١-نامۆ بوونی یادەوەریی alienation
٢-(تقمص) یان گۆڕینی کەسایەتی یان دۆناودۆن reincarnation
٣-کێبەرکێ یادەوەریی
٤-گۆڕێنی زانیاری لە یادەوەرییەکەوە بۆ یادەوەریی دیکە
٥-پڕکردن و بەتاڵ کردنی یادەوەریی
تەکنیکەکانی یادەوەریی زۆرن چ بە ئاراستەی ئاسۆیی یان بە ئاراستەی ستوونی، مرۆڤ لە شەوو رۆژێکدا سەدان جار بیر ئەکاتەوە، سەدان پروسەی فیزیکی و ماتماتیکی لە نێو یادەوەریی روو ئەدات.
لەڕاستی دا یادەوەریی دەزگایەکە هەم روونە هەم ئاڵوزە لە هەمانکاتدا، لەسەر بنەمای وزەو تەزووی کارەبایی نێو یادەوەریی ئیش دەکا، لەسەر زەمینەی زانستی و لۆژیکی سیگناڵ دوای سیگناڵ پروسەکانی نێو یادەوەریی ئەنجام ئەدرێ. لە هەقیقەت دا یادەوەریی سەربەخۆ نییە، ئەگەرچی سەربەخۆ بێت سەربەخۆییەکی ڕێژەیی یە، یادەوەریی بەردەوام لە کونتاکت دایە لەگەڵ یادەوەرییەکانی دی بەشێوەی ڕاستەوخۆ و ناڕاستەوخۆ لەگەڵ یادەوەریی گەردوون و سروشت بە هەمان شێوە لە کونتاکت دایە بەمەرجی کە لەسەر هەمان فریکوینسی بن. مرۆڤ هەر هەنگاوی دابنێ، کاریگەری یادەوەرییەکانی دی و یادەوەریی سروشتی لەسەرە، یادەوەریی مرۆڤ لە نێو ڕایەڵێک دایە چەشنی ئەمیبا هەر چۆن شکڵ و شێوەو دەسەڵاتی ئەگۆڕێ ئەوا یادەوەرییەکان شکڵ وشێوەی خۆیان دەگۆڕن لە نێو فەزای گەردوون، لەم ڕوانگەیەوە یادەوەریی تاک بەشێکە لە یادەوەریی کولەکتیڤ و بە کۆمەڵ، یادەوەریی تاک بەشێوەیەک لە شێوەکان تەعبیر لە یادەوەریی کۆ دەکا و دەسەڵاتەکەی لە ڕەگەکەکانی یادەوەریی کۆ و بە کۆمەڵەوە وزە وەردەگرێ، ئەگەر خەریتەی ئیش کردنی یادەوەریی بخەینە روو ئەوە چەشنی خەریتەی Mother board ی لاپتوپ و موبایلە.
هەموو یادەوەرییەکی مرۆیی پروسیسوری هەیە، ئایسی پاوەرو ئایسی شەحنی هەیە لە نێو مێشک و یادەوەریی ئێمەدا بەشێوەی گریمان و میتافور دەیان ترانسستەر و موسفێت و کەپاسیتور و ریگولێتەرو دایود و ثایریستور و تریاک هەن، بەپێ تەوژمی کارەبایی سیگناڵەکان دەگوازننەوە لە شانەیەکەوە بۆ شانەیەکی دی، هەر بیرکردنەوەو کردەوەییەکی مرۆڤ ئەنجامی کارلێکی بەشەکانی یادەوەریی بە شێوەیەکی سیستەماتیکی و لۆژیکی و زانستی.
