نووسینی :- زیرەك كەمال
ئێوارەیەكی درەنگ وەختی پایزی، كە درەختەكانی سەرشەقام بەدیار گەڵا وەریوەكانیانەوە وردە وردە فرمێسكیان دەڕشت و، كزەبای خەزان سەرشێتانە گەمەی بەو گەڵا وەریوانە دەكرد.
من و هێرش مەغدیدی برادەرو برازا، پیاسەیەكی ناوشارمان كرد، هەموو شوێنێكی خواردن چێشتخانە، شیرنەمەنی، چایخانە، لەناو شار جممەی دەهات لە قەڵەباڵغی، تاكە شوێنێك كە لەناو سەنتەری شاردا چۆڵ و هۆڵ بوون، دووكانی كتێب فرۆشی بوون،
ئاخر من و هاوڕێم دوازدە دووكانی كتێب فرۆشی گەڕاین، دوازدە كەسمان لەوێ نەبینی، كەچی كە ڕوومان لە دووكانێكی شیرینی كرد نۆرەمان گرت بۆ ئەوەی شوێنێكمان بەركەوێت بۆ دانیشتن.
لە شەقامی باتە گەنجێكی قەڵەو كە ڕانك وچۆغەری كری زاخۆیی لەبەردا بوو، لەبەردەممان وەستا و بەمامۆستا هێرشی گووت چییە مامۆستا نامناسی؟
هێرش مەغدیدی هاوڕێشم گووتی ناوەڵا بەداخەوە ناتناسم؟ گووتی من چەند ساڵێك پێش ئێستا قوتابی تۆبووم، خەلیلم خەلیل، كەوای گووت مامۆستا هێرش ناسییەوەو بەگەرمی تەوقەی لەگەڵ كردو، پێی گووت خەلیل گیان چیت تەواو كردو ئێستا لەكوێی؟
خەلیل بەنازو فیزو لووت بڵندییەوە گووتی: وەڵا لەنیوەی ڕێگا وازم لەخوێندن هێناو ئێستاش خاوەنی كۆمپانیام و دە دوازدە مامۆستای وەكو تۆ لای من ئیش دەكەن!! هەركاتێك ویستت دەرگا بۆ تۆش كراوەیە، یەكێكیش لە مامۆستا ئافرەتەكان ئێستا سكرتێرمە!! راستەوخۆ مامۆستا هێرش پێی وت: باوەڕبكە تۆ هیچ نەگۆڕاوی هەمان هەڵسوكەوتی جارانت هەیە!
دواتر خەلیل بەپەلە ماڵئاوایی كرد.
كە ڕۆیشت مامۆستا هێرش خەراپ تێكچوو، دەم وچاوی گرژبوو ، خەم و عادزی بەجۆرێك لە ڕووخساری نیشت دەتگووت تازە لە بەخاك سپاردنی ئازیزێكی گەڕاوەتەوە، ئەو هێرشەی لە گەرمەی خەم وكۆست و ناخۆشی و شكستەكانیش مەلی خەندەو پێكەنین سەرچڵی ڕووخساری بەجێناهێڵێت، خەمێكی وەها دایگرت هەستم كرد تەنانەت هاوسەنگی ڕۆیشتنی تێكچووە .
دواتر ڕووی لە من كرد گووتی هاوڕێم، ئەو خەلیلە چەندین جار لەسەردزی و قۆپیەكردن و چەقۆوەشاندن ئیدارەی قوتابخانە سزایداوە، دەم پیس و دەست پیس بوو، بۆیەش پێم گووت لەبەرچاوم هیچ نەگۆڕاوی بۆ ئەوەی بزانێت لای من مرۆڤ خۆی گرنگە نەك پارەو پۆست.
هەڵبەت من وەكو مامۆستا ئەوكات هەوڵی زۆرم لەگەڵیدا ڕاستەڕێی بكەم سەركەوتوو نەبووم، دواتر زانیمان بەبێ ئەوەی بە پەیژەی سیاسەتدا سەركەوێت و هیچ لە هیچ بزانێت گەیشتۆتە سەری سەرەوەی حزبی دەست ڕۆیشتوو، هەر لەو ڕێگایەش ئاوا دەوڵەمەندبووە.
پاشان من و هاوڕێم هێرش شكستەباڵ گەڕاینەوەو بەیەكەوە نەفرەتمان لەم کولتوورە كرد، كە ئاوا مامۆستاو خوێندنیان بەو شێوەیە بێ نرخ كردووە.
