
ڕێگای كوردستان
وەزارەتی بەرگریی ڕووسیا ئەمڕۆ شەممە ڕایگەیاند، هێزەکانیان لە شەوی ڕابردوودا لە ڕێگەی فڕۆکەی بێفڕۆکەوان (درۆن)ـەوە هێرشیان کردووەتە سەر دامەزراوەکانی وزە و کەشتییەکی دەریایی کە بە گوتەی مۆسکۆ، لە بەرژەوەندیی هێزەکانی ئۆکرانیادا کاریان کردووە.
وەزارەتەکە لە بەیاننامەیەکدا ئاماژەی بەوە کردووە کە هێرشەکان وێستگەی کارەبای گەرمی "کریڤی ڕی"ـیان لە ناوچەی دنیپرۆپێترۆڤسک کردووەتە ئامانج، کە بە گوتەی ڕووسیا، وزە بۆ دامەزراوە سەربازی-پیشەسازییەکانی ئۆکرانیا دابین دەکات. هەروەها وێستگەیەکی کارەبای 110 کیلۆڤۆڵتی لە شاری "سارنێ" لە ناوچەی ڕیڤنێ کراوەتە ئامانج، کە بە هەمان شێوە بە گوتەی وەزارەتی بەرگری، کارەبا بۆ دامەزراوە پیشەسازییە سەربازییەکان دابین دەکات.
لە بەیاننامەکەدا هاتووە کە هێرشەکان "کەشتییەکی بارهەڵگری وشک"ـیشیان لە دەریای ئۆدێسا کردووەتە ئامانج، و ئاماژەی بەوە کردووە کە کەشتییەکە باری دوو-بەکارهێنانی بۆ سوودی هێزەکانی ئۆکرانیا گواستووەتەوە.
ئەم پەرەسەندنانە دوای ئەوە دێن کە وەزارەتی بەرگریی ڕووسیا دوێنێ هەینی ڕایگەیاندبوو، هێزەکانیان لە هێرشێکی بەرفراواندا بە چەکی وردی مەودادووری ئاسمانی و درۆنی هێرشبەر، ژێرخانی سەربازیی ئۆکرانیایان لە ناوچەکانی کیێڤ، دنیپرۆپێترۆڤسک، لڤیڤ، میکۆلایڤ، ئۆدێسا و ئیڤانۆ-فرانکیڤسک کردووەتە ئامانج.
لە سەرەتای ئەمساڵەوە هێرشەکانی درۆن و مووشەک لە نێوان هەردوو وڵاتدا توندتر بوون؛ لەو چوارچێوەیەشدا لە مانگی تەمموز (7)ـی ئەمساڵ، ئۆکرانیا ڕایگەیاندبوو کە ڕووسیا بە نزیکەی 40 مووشەکی بالیستی گەورەترین هێرشی کردووەتە سەر کیێڤ.