نامۆبوونی یادەوەریی/ یادەوەریی چۆن دووچاری نامۆبوون دەبێ، هەر وەک ئاشکرایە یادەوەرییەکان دابەش کراون بە پێ فریکوینسی لە نێوان بەهێز و بێ هێز دا لە نێوان گەورەو گچکەدا لەنێوان بە تواناو بێ توانا دا، هەر یادەوەرییەک میکانیزمی ناوخۆیی خۆی هەیە بەو پێیە ئیش دەکا، ئەم میکانیزمە پەیوەستە بە مێژووی پەروەردەو پێگەیاندنی یادەوەرییەوە بەدرێژایی مێژوو، هەر وەک چۆن فروید دەڵێ، یادەوەریی بریتی یە لە کۆشکێکی چەند نهۆم لە کاتێ توڕە بوون دا دڕندەیەک لە نهۆمەکانی خوارەوە(کە بریتی لە نەستی مرۆڤ) دەرئەچێ و لەسەرەوەی کۆشکەکە خۆی ئەدۆزێتەوە، لەو ساتەوەختەدا دانیشتوانی سەر کۆشکەکە تووشی سەر سوڕمان دەکا، ئەمە بەشێکە لە حاڵەتی نامۆبوونی دەروونی، بەڵام دەشێ لە کاتێ ئاسایی و ئارامی دا، مرۆڤ کردەوەیەکی میهرەبان بنوێنێ، دانیشتوانی نێو نەستی یادەوەریی کەسانی دیکە تووشی حەپەسان و سەر سوڕمان بکا، ئەمەش حاڵەتێکە لە نامۆبوونی یادەوەریی بە دیوی دیکەدا.
لەڕاستی دا یادەوەریی چ نیرو چ مێ عاشقی یەکتر ئەبن، لەسەر بنەمای گرێی کەم بوون (عقدة النقص) نهێنی عاشق بوونی نێرو مێ لەسەر ئەم بنەمایە، بەشێوەی ئاسایی مرۆڤ عاشقی لە خۆی جیاوازتر ئەبێ، عاشقی لەخۆی باشتر ئەبێ، عاشقی لە خۆی جوانترو گەنجتر ئەبێ، لە ئاکامی پروسەی عیشق دا یادەوەرییەکان دووچاری نامۆ بوون دەبن، یادەوەریی کەسێکی دی کۆنتروڵی مێشکی دەکا وەک عاشق و معشوق لێرەدا یادەوەریی مەعشوق زاڵ ئەبێ بەسەر یادەوەریی عاشق دا یان ئەم پروسەیە لە نێوان پانتایی زانین و جەهل دا بەڕێوە دەچێ، لە دوو توێی یادەوەریی، یادەوەریی جاهل و نەزان عاشقی یادەوەریی زاناو پڕ ئەندیشە ئەبێ، بەم شێوەیە یادەوەریی نەزان یان کەم زان خۆی لەبەرچاو دەکەوێ و نەستی پەیوەست ئەبێ بە نەستی وێنەو ئەندیشەی زاناوە بەچەشنی یادەوەریی نەزان دەتوێتەوە لە نێو یادەوەریی زانا دا، لە هەندێ حاڵەت دا یادەوەریی عاشق دووچاری ئیفلیج بوون ئەبێ لە نێو دەسەڵاتی زاڵی یادەوەریی مەعشوق دا .
تقمص یان reincarnation / دیارە (تقمص) لەگەڵ (تناسخ) لە ڕواڵەت وەکو یەکن بەڵام لە ناوەرۆکدا جیاوازن. (تقمص) لە نێوان یادەوەریی زیندووەکان دا روو ئەدات بۆ نموونە یادەوەرییەک لە ژێر کاریگەری یادەوەرییەکی دیکە دایە، هەر بۆیە لاسایی دەکاتەوە لەشێوەی ئاخاوتن ورۆیشتن و رەفتاری جوراجۆر، لەکاتێ یادەوەرییەک لە ژێر کاریگەری یادەوەرییەکی دیکە دایە، فریکوینسی یادەوەریی یەکتر وەردەگرن هەر دوو یادەوەرییەکە لەسەر بنەمای یەک فریکوینسی و شەپۆلی کهروموگناتیسی کایە دەکەن هەر بۆیە رەفتارو شێوەی ئاخاوتنیان ئاوێتە ئەبێ لەوانەیە تا ڕادەیەک چۆنیەتی ئەندیشەو خەیاڵکردنیان تێکەڵاو بێت کە لەشێوە زانستییەکەی پێ دەڵین یادەوەریی.
