ئێوارەی ئەمڕۆ شەممە، بازرگانان و خاوەن دوکانەکان مانگرتنێکی گشتییان دەستپێکرد کە داخستنی چەندین بازاڕ و دوکانی لە ناوچە جیاجیاکانی بەغدای پایتەخت گرتەوە. ئەمەش وەک ناڕەزایەتییەک بەرامبەر بە بڕیاری بەرزکردنەوەی پێناسەی گومرگی، کە ڕایانگەیاندووە بووەتە بارگرانییەکی زۆر لەسەر شانیان و کاریگەری نەرێنی کردووەتە سەر جوڵەی کڕین و فرۆشتن.
ژمارەیەک لە بازرگانان بە پەیامنێری ئاژانسی "شەفەق نیوز"یان ڕاگەیاندووە کە پێناسە نوێیەکە بووەتە هۆی بەرزبوونەوەی نرخی کاڵاکان و دابەزینی توانای کڕینی هاووڵاتیان، ئەمەش بووەتە هۆی سستبوونی بازاڕ و زیانی گەورە بۆ خاوەنکارەکان.
ئاماژەیان بەوەش کردووە کە مانگرتنەکە وەک هەنگاوێکی ناڕەزایەتییە بۆ گوشار خستنە سەر لایەنە پەیوەندیدارەکان بە مەبەستی چاوخشاندنەوە بە بڕیارەکە، و داوایان کرد میکانیزمێکی دادپەروەرانە دابنرێت کە ڕەچاوی بارودۆخی بازرگانان و هاووڵاتیان بکات لە ژێر سایەی بارودۆخی ئابووری ئێستادا.
خۆپیشاندەران جەختیان لە بەردەوامیی مانگرتنەکە کردەوە تا ئەو کاتەی داواکارییەکانیان جێبەجێ دەکرێت، داواشیان لە حکومەت کرد دەرگای گفتوگۆ بکاتەوە و چارەسەری بەپەلە بدۆزێتەوە بۆ ڕێگریکردن لە خراپتربوونی قەیرانی ئابووری لە بازاڕە ناوخۆییەکاندا.
ئەمڕۆ بازاڕە بازرگانییەکانی بەغدا لێشاوی هاووڵاتیانی بەخۆیەوە بینی بۆ کڕینی پێداویستییەکان، لە ترسی بەرزبوونەوەی نرخی خۆراک و کەلوپەلە سەرەتاییەکان، دوای ئەوەی بازرگانانی عێراق لە ڕێگەی میدیاکانەوە هەڕەشەی داخستنی بازاڕەکانیان کرد وەک ناڕەزایەتی بەرامبەر بڕیاری حکومەت بۆ بەرزکردنەوەی گومرگ.
بڕیاری بەرزکردنەوەی پێناسەی گومرگی لەسەر هەندێک کاڵای جوانکاری (کەمالیات) ڕووبەڕووی ڕەتکردنەوە و ناڕەزایەتی بازرگانانی عێراق بووەتەوە، ئەمەش بووەتە هۆی کەڵەکەبوونی کۆنتێنەرەکانی کاڵا لە دەروازە سنوورییەکان و پەککەوتنی جوڵەی بازرگانی، کە ڕەنگدانەوەی نەرێنی هەبووە لەسەر داهاتە گشتییەکان؛ شارەزایانیش پێیان وایە ئەمە یەکێک بووە لە هۆکارەکانی دواکەوتنی مووچەی فەرمانبەرانی دەوڵەت بۆ مانگی کانوونی دووەم.
لەلایەکی دیکەوە، دەستەی گشتیی باجەکان جەخت لە بەدەستهێنانی داهاتی دارایی باش دەکاتەوە لە مانگی ڕابردوودا، لەکاتێکدا سەدان بازرگان بڕیاریانداوە لە ڕۆژی یەکشەممەوە دوکانەکانیان دابخەن، لەگەڵ بانگەواز بۆ داخستنی گشتی بازاڕەکان لە سەرجەم پارێزگاکان تا کاتێکی نادیار، بۆ گوشار خستنە سەر حکومەت بە مەبەستی دواخستنی بڕیارەکە یان کەمکردنەوەی باج.
