هۆشیاری عەبدولعەزیز
2 لە 2
حزب لە كۆمەڵگای كوردیدا بەپێچەوانەی تەواوی دیاردە مەدەنی و دیموكراسیيەكە و لە مەرامی گشتی و پاراستنی دیموكراسی و فرەییەوە بوونەتە دەزگایەكی ئەمنی داپڵۆسێنەر لەپاڵ ئەو دەزگایەشدا حزب و كارەكتەرە دەسەڵاتدارەكانی وەك نوخبەیەكی ئەرستۆكراتی مشەخۆر، كە هیچ ماهییەت و مانایەكی سیاسی ڕاستەقینە نابەخشنە حزب، بوونەتە پاسەوانی سەرۆك و سەركردە و بنەماڵەی حزب و تەواو دەستبەرداری پاراستنی بەرژەوەندی گشتی و پایەكانی دەسەڵاتی ڕاستەقینەی دەوڵەتداری بوونە و جگە لە ناشرینكردنی سیاسەت و پرۆسەی حوكمڕانی هیچیتر نابەخشن.
واتا دەسەڵات لای ئەم جۆرە نوخبەیە، بابەتی بازرگانی و دەزگا و موئەسەسەی جاسووسی و میلیشیايی، و خێڵەكییە و بەهاوتای تەمەنی دەسەڵات لە هەرێم خەریكی رووتاندنەوەی كۆمەڵگا و ژێرخانە ئابووریەكەین و جگە لە خزمەتكردنی قەبیلە و هێزە دەرەكی و نێودەوڵەتی و ناوخۆیيەكان و چەواشەكردنی كۆمەڵگان و بەكەیفی خۆیان یاری بە دەسەڵات و پایەكانی سیستەمی حوكمڕانی دەكەن و وایانلێهاتوە بایەخ بە هیچ حەقیقەتێكی حزب و پرۆسەی دەسەڵاتدارێتی نادەن گەر لە بازاڕدا یاخود لە دەوڵەت و موئەسەسەیەكی دینی و عەشایەری و سەربازی، یان دەزگایەكی میدیايی پێكنەهاتبن و شوێنێكی بەهێزیان بۆ دەستەبەر نەكرابێت، بەمەش تێدەگەین لێرە هیچ سیاسییەك بە مووچەی حزب و چنگە پۆڕێی خۆی نەبووەتە بازرگان و پارەداری ناوچەكە، گەر لە یەكێك لەو دەزگا ئۆرگانیيە حزبیيانەوە نەبووبێتە كاك فلان و خەریكی دزی و فزی و لەگلەگێتی نەبوبێت لەو بازاڕە بێ ساحێبەدا، كە حزب و دەسەڵات لەپێناو مانەوەی خۆی و دەست و پێكانیدا دروستیكردووە، بەمەش دەگەینە ڕاستیيەك كە كۆمەڵگا لەناو لیتاوی حزب و كارەكتەرە كۆیلەكانیدا، كە خەریكی ئیدارەدان و بەڕێوەبردنی كۆمەڵگان، تووشی جۆرێك لە دافەتكان و تێكچوونی شيرازەی كۆمەڵایەتی بووە و سەرلەبەر شێواوە، لەپەنای ئەم دۆخەشدا حزب تەنیا بووەتە یەكێك لە كەرەستەكانی كۆنترۆڵكردنی كۆمەڵگا و میكانیزمی دزی و تاڵانی و ئیحتكاركردنی سوڵتە و شێواندنی دۆخی گشتی و سەرچاوەی قەیرانی هەمەجۆر.
دەسەڵات و حزب پێكەوە وەك هێزی ترسناكی ناو كۆمەڵگا خەریكی ژەهراویكردنی خەڵكن و بوونەتە شووم بۆ یەكەی كۆمەڵایەتی كۆمەڵگا و ئەو كاروانی تێكۆشان و قوربانیدانەی كە كوردی گەیاندە ئەم قۆناغە، بەگشتی حزب دەستی خستۆتە نێو هەموو سێكتەرەكان و لەبری ئەوەی بەرژەوەندی گشتی بپارێزن، خۆیان بوونەتە مەترسی و تەواوی ئاسایشی نیشتمانی و خۆراك و تەندروستی لە مەترسیدایە و دەبێ لە دەرهاوێشتەكەی سڵكەینەوە، چونكە ئەم دیاردە و ڕووداوانە حاڵەتێكی مەترسیدارە و لەگەڵ ژیانی سیاسی ڕاستەقینە و دیموكراسیيەت ناگونجێت و پێچەوانەی بنەماكانی ئازادی سیاسین، ئیشكالیەت و گرفتیش لەودایە لە بەرانبەر ئەو بازرگانانەدا كەسانێك كە هەڵگری دیدوتێروانینی بابەتیيانە و نیشتمانین، تەنها لەبەر دیدوتێروانینی جیاوازیان دەردەپەڕێنرێن و دەخرێنە ژێر فشار و دەمكوتكردنەوە، یاخود دەمبەستدەكرێن و بواری قسەكردن و بەشداریيان لەبەردەم تەسكدەكرێتەوە و لە هەندێك جاریشدا دەنگیان دەخنكێندرێت، كەچی پێچەوانە سیاسیيە بازرگانەكان بە ئازادی و دەستكراوەیی لەو كایە كۆمەڵایەتی و سیاسیيەدا مامەڵە و سەودای خۆیان دەكەن و بوونەتە ژمارە و حیسابیان بۆ دەکرێت.