لەم حاڵەتەدا یادەوەرییەکان یەکتر کوپی دەکەن یەکتر ئیسکانە دەکەن، ئاکام دەڵێن فڵانە کەس (تقمص) ی فیسارە کەس دەکاتەوە بەشێوەی ڕاستەوخۆ یان ناڕاستەوخۆ، نموونەی ئەمەش لە نێوان شیخ و سوفی دا لە نێوان سیاسەتمەدارو هەوادار دا شکڵ و شێوەی ئەگرێ . کەچی (تناسخ) لە نێوان روح و یادەوەریی مردووان دایە، کەواتە (تقمص) بۆ یادەوەریی زیندووانە (تناسخ) بۆ یادەوەری مردووانە، لێرەدا دەبێ ئەو ڕاستیە ئاشکرا بکەین کە یادەوەریی یان وزەی کارەبایی نێو یادەوەری کە لەشێوە ئاینی یەکەی پێ دەڵێن روح نامرێ، هەر یادەوەرییەک چەشنی موبایلی تەلەفون ژمارەو فریکوینسی یی هەن کە ئینسان دەمرێ جەستەی فیزیکی یی لەکار دەکەوێ وەک جەستەی موبایلەکە بەڵام ژمارەکەی هەر لە نێو فەزا دەمێنێتەوەو کار دەکا، لەکاتێ تێکچوونی جەستەی فیزیکی موبایل کەچی ژمارەکەی بە کراوەیی دەمێنێتەوە، ئەکرێ و ئەشێ لەسەر جەستەی فیزیکی موبایلێکی دیکەونوێ هەمان ژمارە تۆمار بکرێ ئەمەیە ڕاستی دۆناودۆن بەشێوەی سادەو میتافوری، ئینسان کە جەستەی دەمرێ یادەوەریی بە زیندویی دەمێنێتەوە لە ئەتموسفیری فەزا جێگیرە، لە دوای مردنی جەستە سروشتی یادەوەریی وەک روح هەمیشە دەیەوێ ئەزموونێکی دیکەی فیزیکی تاقی بکاتەوە، ئەگەر لە سەرەتا دا ئەزموونی فیزیکی ئینسانی تاقی کردۆتەوە ئیدی دەیەوێ لەم دۆخەدا ئەزموونی فیزیکی درەخت یان ئاژەڵ یان باڵندە تاقی بکاتەوە، ئەمەیە پروسەی ئەزموونی دۆناودۆن.
کێ بەرکێ یادەوەرییەکان/ هەر وەک چۆن گەردیلەکانی ئەتۆم نیوترون و پروتون و ئەلیکترون لە کێ بەر کێ بەردەوام دان ئەوا یادەوەرییەکان سروشتی بنچینەییان هەیە لە وێنە نەرینیەکەی پێ دەڵێن (ئیرەیی) لە وێنە ئەرینیەکەی دا پێ دەڵێن کێ بەر کێ، وەک ئەو پەندی پیشینانە کە دەڵێ ( ترێ سەیری ترێ ئەکا ئاو ئەگرێ ) لەڕاستی دا یادەوەرییەکان لە ڕکابەڕایەتی بەردەوام دان و یەکتر بارگاوی دەکەن بۆ نموونە رۆژێکیان دەرەبەگێک کچێکی فیڵاویی هەیە، سەرلەبەیانی رۆژێکیان دە کرێکار بەکرێ ئەگرێ کچەکەی بە جیا قسە لەگەڵ هەموویان دەکا، بە جیا بە هەر یەکێکیان دەڵی من تۆم خۆش دەوێ و سێویکی ئەداتێ بەمەرجی نەیخواو بیخاتە بەر باخەڵی، لە کاتی ئیش کردن کچە فێڵاوییەکەی پێیان دەڵێ بە قوربانی کوڕی سێو لە باخەڵ بم بە یەک جار وزە ئەداتە بەر دە خاکەناز لەدەست بەم شێوەیە تا ئێوارە ڕایاندەپەڕێنێ، ئەمە نموونەیەکی سادەیە سەبارەت بەوەی یادەوەرییەکان کار لە یەکتر دەکەن و یەکتر بارگاوی دەکەن، ڕکابەرایەتی ئەگەر هاندەرو موتیڤ و داینەمۆی یادەوەرییەکان بێت هەنگاوێکی باش و بەجێ یە ئەنجام هاوکاری و هاریکاری لێ دەکەوێتەوە بەڵام ئەگەر ئیرەیی کوێرانە بێت ئاکام رق و کینە بەرهەم دەهێنێ ئەنجام یادەوەرییەکان بۆیان بلوێ یەکتر لەنێو ئەدەن کەواتە کێ بەر کێ هەنگاوێکی باشەو سروشتی بنەڕەتی یادەوەرییە بەڵام ئیرەیی کارێکی خراپە لە ئاکامی نەزانین کەم مەعریفەو جەهل دێتە کایەوە .
