وەلید محەمەد
ماوێ زێدەتر ل دوو حەفتیانە سۆپایێ سوریایا داگیرکەر ب چەکێ قۆرس هێرشێ دکەنە سەر ڕۆژئاڤایێ کوردستانێ و هەتا نوکەش د بەردەوامن ل پەلامارو هێرشێن خۆ، ئەڤەژی پشتی وێ هندێ هات کو ئەمریکا گڵۆپێ کەسک بۆ دیمەشقێ هەلکری داکو هێرشێ بکەنە سەر ڕۆژئاڤایێ کوردستانێ و کۆمەڵکۆژیان ل هەمبەر کوردان ئەنجام بدەن و ڕۆژئاڤایێ کوردستانێ داگیربکەن.
ب تۆندی ڤێ هێرشا چەپەڵا هێزێن سوریایا داگیرکەر شەرمەزاردکەین و داخازدکەین کو کۆمەڵگەها نیڤدەوڵەتی ڕێکێ نەدەت ئەڤ هێرش و پەلامارە دبەردەوامبن و دوماهیکێ پێ بینن و کۆمەڵکۆژیا کوردا ڕابگرن.
جهێ داخێ یە هەتا نوکە دڤان هێرش و پەلامارانەدا هژمارەکا زۆر یا کوردان شەهیدو برینداربووینەو ژمارەکا زۆر ژی ئاوارەبووینەو مال و جهێن خۆ بجهـ هێلاینە.
بەهی و سەرساخیێن خۆ ئاراستەی کەس و کارو بنەماڵێن شەهیدان دکەین و داخازا زوو سلامەتیێ بۆ تەڤایا برینداران دخوازین.
سەیرە گەلێ کوردستانێ پشتی مەزنترین ڕێکخراوا تیرۆرستیا جیهانێ تێک شکاندی و مەترسیا تیرۆرێ نەهێلای و ئاشتی و ئارامی بۆ جیهانێ زڤڕاندییەڤە، بەرگری ل کەڕامەتا مرۆڤایەتیێ کری، نوکە دبەرچاڤێن کۆمەڵگەها نێڤ دەوڵەتی و ب ئاشکرا هێرش بۆ سەر ڕۆژئاڤایێ کوردستانێ دەستپێکرینەو گەلێ قەهرەمانێ کوردستانێ دهێتە کۆمەڵکۆژکرن؟؟!!!!
کی پشتگیریا ڤێ هێرشێ دکەت؟ بێ گۆمان تورکیاو سعودیەو قەتەر …هتد. پشتگیریا ڤێ هێرشێ دکەن و مەرەما وان بهێزکرنا پێگەها عەرەبێن سوننەیە ل سوریا و ڕێگرن کو گەلێ کوردستانێ مافێن خۆ بدەستڤە بینن و مافێ چارەنڤیسێ خۆ دیاربکەن .
بۆچی سۆپایێ دیمەشقێ هێرشێ دکەتە سەر ڕۆژئاڤایێ کوردستانێ ؟
پشتی کو گەلێن سوریا دژی ڕژێما بەعسا دڕندە ڕاپەرین و ڕۆژئاڤایێ کوردستانێ هاتە ڕزگارکرن و ڕۆژا (خۆر) داگیرکەرانژی ئاڤابوو، ئەڤەش بوو ئەگەرێ توڕەبوونا داگیرکەران، هەمی هەوڵ ژلایێ داگیرکەرانڤە هاتنە دان کو نەهێلن کورد بگەهنە مافێن ڕەوایێن خۆ و بچەندین ڕێکان ڕێگری کرن لێ سەرنەکەفتن و هیڤیێن وان بوونە خەون.
چ بهێتە کرن داکو ئەڤ پیلانگێڕی و هێرشە بشکێنن؟
پێتڤیە هەردەم دئێکدەنگ و تەبابین چۆنکی دهرمانێ ڕەوشا نوکە یا گەلێ کوردستانێ یەو نوکە ل هەمی دەما ئەم پێتڤی ب ئێک هەڵویستیێ و ئێکدەنگیێینە.
گەلێ قەهرەمانێ کوردستانێ ...
پشتڕاستبن ئەڤ قۆناغا سەخت دێ دەربازبیت و داهاتوو بۆ گەلێ کوردستانێ یە و دێ سەرکەڤین و مافێن ڕەوایێن خۆ دێ بدەستڤە ئینین و ئایندێ گەلێ کوردستانێ یێ گەشەو داگیرکەرو و دۆژمنێن کوردا وەکی هەردەم دێ ڕیڕەش و ڕیسوا بن و ئیڕادا گەلێ کوردستانێ ل چەکێ وان بهێزترە.
بەرگری کرن ل کوردستانێ ئەرکەکێ ئاینیی و نەتەوەیی و نیشتمانیە و لسەر مە هەمیان پێتڤیە بەرگریێ ل کوردستانێ بکەین و وەک هەردەم داگیرکەرو دۆژمنان تێک بشکێنین و هیڤیێن وان ژ ناف ببەین.
بژی کوردستان
بژی ئێکگرتنا گەلێ کوردستانێ
