دکتۆرە وەهبیە شەوکەت ئازادیخواز و داکۆکیکاری مافی ئافرەتان و پزیشک و ئەدیب و نووسەری ژن و تێکۆشەرێکی ماندوو نەناس نوسەری ٣٧ کتێب کە ١٧ یان چاپکراون، لە شاری سلێمانی کۆچی دوایی کرد.
سەرەقەڵەمێک لە ژیان و تێکۆشانی دکتۆرە وەهبیە شەوکەت
ناوی تەواوی وەهبیە شەوكەت محەمەدە، لە ١٤-٢-١٩٤٤ لە شارۆچكەی دوزخورماتوو لەدایك بووە، باوكی لە بنەڕەتدا خەڵكی شاری سلێمانی بووە و دایكی خەڵكی كفری بووە.
بەهۆی وەزیفە و فەرمانبەریەتی باوكی چەند ساڵێک لە شارۆچكەی دوزخورماتوو نیشتەجێ بووە و پاشان بە ماڵ و منداڵەوە گەڕاوەتەوە بۆ سلێمانی.
دكتۆرە وهبیە بە زیرەكی و لێهاتوویی هەموو قۆناغەكانی قوتابخانە و زانکۆی بەسەركەوتوویی بڕیوە.
دکتۆرە وەهبیە شەوکەت لەتەمەنی ١٦ ساڵیدا بووەتە ئەندامی حیزبی شیوعی عێراق زۆرترین كار و چالاكی و تەمەنی بۆ كۆمەڵەی ئافرەتان و حزبی شیوعی تەرخان دەکات.
بەهۆی هەڵوێست و چالاکیی سیاسی لە ساڵی ١٩٦٤ لەلایەن بەعسی و قەومیە کودەتاچیەکان لە خوێندنی ئامادەیی دەردەکرێت و دواتر درێژە بە خوێندن دەدات.
لە دوا قۆناغی ئامادەیی لەسەر ئاستی پەروەردەی سلێمانی پلەی یەکەم بەدەست دەهێنێت.
لە ساڵی ١٩٦٦ لەسەر بڕیار و بە هاوکاری حزب بۆ خوێندن لە کۆلێژی پزیشکی - بەشی دەروونناسی دەچێتە مۆسکۆ و لە ساڵی ١٩٧٣كۆلیژ تەواو دەكات.
بۆ درێژەدان بە خوێندن دەچێتە بەریتانیا لەوێ راهێنانی پزیشكی تەواو دەکات و لە ساڵی ١٩٧٩ دەگەڕێتەوە كوردستان.
هەموو تەمەنی خۆی بۆ ئەدەب و نووسین و خزمەتکردنی خەڵک لە بواری تەندروستی تەرخان دەکات.
دكتۆرە وەهبیە شەوکەت جگە لە زمانی كوردی، زمانەکانی عەرەبی و روسی و توركی و ئینگلیزی و فەرەنسی بەتەواوی شارەزا بووە.
چەندین كتێبی لە زمانی روسیەوە وەرگێراوەتە سەر زمانی عەرەبی، کۆی بەرهەمەکانی 37 پەرتوكە و تەنها 17 یان چاپكراون.
بەرهەمەکانی لە بواری تەندروستی دەروونی و ڕۆمان و شانۆگەری و کورتە چیرۆك و وەرگێڕان بووە.
لە ساڵی ١٩٩٤ وتارێکی ڕەخنەگرانە لە دژی شەڕی ناوخۆیی و گەندەڵی و بە فیڕۆدانی داهات و سامانی کوردستان و بەرتەسک کردنەوەی ئازادی ڕا دەربڕین بڵاودەکاتەوەو دووچاری هەڕەشە لێکردن دەبێتەوەو بە ناچاری وڵات بەجێ دەهێڵێـت و سەرەتا دەچێتە سوریا و پاشان لە کەنەدا نیشتەجێ دەبێت.
لە ساڵی ٢٠٠٤ بە یەکجاری دەگەڕێـتەوە كوردستان و درێژە بە كاری پزیشكی دەدات.
بۆ ماوەی ٨ ساڵ بوو تووشی نەخۆشی هاتبوو بەڵام هەر کۆڵی نەدا و بە یەک دەست کاری دەکرد.
لەبارەی ئاوڕنەدانەوە لە توانا و مێژووی تێکۆشانی بە هۆی هەڵوێستی سەرکەشانە و ملکەچ نەبوون بۆ دەسەڵات، فەرامۆش کرابوو، وەکوو خۆی وتوویەتی نەک میللەتەکەم تەنانەت خەڵکی شارەکەشم نامناسنەوە.
دكتۆرە وەهبیە شەوکەت لە تەمەنی ٨١ ساڵیدا و لە ڕۆژی ٢٥-١٢-٢٠٢٥ لە شاری سلێمانی کۆچی دوایی کرد.