گۆڕینی زانیاری نێو یادەوەرییەکان/ یادەوەریی مرۆڤ چەشنی هەر جیهازێکی ئەلکترونی وەرگرو نیردەری هەیە، بە شێوەیەکی ئەوتوماتیکی هەڕەمەکی ئیش دەکا وەک (الذاکرة العشوائیة) یادەوەرییەکی دیاریکراو لە ساتەوەختێک دا کە فریکوینسی یی لەگەڵ فریکوینسی یادەوەریی دیکەدا جووت بێت، ئەوە بە شێوەیەکی ئەوتوماتیکی کۆپی یادەوەریی یەکتر دەکەن لە رێگای سیگناڵ لە شێوەی دیالۆکی لۆژیکی نێو یادەوەرییەکان، ئەمەش لە کەسێکەوە بۆ کەسێکی دی دەگوڕدرێ، لێرەدا توانای ئافرەت لە پیاو زیاترە لە خوێندنەوەی یادەوەری کەسانی دیکە هەر بۆیە لەم بوارە دەڵێن حاسەی شەشەمی ئافرەت بەهێزە .
پڕکردن و بەتاڵ کردنی یادەوەریی / لەڕاستی دا پروسەی ژیانی مرۆڤ لە نێوان پڕ کردنی وزەو بەتاڵ کردنی دایە، بۆ نموونە پڕکردنی وزەو بەتاڵ کردنی چەشنی باتری کیمیاوی یان وەرەقی بارگاوی دەکرێ و دواتر بەتاڵ دەکرێ لە کاتێکدا کە باری لەسەر هەبێ، یان روونتر بڵێم پروسەی پڕکردن و بەتاڵ کردنی وزە لای مرۆڤ چەشنی کاپاسیتەرە (مکثف) ئەم پێکهاتە لە دوو پارچەی گەیەنەری ئەڵمنیوم پێکهاتووە لە نێوانیان دا پارچەیەکی نەگەیەنەر بوونی هەیە، بەردەوام بە شوحناتی پۆزەتیڤ و نەگیتڤ بارگاوی دەکرێ دواتر لە کاتێ پێویست و بوونی بار دا بەتاڵ دەکرێ، میکانیزمی پڕ کردن و بەتاڵ کردنی وزە لە تەک مرۆڤ دا دەقاو دەق وەکو کاپاسیتەر وایە هەر بۆیە لە کۆتایی دا دەتوانین بڵێن تێکرای پێکهاتە ئەلکترونییەکان هەروا میکانیزمی ئیش کردنی دەزگا ئەلکترونیەکان لە میکانیزمی ئیش کردنی یادەوەریی ئینسان و سروشتەوە بیروکەکەی وەرگیراوەو سەریهەڵداوە !
هاوڕێ نەهرۆ / ئۆسلۆ
٢٦ / ١١ / ٢٠٢٥
