لە مامۆستا تێکۆشەرەکانی کوردستان
سەرهەنگ ئەنوەر سلێمان
ئامادەکردنی: مەغدید حاجی
بەشی یەکەم
٭ لە جیاتی پێشەکی:
ماوەی 30 ساڵ زیاترە مامۆستا سەرهەنگ لە نزیکەوە دەناسم، دەیناسم وەکو مامۆستا و پەروەردەکارێکی دڵسۆز، وەکو تێکۆشەرێکی پیشەیی و سیاسی ڕاستگۆ، وەکو کۆمۆنیستێکی ماندوونەناس، وەکو کەسێکی کۆمەڵایەتی ، وەکو سەرۆک خێزانێکی دڵسۆز و ماندوو بەپەرۆش بۆ تاک بەتاکی ئەندامانی خێزانەکەی. دەیناسم وەکو گوڵی مەجلیسان و قسەخۆش و هەمیشە دەم بەپێکەنین. لە هەموو بوارەکاندا ئەوەندەی دەرفەتی هەبووبێ، توانای هەبووبێ، ئەسپی خۆی تاوداوە و دوانەکەوتووە و هەمیشە و تاکو ئێستا ماندوونەناسانە لە مەیدانە و هیوای هەمیشە سەرکەوتن و تەمەندرێژی بۆ دەخوازین.
مامۆستا سەرهەنگ بەڕێز و خۆشەویستە لای هاوڕێکانی، لای کەس و کاری، لای مامۆستایانی قوتابخانەکەی، لای هاوڕێیانی لە ڕێکخراوی پیشەیی مامۆستایان، لای هەڤاڵانی لە یەکێتی مامۆستایانی کوردستان.. بێگومان بەدەستهێنانی ئەو ڕێز و خۆشەویستییەی هەموولا، لە ئەنجامی ئاکاری جوان و دڵسۆزی و ڕاستگۆیی بووە.. بەهەموو پێوەرەکان شایانی ئەوەیە وەکو یەکێک لە مامۆستا تێکۆشەرەکانی کوردستان زیاتر بیناسێنین.
٭ کورتەیەک لە ژیانی مامۆستا سەرهەنگ و بنامەڵە بەڕێزەکەیان:
ــ ناوی تەواوی: سەرهەنگ ئەنوەر سلێمان ساڵح. کوڕی مامۆستای تێکۆشەری هەمیشە لەیاد ئەنوەر سلێمانە(1924-1998) ، دایکیشی ژنێکی تێکۆشەر بوو بەناوی قەدریە عەبدولعەزیز عومەر (1935-1989) لە دایکبووی قەڵای هەولێر بوو.
ــ مامۆستا سەرهەنگ لە ڕۆژی 18-12-1962 لە گەڕەکی ئازادی شاری هەولێر وەکو چوارەم منداڵی دایک و باوکی چاوی بۆ دنیا هەڵێناوە.
٭ خوشک و برا بەڕێزەکانی مامۆستا سەرهەنگ:
1- سەردار (هاوڕێ سروود) 1956، ڕواندز.
2- سەیران،1957، ڕواندز
3- سالار،1959، ڕواندز؛ کاکە سالار ئەندازیار بوو، بەداخەوە لە ڕۆژی29-3-1993 بەهۆی کارەساتی ڕووداوی ئۆتۆمبێل جوانەمەرگ بوو.
4- سەرهەنگ،1962، هەولێر
5- ساماڵ،1963، هەولێر
6- سەربەست، 1964، هەولێر
7- سەوسەن،1966، کوت
8- سروود،1974، هەولێر
باوکی مامۆستا سەرهەنگ (م. ئەنوەر سلێمان) لە پەنجاکانی سەدەی ڕابردوو مامۆستا و بەڕێوەبەری دواناوەندی ڕواندز بووە، ماڵیشی بردۆتە ڕواندز سێ منداڵیان لە ڕواندز لە دایکبووینە. لە دوای کودەتای 8ی شوباتی 1963 بەهۆی سیاسی مامۆستا ئەنوەر بۆ کوت و بەغدا دوورخراوەتەوە ، سەوسەن خان لە کوت خوارووی عیراق لەدایکبووە.
هیوای تەمەندرێژی بۆ هەموو خوشک و برا بەڕێزەکانی مامۆستا سەرهەنگ دەخوازین.. یادی کاکە سالاریش بەخێر و هەزاران سڵاو بۆ گیانی پاکی و بۆ گیانی پاکی باوک و دایکی مامۆستا سەرهەنگ.
٭ ژیانی م. سەرهەنگ لەگەل خوێندندا:
ــ لە ساڵی خوێندنی (1967-1968) لە قوتابخانەی خالد بن وەلید لە گەڕەکی ڕاغبەخاتوونی بەغدا خراوەتە بەر خوێندن.
ــ لە ساڵی 1968 ماڵیان گەڕاوەتەوە بۆ شاری هەولێر و لە قوتابخانەی هەڵگوردی سەرەتایی درێژەی بە خوێندن داوە و لە ساڵی خوێندنی (1973-1974) قۆناغی سەرەتایی تەواوکردووە.
ــ لە ساڵی خوێندنی (1974-1975) لە قوتابخانەی ناوەندی جۆلان لە شاری هەولێر وەرگیراوە و لە ساڵی خوێندنی (1977-1978) تەواوی کردووە و لە ئامادەیی (النضال) وەرگیراوە و لە ساڵی1982 تەواوی کردووە.
ــ لە ساڵی خوێندنی (1982-1983) لە پەیمانگای مەڵبەندی مامۆستایان لە هەولێر وەرگیراوە و لە ساڵی (1983-1984) تەواوی کردووە.
ــ لە ماوەی نێوان 1984 و 1990 سەربازی ئیلزامی بووە لە سوپای عیراق.