لەسۆنگەی ئەم تێگەیشتنە گشتی و ڕاستیيانەوە دەگەینە ئەو دەرئەنجامەی کە ئەحزابی حوکمڕان بەدرێژايی ماوەی دەسەڵاتدارێتیان نەک هەر نەیانتوانی دەوڵەتێکی مەدەنی و هاوسەنگ بە ماف و داخوازیيەکانی هاووڵاتی دروستبکەن، بەڵکوو بوونە مایەی تێکدانی ڕەوشی سیاسی و ئابووری کۆمەڵگا و سەرچاوەی قۆرخكردن و دەستبەسەرداگرتنی تەواوی سێکتەرە جیاجیاکان و داگیرکردنی موڵك و ماڵی گشتی و وەک میراتی لەسەر خۆیان و نەوەكانیاندا تەخشان و پەخشانیان کردووە و بوونەتە مۆرانە و خۆرکەی کەرتە گشتیيەکان و گرنگیدان بە کەرتی تایبەت و ناوەندی بازرگانی و پارە ساغکردنەوە و تاڵانکردنی سەروەت و سامانی نیشتمانی، بەمەش نەک هەرخۆیان نابووت کردووە، بەڵکوو نەوەیەکیان لەسەر هەمان ریتم و ڕێڕەوی خۆیان بەرهەمهێناوە و مەترسیيەکی گەورەتریان خوڵقاندووە کە دواجار پاككردنەوەی ئەمەش پێویستی بە کاتی زیاتر و وردبوونەوە و خوێندنەوەیەكی نوێ هەیە و دەشێ ببێتە هۆكار بۆ تێکدانی زیاتر رەوشی سیاسی و كۆمەڵایەتی و کۆمەڵگا و دەرئەنجام دەسەڵات و سیستەمێكی سیاسی ساغڵەم و تەندروست بەرهەم نەیەت.
چونکە لە سایەی ئەم دەسەڵاتە حزبیيەدا کە بووەتە فاکتەری بەرهەمهێنانی شکست و قڵشی مەترسیداری چینایەتی و برسێتی و هەژاری و بێكاری و تێکدانی شیرازەی کۆمەڵایەتی، کۆمەڵگای کوردی بەرەو داڕوخان و هەڵوەشاندنەوەی زیاتر دەچێت و خەریکە وای لێدێ کەس متمانەی بەکەس نامێنێ و لەپەنای ئەمەشدا سیاسەت دەكرێتە مەیدانی بازرگانیكردن و بازرگانیش بە میلەتەوە دەکرێت و خەڵک ملكەچی حزبایەتی و سیاسەتی بە زۆرەملێ دەکرێت لە پێناو مووچە و كار بۆ دۆزینەوە و پەیداکردنی بژێوی ڕۆژانەدا، لەولاشەوە لە قاڵبدانی دیموكراسیيەت و بەرتەسككردنەوەی ئاسۆكانی دواڕۆژ بوونەتە پڕۆژەی ئەحزابی حوکمڕان و لەگەڵ هەموو ئەو بارودۆخەشدا قەیران و گیروگرفتە سیاسی و ئابووری و کۆمەڵایەتيیەکان لە گەشەکردن و سەرچڵی زیاتردان، بەم هەنگاوەش كۆمەڵگا بەرەو ئاقارێکی مەترسیداری ناهاوسەنگ و ناسروشتی دەبەن و سیاسەت بە هەموو كارلێك و كاریگەریەكانێوە دەخەنە بەردەم پرسی هەمە جۆری چارەنووسساز و لە ئەگەری بەردەوامبوونی ئەم جۆرە حوکمڕانیيەشدا، ڕەنگە دووچاری كێشمەكێش و قەیرانی زۆر لەوە گەورەتر و مەترسیدارتر بینەوە، کە لەواقعی ئێستای کۆمەڵگای کوردیدا دەبینرێت.
