٩١ مارکێت و پێشانگا، ٥٣ حالەتی ئاگرکەوتنەوە لە شوێنەکانی فڕێدانی خاشاک، ٤٥ ئاگرکەوتنەوە لە کێبڵەکانی کارەبا، ٣٨ ئاگرکەوتنەوە لە خەرمان و دەغڵودان، سووتانی ٣٧ مۆلیدەی کارەبایی، ٢٩ حالەتی ئاگرکەوتنەوە لە کەمپی ئاوارەکان، ٢٣ کێڵگەی پەلەوەریی، سووتانی ١٩ باڵەخانە و هۆتێل و چەند ناوەندێکی دیکە لە کارگە، کۆگا، باڵەخانە، نانەواخانە، بەنزینخانە، کۆگای سووتەمەنی، چێشتخانە و کافتریا و ...هتد.
حکوومەت بەگشتی و حکوومەتە خۆجێییەکان بەتایبەت بەرپرسن لە بەرانبەر کۆنتڕۆڵکردنی هۆکارەکان، لە چارەسەرکردنی گرفتەکان لە هێڵەکانی کارەبا، کوالێتی ئامێرە کارەباییەکان، لە ناچارکردنی شوێنکارەکان بە دابینکردنی مەرجەکانی سەلامەتی و لە دۆخی نەبوونی چاودێرییەکی جددی و بەڵکوو هەبوونی چاوپۆشی بە هەر هۆکارێک، ئەو ڕووداوانە دەبارە و سەدبارە دەبنەوە.
بەو شێوەیە، ئەگەر دەستێک لە پشت ڕووداوەکانی ئاگرکەوتنەوە هەبێت، دەستی حکوومەت و لایەنە پەیوەندیدارەکانە، کاتێک ئەرکی خۆیان جێبەجێ ناکەن، لە دابینکردنی مەرجەکانی سەلامەتی و کۆنتڕۆڵکردنی ئەو هۆکارانەی ڕووداوی نەخوازراو دروست دەکەن.
کاتێک کوالێتی کۆنتڕۆڵەکەت ڕێگە دەدات ئامێرێکی کارەبایی هاوردە بکرێت، کە هەر بە فوویەکی گەرم گڕ دەگرێت، ئێ دەبێت چاوەڕوانی شۆرتی کارەبا و ئاگرکەوتنەوە بکەیت.
کاتێک پڕۆژە و کارگە و کارخانەکان ناچار ناکەیت بە دابینکردنی هیچ مەرجێکی سەلامەتی، مانای ئەوەیە دەتەوێ بسووتێن. کاتێک کوالێتی بەنزینەکەت، بەو جۆرە بێت کە هەیە، مانای ئەوەیە دەتەوێ هەمووان لە ئۆتۆمبێلەکانیاندا ببن بە ژەقنەبووت!
