ئەبوكاروان
یەکێک لە پێناسە دیارەکانی حزبی سیاسی وەک هاوبیرییەکی ئارەزوومەندانەی پشتئەستور بە چالاکی فکری، بریتییە لە یەکگرتنی خۆبەخشانەی خەڵکانێکی هاوبڕوا لەپێناو چەند ئامانجێکی هاوبەش، کە پێکەوە لە سەربنەمای گرێبەندێکی فکری و سیاسی و بەشێوەیەکی سیستماتیکی کار لەسەر جێبەجێکردنی بەرنامە و پرۆگرامی بڕیاردراوی خۆیان دەکەن و پابەندن بە پەیڕەوێکی دیاریکراوەوە
کەواتە بەرنامە و پەیڕەوی ناوخۆ لە ژیانی حزبی سیاسیدا دوو بەڵگەنامەی گرنگ و پڕبەهای گرێبەندە فکری و سیاسییەکەیە و یەکێکیشە لە خاڵە سەرەکییەکانی مەرجەكانی ئەندامێتی لەحزبدا و لەگەڵ ئەوەشدا پێویستە ئەندام لە ڕێكخراوێكی حزبی دیاریکراودا ئابوونەی مانگانەی بڕیاردراوی خۆی بدات و پەیوەستبێت بە دیسپلینە حزبییەکەوە، کە ئامرازێکی سەرەکی و دیارە لە ڕێکخستنی گەشەسەندنی سیاسی حزبدا، تاکە دەرفەتیشە بۆ گوزارشتکردن لە بیر و بۆچوون و هەڵوێستی هاوبەشی ئەندامانی حزب .
لە گۆڕانکارییەکانی گەشەی مرۆڤایەتیشدا، حزب پێکهاتەیەکی گرنگی سیاسی، کۆمەڵایەتییە و گوزارشت لە گەشەسەندنی ڕای گشتی جەماوەر دەکات لەچوارچێوەی ئاراستەیەکی نەخشەبۆکێشراوی فکری سیاسی دیاریکراودا، واتا هەموو ئەو ڕاستییانە دەمانباتەوە سەر ئەوەی، کە ئایە کام لە بەرنامە و پەیڕەوی ناوخۆ لە جەوهەری ئەو یەکێتییە ئارەزوومەندانەیەی حزبدا گرنگە، کە خەڵکانێکی لە خۆیدا کۆکردۆتەوە ؟
بۆیە دەمەوێ لەم نووسینەدا و بەپێی تێگەیشتنی خۆم و شیکردنەوەی زیاتری حزبدا بچمە سەر ئەو حەقیقەتەی کە سەرەڕای گرێدانیان بەیەكەوە لە چەندین ماددە و بڕگەدا، بەرنامەی حزب مانیفێستێکی دیاریکراوی پشتئەستوری فکری حزبە بۆ جەماوەر و خەڵک لەسەر ئەو بنەمایە پەیوەندییەکانی خۆی بەحزبەكەوە گرێدەدات، بەڵام پەیڕەوی ناوخۆیی بەڵگەنامەیەكە سیستەمی كاركردنی ئەندامان و ڕێكخراوەكان ڕێكدەخات و میکانیزمی بەڕێوەچوونی ژیانی ڕێکخستنە و ھەموولایەك پابەنددەكات بە جێبەجێكردنی ناوەرۆكەكەیەوە.
لە وەڵامی ئەو پرسیارەدا کە ئاماژەم پێکرد پێموایە بەرنامە گرنگترە، بۆچی؟
چونکە بەرنامەی حزب ھێڵە گشتییەكانی ئامانج و سیاسەتی حزب دەردەخات و بۆچوونێکی سیاسی یەکگرتووە لە شێوەی پرۆگرامێکی سیاسی دیاریکرودا بۆ هاووڵاتییان و ئەوە دەخاتەڕوو، کە
بیروباوەڕی حزب ھەڵگری كام ئایدیۆلۆژیایە؟ ماركسی و بیری پێشكەوتنخوازی، یان ئیسلامی و نەتەوەیی ؟ تێڕوانینی چییە بۆ چین و توێژە کۆمەڵایەتییەکان و بەرنامەی ئابووری و كۆمەڵایەتی حزب چۆنە و چییە؟ ڕوانینی چییە بۆ پەروەردە و فێركردن و تەواوی سێکتەرە خزمەتگوزارییەکان..؟ بەمەش ئەوەمان بۆ دەردەكەوێ، كە ھەر ھاووڵاتییەك ئەو بەرنامەیەی لا پەسەند بێت و وەریگرێ، ئەوە پەیوەندی بە حزبەوەدەكات و دواتر لەچوارچێوەی پەیڕەوی ناوخۆدا پابەندی دیسپلینە دیاریکراوەکانی میکانیزمی کارکردن دەبێت .
