پشتی تەمامبوونا ساڵا خاندنێ، زارۆکان پێدڤی ب بهێنڤەدانێ، ئارامبوون و نویکرنەڤا هێزا دەروونی و لەشی هەیە.
بەلێ ئەڤە ڕامانا هندێ نادەت کو ب تەمامی پەیوەندیا وان ب خواندنێڤە ببڕن.
ڕۆڵێ دایک و بابان دڤێ قۆناغێدا گەلەک یێ گرنگە، چونکی دشێن هەفسەنگیەکا باش دناڤبەرا بهێنڤەدانێ و یاری و فێربوونێدا بپارێزن، ب شێوەکی کو زارۆک ب دڵخۆشی و ئامادەییەکا باشتر بۆ ساڵا خوێندنا داهاتی ڤەگەڕنەڤە.
دایک و باب پشتی دوماهیا ساڵا خاندنێ چ بۆ زارۆکان بکەن؟
ئێکەم: بهێنڤەدانا دەروونی و جەستەیی
پشتی ساڵەکا پڕ ل ماندیبوون، زارۆک پێدڤی ب دەمی هەیە بۆ یاریان، بهێنڤەدان و بوراندنا دەمەکێ زێدەتر دگەل ئەندامێن خێزانێ.
ئەڤ جورە بهێنڤەدانە کاریگەرییەکا ئەرێنی ل سەر تەندروستیا دەروونی و گەشەکرنا سۆزداریێ هەیە.
دوویەم: پاراستنا ڕێژەیەکا ڕۆژانە
هەرچەندە هاڤین وەرزێ بهێنڤەدانێیە، بەلێ پاراستنا دەمێ نڤستنێ، خوارن و چالاکیێن ڕۆژانە هاریکاریا زارۆکان دکەت ل شێوازێ ژیانەکا تەندروست و ڕێکخستی دا بمینن.
سێیەم: بەردەوامبوون ل خاندنێ
ڕۆژانە دەمەک بهێتە تەرخانکرنا بۆ ڤەخاندنا پەرتووکان، کو ئەگەرەکێ گرنگە بۆ پاراستنا لێهاتوویا زمانی، گەشەپێدانا هزرکرنێ و بەرفرەهکرنا خەیاڵێ.
باشترە زارۆک بخۆ پەرتووکان هەڵبژێریت، هەتا حەزا ڤەخاندنێ ل نک زارۆکی زێدەببیت و گەشێ بکەت.
چار: فێربوون ل ئەزموونێن ڕۆژانە
ژیانا ڕۆژانە یا پڕە ل دەرفەتێن فێربوونێ. بازارکرن، لێنان، هژمارتنا پارا و گەشتکرن دکارن ببنە هۆکارێ فێربوونا بیرکاری، زمان و چارەسەرکرنا کێشەیان.
پێنج: ڕێکخستنا ب کارئینان مۆبایل و شاشان
ب کارئینانا تەکنەلۆژیایێ پێتڤی ب سنوور و هەفسەنگیێ هەیە.
دانانا یاسایەکا گونجایی بۆ مۆبایل و یاریێن ئەلیکترۆنی، هاریکاریا پاراستنا تەندروستیا دەروونی، جەستەیی و کۆمەڵایەتیا زارۆکان دکەت.
شەش: گەشەپێدانا لێهاتوویا کۆمەڵایەتیی
فێربوونا بەرپرسیارەتیێ، هاریکاری ل کاروبارێن ماڵێ، گفتوگۆیا گونجایی و ڕێزگرتن ل دەوروبەران، بنەمایێ دروستبوونا کەسایەتییەکا هەفسەنگن.
حەفت: دەرئێخستنا شیان و ئارەزوویان
هاڤین باشترین دەرفەتە بۆ ناسین و گەشەپێدانا بەهرێن زارۆکان، ل وەرزش، هونەر و چالاکیێن جۆراوجۆردا، هەتا تشتێن نوی فێر ببن.
هەشت: چارەسەرکردنا ئەوان بابەتێن پێدڤی ب باشتربوونێ هەی
ئەگەر زارۆک ل بابەتەکێ وەکی بیرکاری، زمانی کوردی یان ئینگلیزی ... پێدڤی ب باشتربوونێ هەبیت، هاڤین باشترین دەرفەتە بۆ پڕکردنەڤا ئەوان کێماسیان ب شێوەیەکێ ئارام، بێ گڤاشتن و ب هاندان.
ل دوماهیکێ، نابیت هاڤین ببیتە قوتابخانا دوویێ، بەڵێ وەرزەکە بۆ بهێنڤەدانێ، خۆشیێ، فێربوون ل ئەزموونا ژیانێ و گەشەکرنا کەسایەتیا زارۆکان.
ئەگەر دایک و باب ڤێ هەفسەنگیێ بپارێزن، زارۆک ب باوەری و دڵخۆشی و ئامادەییەکا زێدەتر دەست ب ساڵا خاندنا نوی دێ کەت.
وەلید محەمەد سلێمان
سەرپەرشتیارێ پەروەردەیی