بەم تێگەیشتنەش دەگەینە ئەو ڕاستییەی، کە بەرنامە سەرەتای پێناسەی حزبە و دەبێ بەشێوەیەکی بابەتییانەی وا داڕێژرابێت، کە هێڵە گشتییەکانی ئاراستەی فکر و سیاسەتی حزب لە بەرژەوەندی ھەڵگرانی ئەو بیروباوەڕدا بن و بنەمایەکی بەهێزی پەیوەندییەکان بێت لە چوارچێوەی حزبدا و هەست بە ناهاوسەنگی هاوبیروڕایەکانیان نەکەن لە ئاست جێبەجێکردندا، کە خۆی لە پەیڕەوی ناوخۆدا دەبینێتەوە.
لەگەڵ ئەوەشدا ئەم دوو بەڵگەنامەیە لە كۆنگرەی حزبدا و دوای گفتوگۆكردن و هەڵسەنگاندنی ورد و وەرگرتنی ڕای زۆرینە پەسەند دەکرێت و دەبێتە بەڵگەنامەیەکی دەستووری داڕێژراوی حزب بۆ ماوەی کارکردنی لە ژیانی سیاسی کۆمەڵگەدا.
لەم ڕوانگەیەشەوە دەمەوێ دەست لەسەر ئەوە دانێم، کە كۆنگرەی حەوتی حزبی شیوعی كوردستان، لیژنەی پەیڕەوی ناوخۆ ئامادەكارییەكی باشی كردبوو بۆ ئەو بەڵگەنامەیە و كلیلی گفتوگۆكانی بەباشی خستبووەڕوو، بۆیە بەحەماسەوە گفتوگۆی لەسەركرا و بابەتی گرنگی كۆنگرەكە بوو، بڕگەكان بەگەرمی گفتوگۆیان لەسەر دەكرا و نیقاشی زۆر دەكرا لەسەر پێشنیارەكان و بوونە بابەتی گەرم.
هەرچەندە ئەمە بەومانایە نایە كە گفتوگۆكانی پەیڕەوی ناوخۆ گرنگتربوون لە بەرنامەی حزب، كە بەباشی گفتوگۆی لەسەر بكرێت، چونكە ھاووڵاتی بەپێی بەرنامەی حزب پەیوەندی دەكات و لەدەوری حزب كۆدەبێتەوە و دواتر پێویستی بە پەیڕەوێكە كارەكان ڕێكبخات، لەبەر ئەوە ڕاكردن بەدوای كاركردن لەسەر بەڵگەنامەی پەیڕەوی ناوخۆی حزب و بایەخنەدان بە ئامادەكاری بەرنامەی حزب، تێنەگەیشتنە لەگرنگی ئەو بەڵگەنامانە و گرێدانیان بەیەكەوە، بۆیە بەبڕوای من بازدان و بەگرنگ نەزانینی بەڵگەنامەی بەرنامەی حزب تێنەگەیشتنە لەسیاسەت و كاری حزبایەتی و تێکۆشان لەپێناو بەرژەوەندییە گشتییەکان و ئەو ئامانجانەی کە لە رێگەی گۆڕینی داواکارییەکانی خەڵکەوە دەبێتە ئەڵتەرناتیڤی گۆڕانکاری لەگۆڕەپانی سیاسی کۆمەڵگەدا و دەبێ زۆر بابەتییانە و بەسەرنجەوە گفتوگۆی بکرێت و نەخرێتە پەراوێزی کۆنگرەوە، کە بەرزترین دەسەڵاتی داڕشتنەوەی سیاسەتی گشتی حزبە.
